នាយករដ្ឋមន្ត្រីកម្ពុជា-ថៃ ជំរុញបន្ថែមទៀតនូវលំហូរភ្ញៀវទេសចររវាងប្រទេសទាំងពីរ និងមកពីប្រទេសទីបី

សម្ដេចមហាបវរធិបតី​ ហ៊ុន​ ម៉ាណែត​ នាយករដ្ឋមន្ត្រី​នៃកម្ពុជា និងលោក សេដ្ឋ ថាវីស៊ីន នាយករដ្ឋមន្ត្រី​ថៃ បានជំរុញបន្ថែមទៀត នូវលំហូរភ្ញៀវទេសចររវាងប្រទេសទាំងពីរ និងមកពីប្រទេសទីបី ស្របតាមពាក្យស្លោក “ព្រះរាជាណាចក្រពីរ គោលដៅតែមួយ”។ ការជំរុញនេះ គ្រាដែលសម្ដេចធិបតី ហ៊ុន ម៉ាណែត បានជួបពិភាក្សាការងារជាមួយលោក សេដ្ឋា ថាវីស៊ីន ក្នុងដំណើរបំពេញទស្សនកិច្ចនៅកម្ពុជា កាលពីថ្ងៃទី ២៨ ខែកញ្ញា ឆ្នាំ ២០២៣។​

ទស្សនកិច្ចរបស់លោក សេដ្ឋា ថាវីស៊ីន នាពេលនេះ មានគោលបំណងពង្រឹងបន្ថែមទៀត នូវទំនាក់ទំនងមិត្តភាពជាប្រពៃណី ភាពជាអ្នកជិតខាងល្អ និងកិច្ចសហប្រតិបត្តិការពហុវិស័យ រវាងប្រទេសទាំងពីរ ក្រោមស្មារតី “ពង្រឹងភាពជាដៃគូ ដើម្បីសន្តិភាព និងវិបុលភាព”។

សេចក្ដីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា ចំពោះវិស័យទេសចរណ៍ នាយករដ្ឋមន្ត្រីកម្ពុជា-ថៃ បានជំរុញឲ្យអាជ្ញាធរពាក់ព័ន្ធអនុវត្តឲ្យមានប្រសិទ្ធភាព នូវផែនការសកម្មភាពរួម ស្ដីពី កិច្ចសហប្រតិបត្តិការទេសចរណ៍ ឆ្នាំ ២០២៣-២០២៥ និងជំរុញបន្ថែមទៀតនូវលំហូរភ្ញៀវទេសចររវាងប្រទេសទាំងពីរ និងមកពីប្រទេសទីបី ស្របតាមពាក្យស្លោក “ព្រះរាជាណាចក្រពីរ គោលដៅតែមួយ”។

ក្នុងនោះដែរនាយករដ្ឋមន្ត្រីថៃ លោក សេដ្ឋ ថាវីស៊ីន បានគាំទ្រសំណើរបស់កម្ពុជា សម្រាប់ការបង្កើនជើងហោះហើរ ជាពិសេសផ្តោតលើទី ក្រុងធំៗលំដាប់ទីពីរ។ ក្នុងជំនួបនេះដែរ សម្តេចធិបតី ហ៊ុន ម៉ាណែត បានទទួលយកដោយក្តីសោមនស្សរីករាយ នូវការអញ្ជើញទៅបំពេញទស្សនកិច្ចផ្លូវការ នៅប្រទេសថៃរបស់លោក សេដ្ឋា ថាវីស៊ីន នៅពេលវេលាសមស្របណាមួយនាពេលខាងមុខ៕