មេដឹកនាំកម្ពុជា-ថៃជួបគ្នា ដើម្បីដោះស្រាយបញ្ហាព្រំដែន អំពើឆបោកតាមទូរស័ព្ទ និងការជួញដូរមនុស្ស

លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុថៃ បានដឹកនាំគណៈប្រតិភូជាន់ខ្ពស់ថៃមកបំពេញទស្សនកិច្ចជាផ្លូវការនៅកម្ពុជា ទទួលការស្វាគមន៍យ៉ាងកក់ក្តៅ និងបានចូលរួមកិច្ចពិភាក្សាទ្វេភាគីជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។ នេះបើយោងតាមការចុះផ្សាយរបស់សារព័ត៌មានថៃ THE STANDARD។

អ្នកនាំពាក្យរដ្ឋាភិបាលថៃ លោក ឆៃ វ៉ាត់ឆារ៉ុង បាននិយាយថា នាយករដ្ឋមន្ត្រី នៃប្រទេសទាំងពីរបានសម្តែងការអបអរសាទរគ្នាទៅវិញទៅមកក្នុងឱកាសដែលចូលកាន់តំណែងជានាយករដ្ឋមន្ត្រីថ្មីដូចគ្នា និងក្នុងរយៈពេលដូចគ្នា និងមានគោលដៅជំរុញការអភិវឌ្ឍប្រទេសក្នុងទិសដៅដូចគ្នា ដោយបាន​សង្កត់ធ្ងន់​លើ​ទំនាក់ទំនង​មិត្តភាពយ៉ាង​ជិតស្និទ្ធ​រវាង​ប្រទេស​ទាំងពីរ​ ហើយក៏ជាពេលវេលាសមស្របដើម្បីបើកទំព័រសករាជថ្មីនៃទំនាក់ទំនង ដោយនាយករដ្ឋមន្ត្រីនៃប្រទេសទាំងពីរបានប្រកាសពីការពង្រឹងទំនាក់ទំនងភាពជាដៃគូយុទ្ធសាស្ត្រ។ ទន្ទឹមគ្នានេះ ​លោកនាយក​រដ្ឋមន្ត្រី​ថៃ ក៏បាន​អញ្ជើញលោក​នាយក​រដ្ឋមន្ត្រី​កម្ពុជា​ទៅបំពេញ​ទស្សនកិច្ចផ្លូវការ​នៅ​ប្រទេស​ថៃ​ផង​ដែរ​។

លោក ឆៃ វ៉ាត់ឆារ៉ុង បានបន្តថា ចំពោះកិច្ចសហប្រតិបត្តិការផ្នែកសេដ្ឋកិច្ច នាយករដ្ឋមន្ត្រីនៃប្រទេសទាំងពីរបានឯកភាពគ្នាជំរុញកិច្ចសហប្រតិបត្តិការឱ្យកាន់តែខ្លាំងឡើងថែមទៀត ទាំងវិស័យពាណិជ្ជកម្ម ទេសចរណ៍ ការវិនិយោគ ការអភិវឌ្ឍតំបន់ព្រំដែន និងវិស័យសេដ្ឋកិច្ចថ្មីៗ ជាពិសេស គឺការរួមសហការគ្នាសម្របសម្រួល និងបង្កើនទំហំពាណិជ្ជកម្ម ដើម្បីឱ្យសម្រេចបាននូវគោលដៅ ១៥ពាន់លានដុល្លារអាមេរិក នៅឆ្នាំ២០២៥ រួមទាំងជំរុញការដឹកជញ្ជូនឆ្លងកាត់ព្រំដែនផងដែរ ដោយ​ពន្លឿន​ការ​សម្ពោធដាក់ឱ្យប្រើប្រាស់នូវ​ស្ពាន​មិត្តភាព​នៅភូមិ​ណង​អៀន​-​ស្ទឹង​បត់ ការបង្កើតបណ្តាញអាជីវកម្ម ការលើកកំពស់ចំណុចឆ្លងកាត់ព្រំដែន និងរួមគ្នាក្នុងសេដ្ឋកិច្ចឌីជីថល និងពណ៌បៃតង។

ចំពោះ​វិស័យ​ទេសចរណ៍ មេដឹកនាំទាំងពីរ​បាន​ស្នើឱ្យលើកកំពស់​វិស័យ​ទេសចរណ៍ និង​បង្កើន​កិច្ច​សហប្រតិបត្តិការ​ក្នុង​វិស័យ​ទេសចរណ៍​វេជ្ជសាស្ត្រ និង​សុខភាព ព្រមទាំងស្នើ​កម្ពុជា​អនុញ្ញាតឱ្យប្រើប្រាស់ប័ណ្ណឆ្លងដែនបណ្ដោះ​អាសន្ន(Border Pass) ដើម្បីលើកកំពស់វិស័យទេសចរណ៍នៅតាមព្រំដែន។

ចំពោះការវិនិយោគ មេដឹកនាំទាំងពីរបានឯកភាពគ្នាក្នុងការគាំទ្រការវិនិយោគបន្ថែមទៀតរវាងគ្នាទៅវិញទៅមក រួមទាំងការភ្ជាប់ខ្សែសង្វាក់ផ្គត់ផ្គង់ឱ្យកាន់តែជិតស្និទ្ធថែមទៀត រួមទាំងការលើកទឹកចិត្តឱ្យមានការផ្គូផ្គងអាជីវកម្មបន្ថែមទៀត ជាពិសេសសហគ្រាសធុនតូច និងមធ្យម និងសហគ្រិនជំនាន់ថ្មី។

ចំពោះផ្នែកសន្តិសុខ មេដឹកនាំទាំងពីរបានស្នើឱ្យកម្ពុជារៀបចំកិច្ចប្រជុំគណៈកម្មាធិការព្រំដែនរួម (JBC) នៅពេលបន្ទាប់ ដើម្បីឆ្ពោះទៅមុខជាមួយនឹងការធ្វើឱ្យប្រសើរឡើងនូវចំណុចឆ្លងកាត់ព្រំដែន ដើម្បីបង្កើនទំហំពាណិជ្ជកម្មតាមព្រំដែន និងបាន​ស្នើឱ្យ​ប្រទេស​ទាំង​ពីរ​ពន្លឿន​ការ​បោស​សម្អាត​មីន​នៅ​តាម​តំបន់​ព្រំដែន ដើម្បីសុវត្ថិភាពប្រជាជន និងត្រួសត្រាយផ្លូវសម្រាប់ការអភិវឌ្ឍន៍សេដ្ឋកិច្ចនៅតំបន់ព្រំដែន ដោយលោក​នាយក​រដ្ឋមន្ត្រី​បានសង្កត់ធ្ងន់​ថា ក្រុមការងារភាគីទាំងពីរគួរតែរួមគ្នាតាមដានលទ្ធផល និងនាំយកការពិភាក្សារវាងមេដឹកនាំទាំងពីរនៅថ្ងៃនេះ ដើម្បី​ចាត់​វិធាន​ការ​ឱ្យ​បាន​លទ្ធផល​ជាក់​ស្តែង ហើយនាំយកមករាយការណ៍ជូននាយករដ្ឋមន្ត្រីវិញ។

ទន្ទឹមគ្នានេះ មេដឹកនាំទាំងពីរគាំទ្រឱ្យមានការផ្លាស់ប្តូរទស្សនកិច្ចគ្នាទៅវិញទៅមកជាទៀងទាត់រវាងអង្គភាពសន្តិសុខគ្រប់លំដាប់ថ្នាក់ រួមទាំងឧក្រិដ្ឋកម្មឆ្លងដែន ជាពិសេសនៅតំបន់ព្រំដែន ព្រមទាំងសង្កត់ធ្ងន់លើការអនុវត្តការងារនិងកិច្ចសហប្រតិបត្តិការយ៉ាងជិតស្និទ្ធ ដើម្បីរួមគ្នាបង្ក្រាបក្រុមឆបោកតាមទូរស័ព្ទ(Call Center)។

មេដឹកនាំទាំងពីរ ក៏បានសង្កត់ធ្ងន់ទៅលើភាពជាដៃគូអភិវឌ្ឍន៍ដ៏រឹងមាំរវាងប្រទេសទាំងពីរ ដែលរួមបញ្ចូលទាំងវិស័យអប់រំ ការអភិវឌ្ឍធនធានមនុស្ស និងការអភិវឌ្ឍប្រកបដោយចីរភាព ដោយ​បាន​ត្រៀម​ខ្លួន​ជា​ស្រេច​ដើម្បី​ធ្វើ​ការ ​និង​សហការ​យ៉ាង​ជិត​ស្និទ្ធ​ជាមួយ​កម្ពុជា ដើម្បីជួយគ្នាក្នុងការតាមដានព័ត៌មានក្លែងក្លាយ (Fake News) ដែលអាចបង្កការភាន់ច្រលំចំពោះសាធារណជន ដើម្បីចាត់វិធានការទប់ស្កាត់ឱ្យបានទាន់ពេលវេលា៕

ប្រភព ៖ THE STANDARD