រដ្ឋមន្ត្រីបរិស្ថាន៖ មួយថ្ងៃកម្ពុជាចោលកាកសំណល់​ថង់ផ្លាស្ទិក ២៨០ តោន

ក្រសួងបរិស្ថានសហការជាមួយរដ្ឋបាលខេត្តកំពង់ឆ្នាំងនៅព្រឹកថ្ងៃទី ៣០ ខែកញ្ញា ឆ្នាំ២០២៣ រៀបចំពិធីបើកយុទ្ធនាការកាត់បន្ថយការប្រើប្រាស់ផ្លាស្ទិក។

លោក អ៊ុក រ៉ាប៊ុន ទេសរដ្ឋមន្ត្រី និងជាប្រធានក្រុមប្រឹក្សាស្ដារ អភិវឌ្ឍន៍វិស័យកសិកម្ម និងជនបទបានលើកឡើងថា តាមការសិក្សាស្រាវជ្រាវនៅក្នុងពិភពលោកត្រូវបានគេរកឃើញមានការចាក់ចោលនូវកាកសំណល់ជាង ៣០០ លានតោនក្នុងមួយឆ្នាំៗ។

កាកសំណល់ទាំងអស់នោះត្រូវបានចោលលើដីនិងចោលនៅក្នុងទឹក ដែលកៅសិបមួយភាគរយមិនបានកែច្នៃប្រើប្រាស់ឡើងវិញឡើយ។ ក្នុងនោះកាកសំណល់គេរកឃើញបានចាក់ចោលចូលសមុទ្រមានចំនួន ១៤លានតោនក្នុងមួយឆ្នាំៗ និង កាកសំណល់ទាំងអស់នោះវាអាចរលាយទៅវិញក្នុងរយៈពេល៥០០ ឆ្នាំនិងខ្លះ ១០០០ឆ្នាំ។

ដោយឡែកសម្រាប់ប្រទេសកម្ពុជាការចាក់ចោលកាកសំណល់ត្រូវបានរាយកាយជាមួយនឹងសំរាមដែលខ្លះវានឹងចូល​​​ទៅក្នុងទឹក ដែលយើងមិនបានកែច្នៃយកមកប្រើប្រាស់ឡើងវិញ។

នៅក្នុងយុទ្ធនាការកាត់បន្ថយការប្រើប្រាស់នេះ មានសាលារៀនទូទាំងប្រទេសជាង ៣ ម៉ឺនសាលា និងមានសិស្សជាង៣ លាន ៣ សែននាក់បានស្ម័គ្រចិត្តសហការជាមួយក្រសួងបរិស្ថានថាថ្ងៃនេះខ្ញុំមិនប្រើមិនប្រើប្រាស់ប្លាស្ទិកទេ។

លោកបានអំពាវនាវដល់ប្រជាពលរដ្ឋនៅតាមបណ្ដាខេត្ត ក្រុង និងរាជធានីទាំងអស់សូមធ្វើខ្លួនជាពលរដ្ឋល្អ មានកិត្តិយសថ្លៃថ្នូរដើម្បូកម្ពុជាមានបរិស្ថានល្អ ដែលផ្ដួចផ្ដើមចេញពីយើងម្នាក់ៗ។

លោក អ៊ាង សុផល្លែត រដ្ឋមន្ត្រីក្រសួង បរិស្ថាន បានថ្លែងថា តាមការសិក្សាស្រាវ ជ្រាវនៅក្នុងប្រទេសកម្ពុជាមួយថ្ងៃៗមានកាកសំណល់ថង់ប្លាស្ទិកចំនួន ៥៥ លានថង់ ដែលមានទម្ងន់ស្មើនឹង ២៨០តោន។

សម្រាប់ខេត្តកំពង់ឆ្នាំងថ្ងៃនេះមានសាលាចំនួន ៣៦៩ សាលា និងុឮ សិស្សចំនួន ១១៦ពាន់ ១៦៨នាក់ គ្រូ ៣១៤៥ នាក់បានស្ម័គ្រចិត្តថា មិនប្រើប្រាស់ថង់ផ្លាស្ទិកទេក្នុង១ថ្ងៃ ២ ថ្ងៃ ៣ និង៤ថ្ងៃ ក្នុងមួយអាទិត្យមិនប្រើប្រាស់ថង់ផ្លាស្ទិក។

ដូច្នេះក្នុងពិធីបើកយុទ្ធនាការកាត់បន្ថយការប្រើប្រាស់ផ្លាស្ទិចចាប់ពីថ្ងៃទី៣០ ខែកញ្ញាឆ្នាំ២០២៣ នេះតទៅ ត្រូវមានការចូលរួមពីប្រជាពលរដ្ឋគ្រប់ៗគ្នា ទើបប្រទេសកម្ពុជាយើងអាចកាត់បន្ថយការប្រើប្រាស់ប្លាស្ទិកបានដោយជោគជ័យ។

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងក៏បានថ្លែងថា ខេត្តកំពង់ឆ្នាំងមានកាកសំណល់ក្នុងមួយថ្ងៃចំនួន៥៤តោនខណៈរដ្ឋបាលខេត្តបានទទួលរថយន្តដឹកសម្រាមចំនួន ៤ គ្រឿង រ៉ឺម៉ក ម៉ូតូដឹកសំរាម ៣ គ្រឿ ងនិងឡដតុសម្រាមមួយកន្លែងពីក្រសួងបរិស្ថាន។

ចំពោះការបើកយុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទថ្ងៃនេះខ្ញុំមិនប្រើប្រាស់ថង់ផ្លាស្ទិចទេ នៅក្នុងថ្ងៃទី ៣០ខែ កញ្ញាឆ្នាំ២០២៣នេះ រដ្ឋបាលក្រុងស្រុកទូខេត្ត និងតាមគ្រឹះស្ថានសិក្សារដ្ឋ និងឯកជនមួយចំនួនធំក៏បានធ្វើពិធីប្រកាសបើកយុទ្ធនាការកាត់បន្ថយផ្លាស្ទិកនេះទាំងអស់គ្នាក្នុងយុទ្ធនាការកាត់បន្ថយការប្រើប្រាស់ប្លាស្ទិកដូចទីនេះផងដែរ៕

អត្ថបទ៖ ឈៀងថារិទ្ធ