ក្រសួងវប្បធម៌ ប្រាប់អ្នករិះគន់ថា ក្រសួងតាមដានជាប់ជាប្រចាំលើបញ្ហាសំណង់នៅនៅវត្តភូម៉ានហ្វា ប្រទេសថៃ

ក្រសួងវប្បធម៌ និងវិចិត្រសិល្បៈ នៅល្ងាចថ្ងៃទី២៦​ ខែកញ្ញានេះ បានចេញសេចក្តីជូនដំណឹង ដើម្បីបញ្ជាក់ដល់អ្នករិះគន់ថា ករណីសាងសង់សំណង់នៅវត្តភូម៉ានហ្វា ក្នុងខេត្តបុរីរម្យ ក្រសួងបានយកចិត្ត ទុកដាក់យ៉ាងខ្លាំងលើសកម្មភាព នៃការសាងសង់នេះ ដោយបានចាត់ក្រុមការងារជំនាញតាមដានជាប់ជាប្រចាំ តាំងពីករណីនេះ ផ្ទុះឡើងអំឡុងឆ្នាំ២០២១មកម្ល៉េះ។

ក្រសួងវប្បធម៌ចេញសេចក្ដីជូនដំណឹងបែបនេះ ក្រោយសាធារណមតិបានរិះគន់ចំពោះក្រសួងវប្បធម៌ ចំពោះករណីភាគីថៃបានសាងសង់សំណង់នៅវត្តភូម៉ានហ្វា ក្នុងខេត្តបុរីរម្យ ដែលមានរូបរាងដូចប្រាសាទអង្គរវត្តរបស់កម្ពុជា។

សេចក្ដីជូនដំណឹងរបស់ក្រសួងវប្បធម៌សរសេរបញ្ជាក់ថា រាល់ចំណាត់ការកន្លងមកដែលក្រសួងបានធ្វើ គឺផ្ដោតលើសកម្មភាពទំនាក់ទំនងការទូតរវាងក្រសួងវប្បធម៌និងវិចិត្រសិល្បៈ និងភាគីថៃ (ស្ថានទូតថៃប្រចាំនៅកម្ពុជា និងក្រសួងវប្បធម៌ថៃ) ដោយក្រសួងវប្បធម៌ បានបញ្ចូនអ្នកសិក្សាស្រាវជ្រាវ ចុះទៅពិនិត្យទីតាំងសាងសង់ផ្ទាល់ ប៉ុន្តែស្ថានភាពនៅពេលដែលអ្នកជំនាញចុះទៅបានពិនិត្យឃើញថា សំណង់នៅមិនទាន់មានការសង់បន្ថែមនៅឡើយ។

រាល់ករណីនៃការបញ្ជូនអ្នកជំនាញចុះត្រួតពិនិត្យនិងចរចា គឺក្រសួងវប្បធម៌មានជំហរច្បាស់លាស់ ក្នុងការទប់ស្កាត់នូវទង្វើចម្លងអត្តសញ្ញាណជាតិរបស់ប្រទេសកម្ពុជា ដោយផ្អែកទៅលើសកម្មភាពការទូត ការងារផ្ទៀងផ្ទាត់បែបបច្ចេកទេសការងារចុះពិនិត្យទីតាំងផ្ទាល់ និងការងារផ្លូវច្បាប់ជាតិ និងអន្តរជាតិ ក្នុងករណីដែលត្រូវប្រកាន់យក។

តាមរយៈសេចក្តីជូនដំណឹង ក្រសួងវប្បធម៌បានបញ្ជាក់ថា កិច្ចការនេះក្រុមការងារក្រសួងវប្បធម៌ និងវិចិត្រសិល្បៈ នៅតែបន្តនីតិវិធីដោះស្រាយតាមជំនាញនិងការទូត។ ក្រសួងវប្បធម៌ ក៏បានអរគុណចំពោះទឹកចិត្តស្រឡាញ់ ការគាំទ្រមោះមុតរបស់សារធារណជន និងការចូលរួមផ្ដល់ព័ត៌មានគ្រប់ជ្រុងជ្រោយដែលជាជំនួយដ៏សំខាន់សម្រាប់កិច្ចការអភិរក្សបេតិកភណ្ឌដ៏ថ្លៃថ្លរបស់កម្ពុជា៕

ដោយ៖ ង៉ិល ណារ៉ាត់