ម្ចាស់ដេកលង់លក់មិនដឹងទឹកស្ទឹងសង្កែឡើងលិចក្រោលគោ

គោចំនួន ៣ ក្បាល នៅក្នុងចំណោមគោជាង ៣០ ក្បាលបានងាប់នៅក្នុងក្រោលជាប់មាត់ស្ទឹងសង្កែ ខណៈដែលទឹកស្ទឹងហក់ឡើងម្ចាស់ដេកលង់លក់អត់បានដឹង។

យោងតាមរបាយការណ៍របស់សមត្ថកិច្ចបានបញ្ជាក់ថា ហេតុការណ៍នេះបានកើតឡើងកាលពីថ្ងៃទី ២៩ ខែកញ្ញា ឆ្នាំ ២០២៣ នៅចំណុចអន្លង់ក្របី ស្ថិតក្នុងភូមិបោះដូង ឃុំបាសាក់ ស្រុករុក្ខគីរី ខេត្តបាត់ដំបង។

របាយការណ៍បានបន្តថា ម្ចាស់គោមានឈ្មោះ ជា ហាន ភេទប្រុស អាយុ ៤៨ ឆ្នាំ រស់នៅភូមិអូរតាប៉ាង ឃុំអូរតាប៉ាង ស្រុកបាកាន ខេត្តពោធិ៍សាត់ បានមកស្នាក់នៅចំណុចខាងលើដើម្បីធ្វើចម្ការផង និងចិញ្ចឹមគោផង សរុបមានចំនួន ៣៣ ក្បាល។

នៅល្ងាចមុនថ្ងៃកើតហេតុម្ចាស់គោបានកៀងគោបញ្ចូលក្រោលដែលស្ថិតនៅមាត់ស្ទឹងខាងក្រោមដោយមិនបានចាប់អារម្មណ៍ថា ទឹកស្ទឹងអាចឡើងនោះទេ បើទោះបីជាមានភ្លៀងធ្លាក់ជាប់ៗគ្នារយៈពេលច្រើនថ្ងៃមកហើយក៏ដោយ លុះនៅពេល​ទៀបភ្លឺម្ចាស់គោបានចុះទៅមើលគោក៏មានអារម្មណ៍តក់ស្លុតដោយសារក្រោលគោត្រូវទឹកជំនន់លិចអស់ ទើបលោក​ប្រញាប់ប្រញាប់ដឹកគោ បញ្ចេញពីក្រោល ទីបំផុតក៏ប្រទះឃើញគោចំនួន ៣ ក្បាលដេកងាប់នៅក្នុងក្រោល​ដោយសារ​ជាប់ចំណង និងទឹកលិចជ្រៅផង។ ម្ចាស់ទទួលស្គាល់ថា នេះគឺជាការធ្វេសប្រហែសមួយដែលលោកស្មានមិនដល់៕

អត្ថបទ : សោ និយមរ័ត្ន