ពលរដ្ឋរងគ្រោះដោយសារជំនន់ទឹកភ្លៀង ក្នុងស្រុកកណ្តៀង និងសង្កាត់២ ក្រុងពោធិ៍សាត់ ទទួលបានអន្តរាគមន៍សង្គ្រោះ

លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំក្រុមការងារបន្តចុះពិនិត្យ និងជួយអន្តរាគមន៍ដល់ប្រជាពលរដ្ឋ ដែលរងគ្រោះដោយសារទឹកជំនន់ទឹកភ្លៀង ក្នុងស្រុកកណ្តៀង និងក្រុងពោធិ៍សាត់ ដែលរួមមាន សង្កាត់លលកស និងសង្កាត់រលាប មកទីទួលមានសុវត្ថិភាព។ នេះបើតាមការផ្សព្វផ្សាយ ពីប្រភពរដ្ឋបាលខេត្តពោធិ៍សាត់ នៅរសៀលនេះ។

ក្នុងបេសកកម្មរចុះត្រួតពិនិត្យ និងអន្តាគមន៍នេះដែរ លោក ខូយ រីដា មានប្រសាន៍ថា ខណៈពេលនេះ នៅមិនទាន់អាចធ្វើការវាយតម្លៃពីការខូចខាតបាននៅឡើយទេ ប៉ុន្តែក្រុងពោធិ៍សាត់ គឺរងគ្រោះដោយ​សារ​ជំនន់ទឹកភ្លៀងធ្ងន់ធ្ងរជាងគេ។ ឯកសិកម្មស្រូវរបស់បងប្អូនប្រជាពលរដ្ឋ នៅប៉ែកខាងវាលរលាប ក៏ត្រូវលិចលង់ផុតចុងស្រូវហើយដែរ។

ប្រភពរដ្ឋបាលខេត្តពោធិ៍សាត់ បញ្ជាក់ថា បើទោះបីជាស្ថានភាពទឹកនៅព្រឹកថ្ងៃទី៣០ ខែកញ្ញានេះ ហាក់នៅនឹងនៅឡើយ ប៉ុន្តែទឹកស្ទឹងពោធិ៍សាត់ កំពុងហៀរហូរលើផ្លូវថ្នល់ និងតាមលំនៅដ្ឋានរបស់ប្រជាពលរដ្ឋ ហើយក៏អាចឡើងបន្ថែមទៀតផងដែរ ប្រសិនជាមានភ្លៀងធ្លាក់។

អាស្រ័យហេតុនេះ រដ្ឋបាលខេត្ត ស្នើឱ្យប្រជាពលរដ្ឋបន្តការប្រុងប្រយ័ត្នទាំងអស់គ្នា និងថែរក្សាសុខភាព តាមរយៈហូបស្អាត ផឹកស្អាត និងរស់នៅស្អាត។ បើមានកិច្ចការចាំបាច់ផ្សេងៗ អាចទាក់ទងតាមរយៈលេខទំនាក់ទំនង ០៩២ ៧២៨ ០៨៧; ០៩៦ ២៣៩ ៥០២០; ០៩៧ ៨៧ ៣៨ ១៦៧ ៕