ព័ត៌មានជាតិ

រដ្ឋមន្រ្តីក្រសួងបរិស្ថាន ណែនាំឲ្យមន្ត្រីបញ្ចប់វប្បធម៌ធ្វើកិច្ចសន្យា ហើយដោះលែងភ្លាម

បានផុស

១ year មុន

នៅ

ថ្ងៃពុធ ២៧ កញ្ញា ២០២៣

ដោយ

«ត្រូវអនុវត្តច្បាប់ដោយគ្មានការលើកលែង និងបញ្ចប់វប្បធម៌ធ្វើកិច្ចសន្យា ហើយដោះលែង ដែលនេះជាការអនុវត្តខុសច្បាប់»។ នេះជាការគូសបញ្ជាក់របស់លោក អ៊ាង សុផល្លែត រដ្ឋមន្ត្រីក្រសួងបរិស្ថាននៅចំពោះមុខមន្រ្តីក្រោមឱវាទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ាង សុផល្លែត បានចង្អុលបង្ហាញថា គ្រប់ករណីប្រព្រឹត្តិបទល្មើសទាំងឡាយឲ្យតែចាប់បាន គឺមិនអនុញ្ញាតឲ្យធ្វើកិច្ចសន្យាហើយដោះលែងទៀតនោះទេ គឺត្រូវតែកសាងសំណុំរឿង និងដាក់បន្តទៅតុលាការជាដាច់ខាត។ ប្រសិនជាករណីទាំងនោះមានពាក់ព័ន្ធទៅនឹងកត្តានយោបាយ ត្រូវតែផ្តល់ព័ត៌មាននិងសិទ្ធិឲ្យរដ្ឋមន្ត្រីជាអ្នកសម្រេច។

លោករដ្ឋមន្រ្តីបញ្ជាក់ពីការអនុវត្តភារកិច្ច កាតព្វកិច្ចរបស់មន្ត្រីក្រោមឱវាទឲ្យបានត្រឹមត្រូវ ហ្មត់ចត់គឺដើម្បីលើកស្ទួយប្រសិទ្ធភាពការងារ ប្រសិទ្ធផល ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ក្នុងដំណាក់កាលទី១។

បើតាមលោករដ្ឋមន្រ្តី យុទ្ធសាស្ត្របញ្ចកោណរបស់រាជរដ្ឋាភិបាលកម្ពុជាក្នុងដំណាក់កាលទី១ ក្រសួងបរិស្ថានបានកំពុងអនុវត្តរួចទៅហើយ លើអាទិភាពចំនួន៣ ទី១.កាត់បន្ថយការប្រើប្រាស់ប្លាស្ទិកលើប្រធានបទ ” ថ្ងៃនេះ ខ្ញុំមិនប្រើថង់ប្លាស្ទិកទេ ” ទី២. ការផ្តល់ជូនកូនឈើចំនួនជាង ១លានដើម រៀងរាល់ឆ្នាំ សម្រាប់ចែកជូនប្រជាពលរដ្ឋដែលមានតម្រូវការដាំដើមឈើដោយឥតគិតថ្លៃ និង ទី៣. អេកូទេសចរណ៍នៅតាមតំបន់ការពារធម្មជាតិព្រៃសហគមន៍ ធ្វើយ៉ាងណារក្សាឲ្យបានគម្របព្រៃឈើ មានអព្យាក្រឹតកាបូន និងលើកស្ទួយជីវភាពប្រជាពលរដ្ឋដោយចរភាព។

គួរជម្រាបដែរថា អគ្គនាយកដ្ឋានតំបន់ការពារធម្មជាតិមាននាយកដ្ឋានចំណុះចំនួន ៧ ដែលរួមមាន នាយកដ្ឋានរដ្ឋបាល ផែនការ និងហិរញ្ញវត្ថុ, នាយដ្ឋានអភិរក្សតំបន់ការពារធម្មជាតិដីគោកខាងកើតទន្លេមេគង្គ, នាយកដ្ឋានអភិរក្សតំបន់ការពារធម្មជាតិដីគោកខាងជើងបឹងទន្លេសាប, នាយកដ្ឋានអភិរក្សតំបន់ការពារធម្មជាតិដីគោកខាងត្បូងបឹងទន្លេសាប, នាយកដ្ឋានអភិរក្សតំបន់ការពារធម្មជាតិដីសើម ទឹកសាប, នាយកដ្ឋានអធិការកិច្ច និងពង្រឹងការអនុវត្តច្បាប់ និងនាយកដ្ឋានអភិរក្សសមុទ្រ និងតំបន់ឆ្នេរ គ្រប់គ្រងលើតំបន់ការពារធម្មជាតិចំនួន ៧៤តំបន់ មានផ្ទៃដីប្រមាណ ៧,២លានហិកតា ដែលចាំបាច់ត្រូវមានការរួបរួមពីមន្រ្តីគ្រប់ជាន់ថ្នាក់ និងលើកទឹកចិត្តឲ្យប្រជាពលរដ្ឋចូលរួមផងដែរ ក្នុងកិច្ចការពារ អភិរក្សធនធានធម្មជាតិ ដើម្បីសម្រេចឲ្យបានផែនការយុទ្ធសាស្រ្តរួមរបស់កម្ពុជា ៕

Related Topics:លោក អ៊ាង សុផល្លែត