ព័ត៌មានជាតិ

មកស្គាល់ភូមិសាស្ត្រខេត្តកោះកុង របស់ព្រះរាជាណាចក្រកម្ពុជា

បានផុស

៤ years មុន

នៅ

ថ្ងៃព្រហស្បតិ៍ ៤ កុម្ភៈ ២០២១

ដោយ

ខេត្ដកោះកុង ជាខេត្ដមួយស្ថិតនៅទិសនិរតី មានចម្ងាយពីរាជធានីភ្នំពេញ២៩០គីឡូម៉ែត្រ មានព្រំប្រ ទល់ខាងកើតជាប់នឹងខេត្ដព្រះសីហនុ និងខេត្ដកំពង់ស្ពឺខាងលិច និងខាងត្បូងជាប់នឹងឈូងសមុទ្រ នៃព្រះរាជាណាចក្រថៃឡង់ដ៍ (មួយផ្នែកនៃខេត្តត្រាត) ខាងជើងជាប់នឹងខេត្ដពោធិ៍សាត់។

ខេត្តកោះកុង ស្ថិតក្នុងតំបន់ឆ្នេរសមុទ្រនៃព្រះរាជាណាចក្រកម្ពុជា សណ្ឋានដីមានលក្ខណៈជាភ្នំខ្ពង់ រាប វាលរាប និងឆ្នេរសមុទ្រ ដែលមានប្រវែងប្រហែល២៣៧គីឡូម៉ែត្រ និងមានកោះចំនួន៣៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខេត្តកោះកុងមានផ្ទៃដីសរុប១០.០៤៥,៥៨ គីឡូម៉ែត្រការ៉េ (ដប់ពាន់ សែសិបប្រាំ ក្បៀសហាសិបប្រាំបីគីឡូម៉ែត្រការ៉េ) ចែកចេញជាក្រុង១ មាន០៣សង្កាត់ ៦ស្រុក មាន២៦ឃុំ និងមានភូមិសរុបចំនួន១១៩ភូមិ។ មានប្រជាជនសរុប១៣៦.៣២០នាក់ ស្រី៦៧.៩៨៤នាក់ (មួយរយសាមសិបប្រាំមួយពាន់បីរយម្ភៃនាក់ ស្រី ហុកសិបប្រាំពីរពាន់ ប្រាំបួនរយប៉ែតសិបបួននាក់) មានដង់ស៊ីតេប្រ ជាជន១២នាក់ ក្នុងមួយគីឡូម៉ែត្រការ៉េ។

ប្រជាជនប្រមាណ៥៥,២០ភាគរយ ជាកសិកររស់នៅពឹងផ្អែកលើវិស័យកសិកម្ម និងនេសាទ ដែល ជាវិស័យចម្បងក្នុងការទ្រទ្រង់ជីវភាពរស់នៅរបស់ប្រជាពលរដ្ឋក្នុងខេត្ដ។ ក្រៅពីវិស័យកសិកម្ម និងនេសាទ ក៏មានវិស័យផ្សេងៗទៀត ដូចជាវិស័យឧស្សាហកម្ម០,៣០ភាគរយ និងវិស័យសេវាកម្មប្រមាណ៤៤,៦០ភាគរយ ដែលជាមូលដ្ឋានបង្កើតការងារជូនប្រជាពលរដ្ឋ។ វិស័យសេដ្ឋកិច្ចសំ ខាន់ៗទាំងបីរួមមាន វិស័យកសិកម្ម វិស័យឧស្សាហកម្ម និងវិស័យសេវាកម្ម បានជំរុញដល់សេដ្ឋកិច្ចរបស់ខេត្តទាំងមូលមានអត្រាកំណើនគួរឲ្យកត់សំគាល់។

តាមទិន្នន័យមូលដ្ឋានឃុំសង្កាត់ បានបង្ហាញថា អត្រាភាពក្រីក្រខេត្តកោះកុងមានការថយចុះ បើប្រៀបធៀបពីឆ្នាំ២០១៤ ដល់ឆ្នាំ២០១៨ គឺមានការថយចុះ ពី២៨,៧ ភាគរយ មក១៣,១ ភាគរយ ពោលគឺធ្លាក់ចុះបាន១៣,៦ ភាគរយ និងបានធ្លាក់ចុះមកនៅត្រឹម៧,៤ ភាគរយ នៅឆ្នាំ២០២០ ដែលនេះជាវឌ្ឍនភាពនៃការរីកចម្រើនគួជាទីមោទនៈ។ ជាក់ស្តែងតាមរយៈវិទ្យាស្ថានជាតិស្ថិតិនៃក្រសួងផែនការនៅឆ្នាំ២០១៨ បានបង្ហាញថាផលិតផលក្នុងស្រុកសរុប នៃសេដ្ឋកិច្ចខេត្តកោះកុងទាំងមូលមានតម្លៃប្រមាណ៩៤៦.៦៣៣ លានរៀល (ប្រាំបួនរយ សែសិបប្រាំមួយពាន់ ប្រាំមួយរយសាមសិបបីលានរៀល) ឬស្មើនឹង២៣៤លានដុល្លារសហរដ្ឋអាមេរិក បើធៀបទៅនឹងសេដ្ឋកិច្ចជាតិមានអត្រាស្មើនឹង០.៩ភាគរយ នៅឆ្នាំ២០១៨។ គិតជាចំណូលសម្រាប់មនុស្សម្នាក់ៗ គឺស្មើនឹង១.៤១៩ដុល្លា ឆ្នាំ២០១៧ និងឆ្នាំ២០១៨ ស្មើនឹង ១.៥៤៣ដុល្លារ៕

អត្ថបទ ៖ កោះកែវ