ធនាគារជាតិបញ្ចេញប្រាក់ ៤០លានដុល្លារ បន្ថែម ដើម្បីលើកកម្ពស់តម្លៃប្រាក់រៀល

ធនាគារជាតិនៃកម្ពុជា (NBC) បានបញ្ចេញទឹកប្រាក់ចំនួន ៤០ លានដុល្លារអាមេរិកបន្ថែមទៀត ដើម្បីឱ្យគ្រឹះស្ថាន ធនាគារ មីក្រូហិរញ្ញវត្ថុ និងអាជីវករប្តូរប្រាក់ដែលមានអាជ្ញាបណ្ណទាំងអស់ ដេញថ្លៃ។

យោងតាមសេចក្ដីប្រកាសរបស់ធនាគារជាតិនៃកម្ពុជាកាលពីចុងខែ កញ្ញា បានឱ្យដឹងថា ការបញ្ចេញទឹកប្រាក់ដាក់ ឱ្យដេញថ្លៃប្រាក់ដុល្លារអាមេរិកនេះ ធ្វើតាមកាលបរិច្ឆេទរួមមាន៖ ថ្ងៃពុធ ទី០៤ ខែតុលា ឆ្នាំ២០២៣ ចំនួន ១០ លាន ដុល្លារអាមេរិក, ថ្ងៃសុក ទី០៦ ខែតុលា ឆ្នាំ២០២៣ ចំនួន ១០ លានដុល្លារអាមេរិក, ថ្ងៃអង្គារ ទី១០ ខែតុលា ឆ្នាំ២០២៣ ចំនួន ១០ លានដុល្លារអាមេរិក និងថៃ្ងព្រហស្បតិ៍ ទី១២ ខែតុលា ឆ្នាំ២០២៣ ចំនួន ១០ លានដុល្លារអាមេរិក ។

សូមរំលឹកថា កាលពីពេលកន្លងទៅ ធនាគារជាតិនៃកម្ពុជា បានដាក់ឱ្យដេញថ្លៃទឹកប្រាក់ចំនួន ៥០ លានដុល្លារអាមេរិក ម្ដងរួម មកហើយ។ បើតាមធនាគារជាតិ ការបញ្ចេញទឹកប្រាក់ដាក់ឱ្យដេញថ្លៃនេះ ដើម្បីត្រៀមចាត់វិធានការរក្សាស្ថិរភាព អត្រាប្ដូរប្រាក់ក្នុងរយៈពេលប៉ុន្មានថ្ងៃចុងក្រោយនេះ ដោយអត្រាប្តូរប្រាក់ជារៀលធៀបនឹងដុល្លារអាមេរិក បានកើនឡើងគួរ ឱ្យកត់សម្គាល់ ដែលមូលហេតុចម្បងនោះ គឺដោយសារ​កត្តារដូវកាល និងសម្ពាធនៃការឡើងថ្លៃនៃប្រាក់ដុល្លារអាមេរិក នៅលើទីផ្សារអន្តរជាតិ។

ចំពោះកត្តារដូវកាល កំណើន​តម្រូវការប្រាក់រៀលបានថយល្បឿន នៅក្នុងដំណាក់កាលនៃការបង្កបង្កើនផលកសិកម្ម និងរដូវកាល ដែលសកម្មភាព​វិស័យទេសចរណ៍មិនមានភាពមមាញឹក (low season)។

ចំណែកប្រាក់ដុល្លារអាមេរិក ជារួមបានបន្តឡើងថ្លៃធៀប នឹងរូបិយប័ណ្ណផ្សេងៗទៀត លើពិភពលោក ក្រោយពីធនាគារ​កណ្ដាលអាមេរិកបន្តដំឡើងអត្រាការប្រាក់គោល ដែលទាក់ទាញមូលធនឱ្យហូរចូលទៅសហរដ្ឋអាមេរិក និងបង្កើន​តម្រូវការប្រាក់ដុល្លារអាមេរិកលើទីផ្សារអន្តរជាតិ៕

អត្ថបទ៖ ផល ធារិត