របាំងស្បៃអួនជាង ១ ពាន់ម៉ែត្របន្ថែមទៀត ត្រូវសមត្ថកិច្ចបង្ក្រាប

សមត្ថកិច្ចចម្រុះថ្នាក់ខេត្តកំពង់នៅថ្ងៃទី ២៦ ខែកញ្ញា ឆ្នាំ២០២៣ បានសហការគ្នាចុះបង្ក្រាបបទល្មើសនេសាទនៅក្នុងភូមិសាស្ត្រ ឃុំស្វាយរំពារ ស្រុកកំពង់លែង និងក្នុងភូមិសាស្ត្រ ឃុំពាមឆ្កោក ស្រុកជលគីរី ដោយបានកាប់បំផ្លាញចោលនៅនឹងកន្លែងនៅរបាំងលបសាច់អួនចំនួន ១០ កន្លែង មានប្រវែងសរុប ១.៥០០ ម៉ែត្រ និងបានចាក់លែងកូនត្រីដែលជាប់ក្នុងលបសាច់អួនចំនួន ៥០ គីឡូ ចូលក្នុងទន្លេធម្មជាតិវិញផងដែរ។

លោក ងិន ហ៊ុន ប្រធានមន្ទីរកសិកម្ម រុក្ខា ប្រមាញ់ និងនេសាទខេត្តកំពង់ឆ្នាំងបានឲ្យដឹងថា ថ្ងៃនេះក្រុមការងារចម្រុះរួមមានមន្ទីរកសិកម្មខេត្ត កងកម្លាំងនគរបាលប្រឆាំងបទល្មើសសេដ្ឋកិច្ចខេត្ត ខណ្ឌរដ្ឋបាលជលផលកំពង់ឆ្នាំងប្រើប្រាស់មធ្យោបាយកាណូតបាឡាស្មាច់ ចំនួន ០៨គ្រឿង កំលាំងសរុប ចំនួន៤៤នាក់ បានចុះប្រតិបត្តិការបង្រ្កាបបទល្មើសនេ សាទប្រទះឃើញការធ្វើនេសាទដោយប្រើឧបករណ៍របាំងលបរួមផ្សំសាច់អួនខុសនិងច្បាប់ស្តីពីជលផលនៅចំណុចអង្អរទ្វីប ឃុំស្វាយរំពារ ស្រុកកំពង់លែង ចំណុចក្រោយភូមិក្បាលកន្លង់ ភូមិសំពៅសំពាក់ ភូមិវាលសំណាប ភូមិកប់ចេស និងចំណុចខ្វែងឆ្លុះភូមិក្បាលកន្លង់ ឃុំពាមឆ្កោកស្រុកជលគិរី។

បទល្មើសនេសាទខាងលើនេះ សមត្ថកិច្ចចម្រុះខេត្តបានឯកភាពគ្នារុះរើ និងបំផ្លាញចោលវត្ថុតាងនូវហ្នឹងកន្លែង លទ្ធផលរួម មានរបាំងសាច់អួនចំនួន១០កន្លែងមានប្រវែង ១ ៥០០ ម៉ែត្រ, លូសាច់អួនចំនួន ៣៤គ្រឿង, បង្គោល ចំនួន ៧០០ ដើម និងលែងត្រីចម្រុះចំនួន៥០គីឡូ ចូលក្នុងបឹង និងទន្លេធម្មជាតិវិញ។

លោក ងិន ហ៊ុនបានបញ្ជាក់ឲ្យដឹងថា នៅក្នុងរដូវបិទនេសាទបែបនេះ ច្បាប់ស្ដីពីជលផលអនុញ្ញាតឲ្យដាក់របាំងចាប់ត្រីមានប្រវែងតែ ៥០ ម៉ែត្រ ប៉ុណ្ណោះ។ ដូចនេះលោកប្រធានមន្ទីរសូមអំពាវនាវដល់ប្រជានេសាទទាំងអស់ សូមនាំគ្នាគោរពច្បាប់ស្ដីពីជលផល គឺកុំធ្វើការនេសាទល្មើសច្បាប់ឲ្យសោះពិព្រោះការនេសាទល្មើសច្បាប់ ត្រូវប្រឈមនឹងសមត្ថកិច្ចចម្រុះកាប់បំផ្លាញចោលដោយមិនយកយល់ឡើយ។

ដោយឡែកចំពោះបទល្មើសឆក់ត្រី និងបទល្មើសដាក់របាំងស្បៃមុងវិញជាគោលការណ៍គឺសមត្ថកិច្ចនិងចាប់ខ្លួនជនល្មើសកសាងសំណុំរឿង បញ្ជូនទៅតុលាការ ដោយមិនលើកលែងនោះឡើយ។

នៅក្នុងកិច្ចប្រតិបត្តិការបង្ក្រាបបទល្មើសនេសាទនេះលោកប្រធានមន្ទីរកាក់សិកម្មខេត្តក៏បានដាក់ផែនការដល់បណ្ដាសង្កាត់នេសាទ និងផ្នែកនេសាទគ្រប់ស្រុកត្រូវតែទទួលខុសត្រូវបង្ក្រាបទល្មើសនេសាទនៅ ក្នុងដែនសមត្ថកិច្ចរបស់ខ្លួនជាប្រចាំ និងឲ្យអស់។

ដោយមិនត្រូវបណ្ដែតបណ្ដោយ ឬឃុបឃិតឲ្យមានបទល្មើសនោះឡើយ។ ករណីមានបទល្មើសនៅក្នុងដែនសមត្ថកិច្ចរបស់ខ្លួន មន្ត្រីសង្កាត់នេសាទ និងផ្នែកនេសាទនោះ ត្រូវទទួលខុសត្រូវចំពោះមុខថ្នាក់លើ៕

អត្ថបទ៖ ឈៀងថារិទ្ធ