ព័ត៌មានជាតិ

គ្រាប់បែកទម្លាក់ MK82 ទម្ងន់២៥០គីឡូ ២គ្រាប់ ត្រូវប្រទះឃើញក្នុងខេត្តតាកែវ

បានផុស

៤ years មុន

នៅ

ថ្ងៃព្រហស្បតិ៍ ៤ កុម្ភៈ ២០២១

ដោយ

គ្រាប់បែកទម្លាក់ពីលើយន្តហោះមិនទាន់ផ្ទុះទម្ងន់ធ្ងន់សល់ពីសម័យសង្គ្រាម២គ្រាប់ ត្រូវបានកម្លាំងប៉ូលិសជំនាញនៃស្នងការដ្ឋាននគរបាលខេត្តតាកែវ សហការជាមួយអង្គភាពស៊ីម៉ាក់ចុះប្រមូលយកមកទុកបំផ្លាញចោល នៅពីរទីតាំងផ្សេងគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រាប់ទី១ ត្រូវបានយកមកពីការដ្ឋានស្ថាបនាផ្លូវខេត្តលេខ២២ក្បែរសាលាស្រុកត្រាំកក់ ឃុំអង្គតាសោម កាលពីថ្ងៃទី០២ ខែកុម្ភៈ ឆ្នាំ២០២១។ ចំណែកគ្រាប់ទី២ ត្រូវបានយកមកពីការដ្ឋានខ្សាច់មួយកន្លែង ក្នុងភូមិត្រពាំងលើក ឃុំកណ្តឹង ស្រុកបាទី នៅថ្ងៃទី០៣ ខែកុម្ភៈ ឆ្នាំ២០២១។

ជុំវិញវត្តមានគ្រាប់ទាំង២នេះ កម្លាំងជំនាញការិយាល័យគ្រប់គ្រងអាវុធគ្រឿងផ្ទុះ ជាតិពុល នៃស្នងការដ្ឋាននគរបាលខេត្តតាកែវ និងមន្ត្រីជំនាញអង្គភាពស៊ីម៉ាក់បានបញ្ជាក់ថា វាជាយុទ្ធភណ្ឌមិនទាន់ផ្ទុះសល់ពីសម័យសង្គ្រាមនិងជាប្រភេទគ្រាប់បែកទម្លាក់ពីយន្តហោះ ដែលមានឈ្មោះថា MK82 មានទម្ងន់ជាង២៥០គីឡូ។

បច្ចុប្បន្ន គ្រាប់បែកទាំងពីរខាងលើ ត្រូវបានប៉ូលិសជំនាញនិងអង្គភាពស៊ីម៉ាក់ដឹកជញ្ជូនពីទីតាំងដែលប្រទះឃើញមកស្នងការដ្ឋាននគរបាលខេត្ត ដើម្បីរក្សាទុក និងត្រៀមកម្ទេចចោលនៅពេលក្រោយ៕

អត្ថបទ៖ វីរៈ

សូមចុចអាន៖ កម្មកររត់ចែកជើងគ្នា ក្រោយប្រទះឃើញគ្រាប់រ៉ុកកែត នៅក្រោមអគារចាស់