ជំនន់ទឹកភ្លៀងហូរច្រោះដាច់ផ្លូវមួយចំនួនបង្កការលំបាកដល់ពលររដ្ឋក្រុងពោធិ៍សាត់​

រដ្ឋបាលខេត្តពោធិ៍សាត់បានឱ្យដឹងថា ទឹកស្ទឹងពោធិ៍សាត់កំពុងជន់ជោរវាយលុកក្រុងពោធិ៍សាត់ និងស្រុកកណ្ដៀង។ នៅត្រើយខាងលិចស្ទឹង ទឹកហូរច្រោះកាត់ បានដាច់ផ្លូវមួយចំនួន។

លោក កែវ រតន: រដ្ឋមន្ត្រីក្រសួងរ៉ែ និងថាមពល និងលោក ខូយ រីដា អភិបាលខេត្តពោធិ៍សាត់ កំពុងដឹកនាំមន្រ្តី និងកងកម្លាំងប្រដាប់អាវុធ ចុះអន្តរាគមន៍យ៉ាងសស្រាក់សស្រាំតាំងពីទៀបភ្លឺមកម៉្លេះ។

គ្រោះធម្មជាតិនេះ បានកើតឡើងតាំងពីទៀបភ្លឺយប់ថ្ងៃទី ២៩ ខែកញ្ញា ឆ្នាំ២០២៣ គឺបន្ទាប់ពីមានភ្លៀងធ្លាក់យ៉ាងខ្លាំងឥតស្រាកស្រាន្តពីតំបន់ជួរភ្នំក្រវាញក្នុងស្រុកវាលវែងកាលពីថ្ងៃទី ២៧ និង២៨ ខែកញ្ញា ឆ្នាំ២០២៣។

រដ្ឋបាលខេត្តពោធិ៍សាត់រំពឹងថា នៅរសៀលថ្ងៃនេះ ទឹកនឹងអាចស្រកចុះទៅវិញ បើសិនជាពុំមានភ្លៀងខ្លាំងនៅស្រុកវាលវែងបន្តទៀតទេ៕