វាសនា​ទូកងដ៏​ល្បី​ប្រកួត​មិនដែលចាញ់ម្តង មិន​ដឹង​ឆ្នាំនេះអាច​ចុះឈ្មោះប្រកួតបាន​​ឬ​យ៉ាងណា?

«នរិន្ទរង្សី ពិជ័យចិត្របុត្រ» ជាឈ្មោះរបស់ទូកង​ដ៏ល្បី​ប្រចាំវត្តឯករង្សីនៅក្នុងស្រុកឯកភ្នំ ដែល​រាល់ការ​ចូលរួម​ប្រកួត​ប្រណាំងមិនធ្លាប់ចាញ់ម្ដងណាឡើយ ពេលនេះកំពុងរងការខូចខាត​ដោយសារដើមឈើ១ដើមរលំ​សង្កត់ ខណះ​កាលពីថ្ងៃទី ២ ខែតុលាម្សិលមិញមានភ្លៀងធ្លាក់ ១ មេលាយឡំខ្យល់កន្ត្រាក់បង្កឲ្យឈើ​​មួយ​ដើមរលំសង្កត់​តែម្តង​។

ព្រះសង្ឃក្នុងវត្តមានសង្ឃដីកាថា ហេតុការខាងលើបានកើតឡើងនៅវេលាម៉ោងជិត ១២ យប់ ខណះដែលមានភ្លៀងនិង​ខ្យល់ខ្លាំងបានរលំដើមពង្រសង្កត់ទូកង «នរិន្ទរង្សីពិជ័យចិត្របុត្រ» យ៉ាងតំណំ។

បើតាមព្រះសង្ឃអះអាង មិនទាន់ដឹងស្ថានភាពខូចខាតកម្រិតណាទេ ប្រហែលជាមិនអាចយកចូលទីលានប្រកួតបានទេ ពេលនេះកំពុងសង្គ្រោះបឋម។ ជាមួយគ្នានេះដែរ ក្រុមអ្នកអុំទូកដែលរងគ្រោះមួយនេះ​ក៏​មិនទាន់ហ៊ានសន្និដ្ឋានបានថា តើទូកប្រណាំងខ្នាតអន្តរជាតិដ៏ខ្លាំងក្លាមួយនេះ នឹងអាចចូលរួមប្រកួតក្នុងពិធីបុណ្យ អកអំបុក បណ្ដែតប្រទីប សំពះព្រះខែ ដែលប្រារព្វធ្វើនៅចុងខែតុលាខាងមុខនេះបានដែរឬយ៉ាងណានោះទេ។

ប្រភពដដែលបន្តថា ទូកងប្រចាំវត្តឯករង្សី ស្ថិតក្នុងស្រុកឯកភ្នំ មានច្រើនណាស់ដែលមានភាពល្បីៗ។ ដោយឡែកមាន​តែ​ទូកង ដែលរងគ្រោះខាងលើនេះប៉ុណ្ណ្ណោះដែលល្បីល្បាញនិងប្រណាំងមិនដែលចាញ់​តែងចូលរួមប្រកូតប្រជែងមិនដែលខកខាននៅក្នុងពីធីបុណ្យ អុំទូក អកអំបុក បណ្ដែតប្រទីប សំពះព្រះខែ ដែលជាពិធីបុណ្យប្រពៃណីខ្មែរដ៏ធំបំផុត។ ទូកងដែលមានខ្នាតអន្តរជាតិមួយនេះមានប្រវែង ៣៤ ម៉ែត្រ និង មានចំណុះកីឡាករ ៧៥ នាក់៕

អត្ថបទ៖ សៅ សារិទ្ឋ