ព័ត៌មានជាតិ

សម្ដេច ឃួន សុដារី ស្នើឯកអគ្គរាជទូតអង់គ្លេស បន្តលើកកម្ពស់ពាណិជ្ជកម្ម និងទំនាក់ទំនងទ្វេភាគី រវាងរដ្ឋសភាប្រទេសទាំងពីរ

បានផុស

២ years មុន

នៅ

ថ្ងៃពុធ ២៧ កញ្ញា ២០២៣

ដោយ

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានស្នើ ឯកឧត្តម Dominic Williams ឯកអគ្គរាជទូតចក្រភពអង់គ្លេស ប្រចាំនៅព្រះរាជាណាចក្រកម្ពុជា បន្តជួយគាំទ្រលើកកម្ពស់វិស័យពាណិជ្ជកម្មរវាងកម្ពុជា និងអង់គ្លេស ឲ្យកាន់តែកើនឡើង និងលើកកម្ពស់ទំនាក់ទំនងទ្វេភាគីរវាងរដ្ឋសភាប្រទេសទាំងពីរឲ្យបានរឹងមាំ និងគ្រប់ជ្រុងជ្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំណើនេះបានធ្វើឡើងនៅក្នុងឱកាសដែល សម្តេចរដ្ឋសភាធិបតី បានអនុញ្ញាត និងទទួលជួបពិភាក្សាការងារជាមួយ ឯកឧត្តម Dominic Williams នៅព្រឹកថ្ងៃទី ២៧ ខែកញ្ញា ឆ្នាំ ២០២៣ នេះ នាវិមានរដ្ឋសភា។

នៅឱកាសនោះ សម្តេចរដ្ឋសភាអធិបតី បានគូសបញ្ជាក់ថា ការចូលរួមចំណែករបស់ភាគីអង់គ្លេស ជាផ្នែកសំខាន់នៅក្នុងការលើកកម្ពស់ជីវភាពប្រជាពលរដ្ឋកម្ពុជា ជាពិសេសការធ្វើឲ្យសម្រេចបាននូវផែនការអភិវឌ្ឍរបស់កម្ពុជា ដែលនឹងក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសមានប្រាក់ចំណូលខ្ពស់នៅឆ្នាំ ២០៥០។

សម្តេចរដ្ឋសភាធិបតី បានថ្លែងអំណរគុណដល់រដ្ឋាភិបាល និងប្រជាជនអង់គ្លេស ដែលបានជួយគាំទ្រដល់ការអភិវឌ្ឍនៅកម្ពុជាតាំងពីដើមរហូតមក ដូចជាវិស័យសង្គម សេដ្ឋកិច្ច ការកម្ចាត់មីន សាលាក្តីខ្មែរក្រហម និងជាពិសេសការផ្តល់អាហារូបករណ៍ដល់សិស្ស និស្សិត និងមន្ត្រីរាជការកម្ពុជាបានទៅសិក្សានៅចក្រភពអង់គ្លេស។

ជាមួយគ្នានេះ សម្តេចរដ្ឋសភាធិបតី បានស្វាគមន៍ការបើកសាកលវិទ្យាល័យរបស់ប្រទេសអង់គ្លេសនៅភ្នំពេញ ដែលជាផ្នែកសំខាន់ក្នុងការរួមចំណែកកសាងធនធានមនុស្សនៅកម្ពុជា។ សម្តេច បានគូសបញ្ជាក់ថា មានយុវជនកម្ពុជាជាច្រើនមានក្តីប្រាថ្នាចង់ទៅសិក្សានៅប្រទេសអង់គ្លេស ប៉ុន្តែនៅពេលនេះអង់គ្លេសបានបើកសាកលវិទ្យាល័យនៅកម្ពុជា ដូចនេះពួកគេនឹងសម្រេចបាននូវក្តីប្រាថ្នារបស់ខ្លួន។

ជាមួយគ្នានេះ សម្តេចរដ្ឋសភាធិបតី ឃួន សុដារី ក៏បានស្នើសុំ ឯកឧត្តម ឯកអគ្គរាជទូត ជួយជំរុញទំនាក់ទំនងទ្វេភាគីរវាងរដ្ឋសភាប្រទេសទាំងពីរឲ្យបានកាន់តែប្រសើរ និងសកម្មថែមទៀត នៅក្នុងនោះមានការលើកកម្ពស់សមត្ថភាព និងភាពអង់អាចរបស់ស្ត្រី ការចូលរួមបណ្ដុះបណ្ដាលធនធានមនុស្ស លើកកម្ពស់សមត្ថភាពមន្ត្រីអគ្គលេខាធិការដ្ឋានរដ្ឋសភាក្នុងការផ្តល់សេវាជូនតំណាងរាស្ត្រ ឲ្យកាន់តែមានប្រសិទ្ធភាព និងការធ្វើទំនើបកម្ម ដោយប្រែក្លាយរដ្ឋសភាទៅជាសភាអេឡិចត្រូនិក “E-parliament” ជាដើម។

សម្តេចរដ្ឋសភាធិបតី និងឯកឧត្តម ឯកអគ្គរាជទូត បានសម្តែងក្តីពេញចិត្តចំពោះវឌ្ឍនភាពដ៏ប្រសើរ នៃចំណងការទូតប្រទេសទាំងពីរ ដែលមានការវិវត្តន៍រីកចម្រើនជាបន្តបន្ទាប់ ដែលបានឈានដល់ខួបលើកទី ៧០ នៅឆ្នាំនេះ ជាសក្ខីភាពមួយ ឆ្លុះបញ្ចាំងពីភាពស្ថិតស្ថេរ នៃទំនាក់ទំនងដ៏ល្អ និងយូរអង្វែងរវាងប្រទេសទាំងពីរ។ កាលពីឆ្នាំកន្លងទៅ ទំហំពាណិជ្ជកម្មរវាងកម្ពុជា និងអង់គ្លេស ឈានដល់ចំនួនប្រមាណជិត ១ ពាន់លានដុល្លារអាមេរិក។

ឯកឧត្តម Dominic Williams បានគាំទ្រប្រសាសន៍លើកឡើងរបស់ សម្តេចរដ្ឋសភាធិបតី និងបានថ្លែងអំណរគុណដែល សម្តេចរដ្ឋសភាធិបតី បានចំណាយពេលវេលាទទួលជួបពិភាក្សាការងារជាមួយ ឯកឧត្តម នាពេលនេះ។

ឯកឧត្តម ឯកអគ្គរាជទូត បានអបអរសាទរចំពោះ សម្តេចរដ្ឋសភាធិបតី ដែលត្រូវបានរដ្ឋសភាបោះឆ្នោតជាប្រធានរដ្ឋសភា ជាស្ត្រីដំបូងនៅកម្ពុជា ទទួលតំណែងដ៏សំខាន់នេះ។ ឯកឧត្តម Dominic Williams បញ្ជាក់ថា សម្តេចរដ្ឋសភាធិបតី ជាគំរូសម្រាប់កុមារី និងស្ត្រីនៅកម្ពុជា។

នៅក្នុងឱកាសនេះដែរ ឯកឧត្តម ឯកអគ្គរាជទូត បានជម្រាបជូន សម្តេចប្រធានរដ្ឋសភា ពីគម្រោងជាច្រើន ដែលប្រទេសអង់គ្លេស នឹងជួយដល់កម្ពុជា មានទាំងវិស័យពាណិជ្ជកម្ម ការបណ្ដុះបណ្ដាលធនធានមនុស្ស សង្គមកិច្ច បរិស្ថាន ជាពិសេសអង់គ្លេស នឹងបន្តជួយបោសសម្អាតមីននៅកម្ពុជារហូតដល់ឆ្នាំ ២០២៥៕

Related Topics:សម្ដេច ឃួន សុដារី