អ្នកកែច្នៃគ្រាប់ស្វាយចន្ទី ស្នើអនុគ្រោះលើកលែងពន្ធ​​រយៈពេល៥ឆ្នាំដំបូង ចាប់ពីថ្ងៃចុះបញ្ជី​រោងចក្រសហគ្រាស

អ្នកផលិតកែច្នៃគ្រាប់ស្វាយចន្ទី បានលើកឡើងថា សិប្បករខ្មែរ មានប្រាក់តិចតួច ហើយវិនិយោគសិប្បកម្មកែ​ច្នៃគ្រាប់ស្វាយចន្ទី ដែលក្នុងដំណាក់កាលដំបូងពួកគេត្រូវចំណាយសព្វគ្រប់បែបយ៉ាងដែលប្រាក់ទាំងអស់នោះ មួយចំនួនធំបានមកពីខ្ចីបុលធនាគារ យកមកសាងសង់អាគារកែច្នៃ (សហគ្រាស) ទិញសម្ភារៈកែច្នៃ និងការចំណាយ​ផ្សេងៗនៃដំណើរប្រត្តិបត្តិការរបស់សហគ្រាស។ ក្នុងដំណាក់កាលស្ទើរតែ ៥ឆ្នាំដំបូង គឺជាការខាតបង់ទាំងអស់ ដែលប្រឈមនឹងការដួលរលំ បើគ្មានការជ្រោមជ្រែង និងសេចក្ដីអនុគ្រោះពីរាជរដ្ឋាភិបាល។ អ្នកផលិតលើកឡើងថា បើរោងចក្រសហគ្រាសទាំងអស់នេះបិទទ្វារ មិនមែនត្រឹមតែសិប្បកនោះខាតបង់ទេ តែបុគ្គលិកសហគ្រាស​នឹងបាត់​បង់ការងារ ហើយរដ្ឋក៏នឹងខាតបង់ផងដែរ។

អ្នកកែច្នៃគ្រាប់ស្វាយចន្ទី បានស្នើរាជរដ្ឋាភិបាល អនុគ្រោះលើកលែងពន្ធ ក្នុងរយៈពេល៥ឆ្នាំ ដំបូង ចាប់ពីថ្ងៃចុះ​បញ្ជីបង្កើតសិប្បកម្ម រោងចក្រ សហគ្រាសកែច្នៃផលិតផល។ ចំពោះការស្នើលើកលែងពន្ធនោះ រួមមាន លើពន្ធកាត់ទុក ១០ភាគរយ-១៥ភាគរយ, ពន្ធអាករ(VAT) ១០ភាគរយ លើផលិតផលកែច្នៃកសិកម្មគ្រប់ប្រភេទ។ ពន្ធលើប្រាក់​ចំណេញ ១ភាគរយ, ពន្ធនាំចូលលើសម្ភារកែច្នៃផលិតផល និងពន្ធប្រចាំឆ្នាំ លើប្រាក់ចំណេញជាដើម។

កញ្ញា សឿន សុទ្ធនីតា សហស្ថាបនិកសិប្បកម្មកែច្នៃគ្រាប់ស្វាយចន្ទីខេត្តស្ទឹងត្រែង បានលើកឡើងថា ស្វាយចន្ទីរបស់​ប្រទេសកម្ពុជា មានសក្តានុពលខ្លាំងក្លា ផ្ដល់នូវភាពរីកចម្រើនជូនជាតិ ប៉ុន្តែវិស័យនេះ មិនត្រឹមតែបានធ្វើឲ្យបាត់​បង់នូវការបង្កើនតម្លៃបន្ថែមនៃស្វាយចន្ទីតាមរយៈការកែច្នៃក្នុងស្រុកប៉ុណ្ណោះទេ តែបានធ្វើឲ្យកសិករខ្មែរ​រងគ្រោះក្នុង​ការផ្តល់​នូវតម្លៃមិនសមរម្យនៃការលក់គ្រាប់ស្វាយចន្ទីស្រស់របស់​ពួកគាត់ទៅឈ្មួញកណ្ដាលដែល​នាំចេញទៅកែ​ច្នៃនៅបរទេស ដែលធ្វើឲ្យបរទេសគ្រប់គ្រងទីផ្សារកសិកផលកម្ពុជាតាមអំពើចិត្ត។ បើតាមកញ្ញា សឿន សុទ្ធនីតា មានរបាយ​ការណ៍ជាច្រើនបានឲ្យដឹងថា ជារៀងរាល់ឆ្នាំ វៀតណាមបានឈរលំដាប់លេខរៀងទី១ នៅក្នុងពិភពលោក​នៃការនាំចេញ​គ្រាប់ស្វាយចន្ទីដែលកែច្នៃហើយ។ប៉ុន្តែស្ទើរតែ ៨០% នៃការនាំចេញនោះ គឺជាគ្រាប់ស្វាយចន្ទីស្រស់​ដែលវៀតណាម​បានទិញពីកម្ពុជា។ កម្ពុជានាំចេញគ្រាប់ស្វាយចន្ទីស្រស់ស្ទើរតែ ៩៥%។

អ្នកកែច្នៃគ្រាប់ស្វាយចន្ទីរូបនេះ បានគូសបញ្ជាក់ថា ដើម្បីជួយដល់កសិករស្វាយចន្ទីកម្ពុជា គឺមានតែជំរុញឲ្យមាន​ការវិនិយោគលើវិស័យកែច្នៃ ដែលនឹងមិនត្រឹមតែជាទីផ្សារជូនកសិករទេ តែក៏ជាសរសៃឈាមមួយ រួមចំណែក​ជាមួយ​រាជរដ្ឋាភិ បាលកម្ពុជា ក្នុងការបង្កើតនូវផលិតផលជាតិសម្រាប់នាំចេញ និងការបង្កើតនូវការងារ​ជូនពលរដ្ឋក្រី​ក្រតាម​ទីជនបទដាច់ស្រយ៉ាល និងអ្នកនៅក្នុងសង្វាក់ផលិតកម្មដំណាំស្វាយចន្ទី ឲ្យទទួលបានឱ្យកាស​អភិវឌ្ឍន៍​សេដ្ឋកិច្ចគ្រួសារ​ប្រកបដោយនិរន្តន៍ភាព ជំរុញដល់សេដ្ឋកិច្ចកម្ពុជាឲ្យកាន់តែរីកចម្រើន។

ក្រុមសិប្បករកែច្នៃគ្រាប់ស្វាយចន្ទីកម្ពុជា បានលើកឡើងថា នៅកម្ពុជាការលើកលែងពន្ធលើវិស័យកសិកម្ម គឺលើក​លែងតែកសិផលមិនទាន់កែច្នៃ តែបើកែច្នៃហើយមិនលើកលែងពន្ធនោះទេ។ ការធ្វើបែបនេះ មិនអាច​ជួយកសិករ​ខ្មែរបានទេ។ កម្ពុជា ត្រូវពឹងពាក់អ្នកកែច្នៃពីប្រទេសជិតខាងឲ្យក្រឡុក​ទីផ្សារកសិផលក្នុង​ស្រុករបស់ដដែល។

អ្នកកែច្នៃបានសង្កត់ធ្ងន់ដូច្នេះថា« យើងគួរតែគាំទ្រឲ្យមានការកែច្នៃក្នុងស្រុក ដើម្បីបង្កើនតម្លៃបន្ថែមលើកសិផលខ្មែរ នាំទៅកាន់បរទេសនូវផលិតផលសម្រេចមានទង់ជាតិកម្ពុជា ជាជាងលក់តែគ្រាប់ឆៅ ដែលធ្វើឲ្យប្រទេស​យើងខាត​សព្វគ្រប់បែបយ៉ាង បាត់បង់ឱ្យកាសបង្កើតការងារ ជូនពលរដ្ឋខ្លួនឯង និងចំណូលផ្សេងៗទៀត ដែលប្រសើរជាង​លក់កសិផលឆៅមិនទាន់កែច្នៃ (លក់ក្នុងតម្លៃថោកជាង បានរួចពន្ធទៀត)៕