សហរដ្ឋអាមេរិកប្តេជ្ញាគាំទ្រប្រជាជន និងរួមចំណែក​ការអភិវឌ្ឍ​ កម្ពុជា

លោក W. Patrick Murphy ឯកអគ្គរដ្ឋទូតសហរដ្ឋអាមេរិក ប្រចាំនៅព្រះរាជាណាចក្រកម្ពុជា បានដឹកនាំគណៈ​ប្រតិភូ​របស់ស្ថានទូត ចូល​ជួប សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា នៅថ្ងៃទី ២៧ ខែកញ្ញា នៅវិមានសន្តិភាព ដើម្បីធ្វើការពិភាក្សាប្រកបដោយផ្លែផ្កា លើបញ្ហាជាច្រើនដែលជាប្រយោជន៍​រួម ដោយឯកអគ្គរដ្ឋទូត​បានប្តេជ្ញាគាំទ្រប្រជាជន និងរួមចំណែក​ដល់ការអភិវឌ្ឍ​ នៃប្រទេសកម្ពុជា។

នៅក្នុងជំនួប​ខាងលើ លោកឯកអគ្គរដ្ឋទូត Murphy បានថ្លែងសង្កត់ធ្ងន់លើការប្តេជ្ញាចិត្តយូរអង្វែងរបស់សហរដ្ឋ​អាមេរិក ក្នុងការគាំទ្រដល់ប្រជាជនកម្ពុជា និងការរួមចំណែក​ដល់ការអភិវឌ្ឍ​ នៃប្រទេសកម្ពុជា ដែលអាចមើលឃើញតាមរយៈជំនួយបរទេសចំនួន ៣ ពាន់លានដុល្លារ ដែលសហរដ្ឋអាមេរិកបានផ្តល់ឱ្យកម្ពុជា ក្នុងរយៈពេលជាង ៣០ ឆ្នាំ កន្លងមកនេះ។ ទោះបីលោកបានកត់សម្គាល់ឃើញថា ការសម្រេចចិត្តក្នុងការបន្តឡើងវិញ​នូវកម្មវិធីជំនួយបរទេសមួយចំនួន​របស់សហរដ្ឋអាមេរិក គឺជាផ្នែកមួយ​ នៃជំនួយជារួម ដែលមានសារៈសំខាន់សម្រាប់សុខភាព​របស់ប្រជាជនកម្ពុជា និងការអភិវឌ្ឍប្រកបដោយនិរន្តរភាព ​នៃព្រះរាជាណាចក្រកម្ពុជាក្តី តែលោកឯកអគ្គរដ្ឋទូតបានថ្លែងសង្កត់ធ្ងន់​លើសារៈសំខាន់ ​នៃសិទ្ធិមនុស្ស និងការការពារសេរីភាពជាមូលដ្ឋាន ដែលចាំបាច់ត្រូវតែមាននៅក្នុងទំនាក់ទំនងទ្វេភាគី។

លោកឯកអគ្គរដ្ឋទូត Murphy បានមើលឃើញពីជំនួបប្រកបដោយលទ្ធផលល្អ របស់លោកនាយករដ្ឋមន្ត្រី ជាមួយមន្ត្រី និងក្រុមហ៊ុនអាមេរិក នៅក្នុងសប្តាហ៍ថ្នាក់ខ្ពស់​ នៃមហាសន្និបាត​របស់ អង្គការសហប្រជាជាតិ ក្នុងពេលថ្មីៗ​នេះ នៅបូរីញូវយ៉ក ហើយបានកត់សម្គាល់ឃើញភាពជាដៃគូជាបន្តរបស់កម្ពុជា លើបញ្ហាសំខាន់ៗក្នុងតំបន់ និងក្នុងពិភពលោក ដែលរួមមាន ការអនុវត្តទណ្ឌកម្មរបស់ក្រុមប្រឹក្សាសន្តិសុខ នៃអង្គការសហប្រជាជាតិ​ លើសាធារណរដ្ឋប្រជាមានិតប្រជាធិបតេយ្យកូរ៉េ ការការពារបូរណភាពទឹកដី នៃប្រទេសអ៊ុយក្រែន និងដំណោះស្រាយស្តីពី វិបត្តិ​នៅប្រទេសភូមា។

លោកនាយករដ្ឋមន្រ្តី និងលោកឯកអគ្គរដ្ឋទូត បានពិភាក្សាគ្នាអំពីការគាំទ្រ​របស់សហរដ្ឋអាមេរិក​ក្នុងការបំផ្លាញចោលអាវុធ ដូចជាការដោះមីន និងយុទ្ធភណ្ឌមិនទាន់ផ្ទុះ នៅកម្ពុជា ហើយលោកឯកអគ្គរដ្ឋទូត បានសម្តែងអំណរគុណចំពោះកិច្ចសហប្រតិបត្តិការជិតស្និទ្ធ ​លើបេសកកម្មរុករកឈ្លើយសឹក និងយុទ្ធជនបាត់ខ្លួនអាមេរិក នៅកម្ពុជា។

លោកឯកអគ្គរដ្ឋទូត Murphy បានសុំឱ្យថ្នាក់ដឹកនាំកម្ពុជារក្សាគោនយោបាយការបរទេសដែលមានឯករាជ្យ​ និងតុល្យភាព ដើម្បីជាឧត្តម្ភប្រយោជន៍ ​នៃប្រជាជនកម្ពុជា និងដើម្បីបន្តសកម្មភាពធំៗ ប្រឆាំងនឹងការជួញដូរមនុស្ស និងការឆបោក​តាមប្រព័ន្ធអ៊ិនធឺណែត ដោយបានកត់សម្គាល់ឃើញពីសារៈសំខាន់​ នៃជំហរស្មោះត្រង់ជាសាធារណៈ​ របស់លោកនាយករដ្ឋមន្រ្តី ក្នុងការប្រយុទ្ធប្រឆាំងនឹងបទល្មើសជាសាកលនេះ។

ក្នុងនាមរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត បានថ្លែងអំណរគុណចំពោះរដ្ឋាភិបាលអាមេរិក ដែលបានផ្តល់ជូនឡើងវិញនូវជំនួយក្នុងទំហំទឹកប្រាក់ប្រមាណ ១៨ លានដុល្លារអាមេរិក តាមរយៈទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (US AID)។ ប្រាក់ជំនួយដែលត្រូវបានផ្តល់ជូនឡើងវិញនេះ នឹងត្រូវយកទៅប្រើប្រាស់នៅក្នុងវិស័យសំខាន់ៗ ដូចជា៖ ១. ការកែលម្អការផ្ដល់សេវាសុខាភិបាលទាំងក្នុងផ្នែករដ្ឋ និងផ្នែកឯកជន ២. ការការពារបរិស្ថានប្រកបដោយចិរភាព ៣. ការការពារ និងការប្រយុទ្ធនឹងជំងឺរបេង និង ៣. ការបណ្ដុះបណ្ដាលផ្នែកសហគ្រិនភាពដល់យុវជនកម្ពុជា ជាដើម។ ចំពោះបេសកកម្មស្រាវជ្រាវ និងជីករុករកអដ្ឋិធាតុជនជាតិអាមេរិកបាត់ខ្លួន (POW/MIA) សម្តេចធិបតី ហ៊ុន ម៉ាណែត បានជម្រាបជូនលោកឯកអគ្គរដ្ឋទូត ថា រាជរដ្ឋាភិបាលកម្ពុជា បានយកចិត្តទុកដាក់ខ្ពស់ និងបានរៀបចំកែសម្រួលសមាសភាព នៃគណៈកម្មការ POW/MIA ក្នុងការសម្របសម្រួល និងសហការជាមួយគ្រប់ភាគីពាក់ព័ន្ធទាំងអស់ ដើម្បីអនុវត្តបេសកកម្មស្រាវជ្រាវ និងជីករុករកអដ្ឋិធាតុជនជាតិអាមេរិកបាត់ខ្លួន ឲ្យបានរហ័សទាន់ពេល និងជោគជ័យ ប្រកបដោយកាយវិការនៃការគោរព និង ស្រឡាញ់ ចំពោះក្រុមគ្រួសារនៃយុទ្ធជនដែលបានបាត់ខ្លួន។

គួររម្លឹកថា នៅក្នុងពិធីបើកវេទិកាធុរកិច្ចអាមេរិក-កម្ពុជា ទីក្រុងញូវយ៉ក សហរដ្ឋអាមេរិក កាលពីថ្ងៃទី២២ កញ្ញា ២០២៣ សម្តេច ហ៊ុន ម៉ាណែត សង្ឃឹមថា វិនិយោគិនអាមេរិក នឹងឃើញពីកាលនុវត្តភាពក្នុងការវិនិយោគ និងសិក្សា​បន្ថែមអំពីសក្តានុពលសេដ្ឋកិច្ច និងឱកាសវិនិយោគនៅកម្ពុជា។ បើតាមសម្តេច ហ៊ុន ម៉ាណែត រដ្ឋាភិបាលបន្តផ្តល់ការគាំទ្រយ៉ាងមុតមាំ ដល់កាលានុវត្តភាពសម្រាប់បង្កើត ប្រតិបត្តិការ និងការពង្រឹងធុរកិច្ច ព្រមទាំងដោះស្រាយបញ្ហាប្រឈម ទាំងចាស់ និងថ្មី ដើម្បីជំរុញសន្ទុះ នៃការអភិវឌ្ឍ ឱ្យបានពេញ​លេញ និងក្លាយជាដៃគូគន្លឹះរបស់រដ្ឋាភិបាល ក្នុងលើកកម្ពស់អភិវឌ្ឍ សម្រាប់ប្រយោជន៍ទៅវិញទៅមក។ ជាមួយសុខសន្តិភាពពេញកម្ពុជា រក្សាបានភាពរឹងមាំ សណ្តាប់ធ្នាប់សង្គម សន្តិសុខ សុវត្ថិភាព និងស្ថិរភាពនយោបាយ ដូចអាមេរិកដែរ ដោយកម្ពុជា ជឿជាក់លើសេរីភាព បានចាក់ឫសក្នុងលទ្ធិប្រជាធិបតេយ្យ ដូចមានចែងក្នុង​រដ្ឋធម្ម​នុញ្ញ។ រាជរដ្ឋាភិបាល កម្ពុជា មានការតាំងចិត្តខ្ពស់ ក្នុងការគោរពអនុវត្តតាមលទ្ធិប្រជាធិបតេយ្យសេរីពហុបក្ស និងសិទ្ធិមនុស្ស៕