សម្ដេចធិបតី ហ៊ុន ម៉ាណែត ណែនាំឲ្យមន្ត្រីពាក់ព័ន្ធត្រូវពិនិត្យមើលយន្ដការនានា ដើម្បីដោះស្រាយបញ្ហាទេសចរណ៍

សម្តេចមហាបវរធិបតី ហ៊ុន ម៉ាណែត​ នាយករដ្ឋមន្ត្រី​នៃកម្ពុជា បានណែនាំឲ្យមន្ត្រីពាក់ព័ន្ធត្រូវពិនិត្យមើលយន្ដការនានា ដើម្បីដោះស្រាយបញ្ហាទេសចរណ៍ ខណៈមានការធ្លាក់ចុះភ្ញៀវទេសចរបរទេស អំឡុងពេលនៃការរាតត្បាតជំងឺកូវីដ -១៩។

ការណែនាំនេះ គ្រាដែលសម្ដេចធិបតី ហ៊ុន ម៉ាណែត អញ្ជើញជួបសំណេះសំណាលជាមួយកម្មករ-និយោជិតចំនួន ១៨,០៩៩នាក់ នៅតាមបណ្តារោងចក្រ-សហគ្រាស នៅរាជធានីភ្នំពេញ នាព្រឹកថ្ងៃទី ៣ ខែតុលា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត​ មានប្រសាសន៍ថា ក្នុងពេលជួបពិភាក្សាជាមួយមេដឹកនាំប្រទេសមួយចំនួន ជាពិសេសនាយករដ្ឋមន្ត្រីថៃ និងប្រធានាធិបតីហ្វីលីពីនជាដើម សម្ដេច តែងតែជំរុញឲ្យមានកិច្ចសហប្រត្តិការទៅលើវិស័យទេសចរណ៍ ពិសេសជំរុញឲ្យទេសចរណ៍បរទេសមកកាន់ប្រទេសកម្ពុជា ឲ្យបានកាន់តែច្រើន។

សម្ដេចធិបតី ហ៊ុន ម៉ាណែត បានឲ្យដឹងថា ចំនួនភ្ញៀវទេសចរបរទេស មកកាន់ប្រទេសកម្ពុជា មានការធ្លាក់ចុះដោយ សារការរាតត្បាតជំងឺកូវីដ-១៩ តែបច្ចុប្បន្នមានចំនួនកើនឡើងបន្តិចវិញហើយ។ សម្ដេចធិបតី បានបន្ថែមថា​ «ចំនួនទេសចរណ៍យើង វាប៉ះពាល់ដោយសារកូវីដ យើងកើន ប៉ុន្តែមិនទាន់ដល់ហ្នឹងទេ ថៃដូចតែគ្នាដែរទេ ខ្ញុំសួរថៃថ្ងៃមុនបានប៉ុន្មានភាគរយហើយ ថៃកាលមុនកូវីដ ៤០លាននាក់ ឥឡូវកើនវិញបានត្រឹមប្រហែល ៦០ភាគរយទេ មិនទាន់ពេញទេ គ្រប់ប្រទេសទាំងអស់ប៉ះពាល់»។

សម្ដេចនាយករដ្ឋមន្ត្រី ក៏បានឲ្យដឹងថា សម្ដេច បានសាកសួរទៅកាន់អភិបាលខេត្តសៀមរាប ថាតើចំនួនភ្ញៀវទេសចរបរទេស កើនឡើងប៉ុន្មានឲ្យពិតប្រាកដ? ដោយសម្ដេចបន្ថែមថា រឿងទិ​ន្នន័យរបស់ក្រសួងទេសចរណ៍ជារឿងមួយ តែសម្ដេចចង់ដឹងបន្ថែមពីអាជ្ញាធរផ្ទាល់ នៅខេត្តសៀមរាប។

តាមសម្ដេចធិបតី ហ៊ុន ម៉ាណែត លោកអភិបាលខេត្តសៀមរាប បានបញ្ជាក់ថា «គាត់ថា យើងបង្កើនហើយ ណាមួយទៀតឥឡូវមិនទាន់ដល់ហៃស៊ីស៊ិន វាទើបតែចាប់ផ្ដើម ហៃស៊ីស៊ិន វាចាប់ផ្ដើមពីពាក់កណ្ដាលខែ ១០ ដល់ខែ ៣ ពេលហ្នឹងបានមនុស្សមកច្រើន ដោយសារស្រុកគេ គេវ៉ាកងគេអី គេនឹងមក»។

សម្ដេចនាយករដ្ឋមន្ត្រី ហ៊ុន ម៉ាណែត ក៏បានណែនាំឲ្យលោកទេសរដ្ឋមន្ត្រី ថោង ខុន លោក សុខ សូកេន រដ្ឋមន្ត្រីក្រសួងទេសចរណ៍ ពិនិត្យមើលយន្ដការនានា ដើម្បីដោះស្រាយបញ្ហាទេសចរណ៍នេះ ថាតើមានបញ្ហាអ្វីខ្លះ៕