មន្ទីរធម្មការខេត្តកំពង់ឆ្នាំង បញ្ជាក់ពីព្រះជន្មាយុរបស់ចៅអធិការវត្តមួយដែលល្បីថាជាង១២០ព្រះវស្សា និងខ្លាំងពូកែ

មន្ទីរធម្មការ និងសាសនា ខេត្តកំពង់ឆ្នាំង បានចេញសេចក្ដីបញ្ជាក់មួយ បន្ទាប់ពីមានការចែករំលែកនៅលើបណ្ដាញសង្គមហ្វេសប៊ុកពាក់ព័ន្ធនឹងព្រះជន្មាយុរបស់ព្រះចៅអធិការវត្តមួយនៅខេត្តកំពង់ឆ្នាំង ដែលល្បីថា ព្រះចៅអធិការវត្តអង្គនោះមានព្រះជន្មាយុ១២២ព្រះវស្សា និងខ្លាំងពូកែ។

យោងតាមរបាយការណ៍របស់លោក សរ លាង ប្រធានមន្ទីរធម្មការ និងសាសនាខេត្តកំពង់ឆ្នាំង គោរពជូនក្រសួងធម្មការ និងសាសនា កាលពីថ្ងៃទី២៦ ខែកញ្ញា ឆ្នាំ២០២៣ បានបញ្ជាក់ថា ព្រះសង្ឃដែលត្រូវបានគេបង្ហោះចែករំលែកថា មានព្រះជន្មាយុ១២២ មានព្រះនាម ស៊ុន ចាន់វីរៈ ជាចៅធិការវត្ត ចន្ទប្បជោត្តនារាម (ហៅវត្ត តាសុត) ស្ថិតនៅភូមិប៉ាតឡាង ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង និងមានព្រះជន្មាយុទើបតែ២៨ព្រះវស្សាប៉ុណ្ណោះ និងបួសបាន១៤ព្រះវស្សា។

ប្រធានមន្ទីរធម្មការខេត្តកំពង់ឆ្នាំងបញ្ជាក់ថា បន្ទាប់ពីសាកសួរពាក់ព័ន្ធការដាក់ជើងលើក្បាលពុទ្ធបរិស័ទ ព្រះចៅអធិការវត្តអង្គនោះបញ្ជាក់ថា ការលើកជើងដាក់លើក្បាល គឺដោយសារកាលពីថ្ងៃទី២៣ ខែកញ្ញា លោក ថោង នីដាមុនី និងពុទ្ធបរិស័ទជិត១០០នាក់បានមកថ្វាយបង្គំ និងដាក់សំនួរពីរឲ្យលោក ហើយក៏ឆ្លើតត្រូវ ទើបលោក ថោង នីដាមុនី សុំថ្វាយ​បង្គំ និងសុំឲ្យព្រះអង្គលើកជើងដាក់លើក្បាល តែលោកមិនព្រម សុំតែថ្វាយបង្គំបានហើយ ហើយគាត់បានថ្វាយ​បង្គំ ហើយលោក ថោង នីជាមុនី បានទាញជើងលោកដាក់លើក្បាលរបស់គាត់តែម្តងដោយលោកមិនដឹងខ្លួន។

បើតាមការបញ្ចាក់របស់ចៅធិការវត្ត ពាក់ព័ន្ធនឹងរឿងព្រះជន្ម១២២ឆ្នាំ គឺលោក ថោង នីដាមុនី និងក្រុមញាតិរបស់គាត់បាន សួរអាចារ្យនៅក្នុងវត្ដមុខរូបសំណាកលោកឪសួង លោកអាចារ្យបានបកស្រាយថា លោកបានសុគត ៧៨ព្រះវស្សា ប៉ុន្តែបើគិតមកដល់បច្ចុប្បន្នបើលោកឪសួងមានជីវិតប្រហែលព្រះជន្ម១២០ព្រះវស្សា មិនមែនលោកមានព្រះជន្ម ១២២ព្រះវស្សាដូចការបង្ហោះរបស់ហ្វេសប៊ុក នោះឡើយ៕

អត្ថបទ៖ សុខុម