ព័ត៌មានជាតិ

យុវជន គឹមភា បង្រៀនភាសាកួយដល់ជនជាតិដើមភាគតិចកួយ ដោយខ្លាចបាត់បង់ភាសាដើម

បានផុស

២ years មុន

នៅ

ថ្ងៃពុធ ២៧ កញ្ញា ២០២៣

ដោយ

ជនជាតិដើមភាគតិចកួយ មិនមានអក្សរសាស្ត្រដើមទេ គឺនិយាយភាសាកួយ តែសរសេរខ្យល់សំនៀងជាភាសាខ្មែរ ហើយភាសាកួយ ក៏មានលាយពាក្យភាសាខ្មែរដែរ។ ចំពោះភាសាកួយ យុវជនកួយសម័យនេះ មិនសូវនិយមនិយាយភាសាជនជាតិដើមរបស់ខ្លួនទេ ដោយឪពុក-ម្ដាយមិនសូវបាននិយាយភាសាកួយជាមួយកូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យុវជន គឹមភា ជនជាតិដើមភាគតិចកួយ មកពីខេត្តព្រះវិហារ បានប្រាប់កម្ពុជាថ្មីថា មូលហេតុដែលលោកចាប់ផ្ដើមបង្រៀនភាសាកួយ តាមរយៈផេកផ្លូវការមួយ ដោយសារតែគិតថា ខ្លាចបាត់បង់ភាសា អត្តសញ្ញាណរបស់ជនជាតិដើមភាគតិចកួយ តែប៉ុណ្ណោះ។ ក្រៅពីនេះ គឹមភា ចង់បង្រៀនភាសាកួយនេះទៅដល់ជនជាតិដើមភាគតិចផ្សេងៗទៀត ដើម្បីងាយស្រួលប្រាស្រ័យទាក់ទងគ្នា ក្នុងការរស់នៅប្រចាំថ្ងៃ។ ជាក់ស្ដែង មានពាក្យថា៖ ហូបបាយ ផឹកទឹក តើត្រូវនិយាយ ឬសរសេរបែបម៉េច? នេះគឺជាលើកឡើងរបស់ យុវជន គឹមភា ប្រាប់មកកាន់កម្ពុជាថ្មី។

បច្ចុប្បន្ននេះ គឹមភា គឺជានិស្សិតនៅសាកលវិទ្យាល័យមួយ នៃរាជធានីភ្នំពេញ ដោយសារតែជាប់រវល់នឹងការសិក្សារៀនសូត្រ និងឆ្លៀតធ្វើការងារខ្លះ ដើម្បីផ្គត់ផ្គង់ការរៀនសូត្រ និងការចំណាយប្រចាំថ្ងៃផង ទើបធ្វើឱ្យ គឹមភា ពុំសូវមានពេលផ្សព្វផ្សាយ និងបង្រៀនភាសាកួយ ឱ្យបានច្រើននោះ។

ប៉ុន្តែទោះបីជារវល់យ៉ាងណាក៏ដោយ គឹមភា ក៏នៅតែអាចឆ្លៀតបង្រៀនភាសាកួយ ដល់សាធារណៈទូទៅបានយល់ដឹងខ្លះអំពី ភាសា និងទំនៀមទម្លាប់ខ្លះទៀតរបស់ជនជាតិដើមភាគតិចគួយ តាមរយៈផេកផ្លូវការមួយឈ្មោះថា “គឹមភា-Kim Phea” និងតាមរយៈផេក “Countryside-ស្រុកស្រែ” ដែលអាចឱ្យយើងគ្រប់គ្នា អាចស្វែងរកមើលបានក្នុងហ្វេសប៊ុកយ៉ាងងាយស្រួល៕

អត្ថបទ៖ សួស សិត