ព័ត៌មានជាតិ

ព្រឹកស្អែកនេះ សម្ដេចនាយករដ្ឋមន្ត្រី ចុះជួបកម្មកររោងចក្រ ជាលើកទី៥

បានផុស

២ years មុន

នៅ

ថ្ងៃចន្ទ ២ តុលា ២០២៣

ដោយ

នាវេលាព្រឹកថ្ងៃស្អែក ទី០៣ ខែតុលា ឆ្នាំ២០២៣ សម្ដេចធិបតី ហ៊ុន ម៉ាណែត នឹងអញ្ជើញចុះជួបកម្មករ កម្មការនី រោងចក្រសហគ្រាស ជាលើកទី៥ បន្ទាប់ពីចូលកាន់តំណែងជានាយករដ្ឋមន្ត្រីកម្ពុជា ជាផ្លូវការណ៍ កាលពីថ្ងៃទី២២ ខែសីហា ឆ្នាំ២០២៣។

(រូបថត សម្ដេចធិបតី ហ៊ុន ម៉ាណែត អញ្ជើញជួបជាមួយកម្មករ កម្មការនីរោងចក្រ ចំនួនជាង ១ម៉ឺន ៨ពាន់នាក់ កាលពីថ្ងៃទី១៩ ខែកញ្ញា ឆ្នាំ ២០២៣ នៅក្នុងស្រុកបាទី ខេត្តតាកែវ។)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរចុះជួបកម្មករ កម្មការនី រោងចក្រសហគ្រាសជាលើកទី៥នេះ សម្ដេចធិបតី ត្រូវជួបសំណេះសំណាលជាមួយកម្មករ កម្មការនី រោងចក្រចំនួន ១៨ ០៩៩នាក់ មកពីរោងចក្រ សហគ្រាសចំនួន២២ ដែលមានមូលដ្ឋាននៅក្នុងខណ្ឌមានជ័យ និងខណ្ឌដង្កោ រាជធានីភ្នំពេញ។ រោងចក្រ សហគ្រាសទាំង២២នេះ ជាប្រភេទរោង ចក្រកាត់ដេរសម្លៀកបំពាក់ ចំនួន ១៨ រោងចក្រផលិតផលិតផលធ្វើដំណើរ និងកាបូប ចំនួន ២ រោងចក្រដេរស្បែកជើង ចំនួន ១ និងរោងចក្រផលិតឆត្រ ចំនួន១។

ជាក់ស្ដែង ចំពោះការចុះជួបកម្មករ កម្មការនីចំនួន៤ដងកន្លងមក សម្ដេចមហាបវរធិបតី ហ៊ុន ម៉ាណែត បានចុះជួបកម្មករ កម្មការនីជាលើកទី១ កាលពីថ្ងៃទី២៩ ខែសីហា នៅតំបន់ព្រៃស្ពឺ រាជធានីភ្នំពេញ មានកម្មករ និយោជិត ចូលរួមចំនួន ១៨,០១៣នាក់។ លើកទី២ កាលពីថ្ងៃទី១ ខែកញ្ញា ឆ្នាំ២០២៣ នៅក្រុងតាខ្មៅ ខេត្តកណ្តាល មានកម្មករ និយោជិតចូលរួម ១៨,២៨៩នាក់។ លើកទី៣ កាលពីថ្ងៃទី៩ ខែកញ្ញា ឆ្នាំ២០២៣ នៅក្នុងខេត្តកំពង់ស្ពឺ ដែលមានកម្មករ និយោជិតចូលរួម ១៨,២៦៥នាក់ និងលើកទី៤ កាលពីថ្ងៃទី១៩ ខែកញ្ញា ឆ្នាំ២០២៣ នៅស្រុកបាទី ខេត្តតាកែវកាលពីថ្ងៃទី១៩ ខែកញ្ញា ដែលមានកម្មករ និយោជិតចូលរួម ១៨,១០៤នាក់។

ក្រៅតែពីជួបជាមួយកម្មករ កម្មការនីរោងចក្រ សម្ដេចធិបតី ហ៊ុន ម៉ាណែត ធ្លាប់បានប្រកាស កាលពីថ្ងៃទី០៩ ខែកញ្ញាថា សម្ដេច នឹងចុះជួបជាមួយអាជីវករលក់ដូរតាមផ្សារនាពេលខាងមុខ ដើម្បីដឹងពីតម្រូវការអ្វីដែលអាជីវករចង់បាន។

( រូបថត សម្ដេចធិបតី នាយករដ្ឋមន្ត្រីចុះជួបជាមួយកម្មករ កម្មការនី និយោជិត ក្នុងខេត្តកំពង់ស្ពឺ កាលពីថ្ងៃ០៩ ខែកញ្ញា ឆ្នាំ២០២៣។ © ISHIKAWA)

ជាការកត់សម្គាល់ ដំណើរចុះជួបជាមួយកម្មករ កម្មការនេះ សម្ដេចធិបតី ហ៊ុន ម៉ាណែត យកតម្រាប់តាម សម្ដេចតេជោ ហ៊ុន សែន អតីតនាយករដ្ឋមន្ត្រីកម្ពុជា ពីព្រោះកំឡុងពេលសម្ដេចតេជោ ហ៊ុន សែន ធ្វើជានាយករដ្ឋមន្ត្រីកម្ពុជា សម្ដេចតេជោ តែងតែចុះជួបជាមួយកម្មករ កម្មការនី និយោជិតរោងចក្រសហគ្រាស ក្នុងប្រទេសកម្ពុជា៕

ដោយ៖ ង៉ិល ណារ៉ាត់

(រូបថត សម្ដេចតេជោ ហ៊ុន សែន កាលនៅធ្វើជានាយករដ្ឋមន្ត្រី សម្ដេចបានចុះជួបចុះជួបជាមួយកម្មករ កម្មករនី រោងចក្រចំនួន១៩,០០៤នាក់ មកពីរោងចក្រសហគ្រាចំនួន១៣ នៅរាជធានីភ្នំពេញ និងខេត្តកណ្ដាល ដែលធ្វើឡើងនៅទីតាំងពហុកីឡដ្ឋានជាតិមរតកតេជោ។ © ISHIKAWA)