ព័ត៌មានជាតិ

ស្ពាន ផ្លូវ និងដំណាំជាច្រើនក្នុងស្រុកកំរៀង ត្រូវលិចលង់ដោយជំនន់ទឹកភ្លៀង

បានផុស

១ year មុន

នៅ

ថ្ងៃពុធ ៤ តុលា ២០២៣

ដោយ

ផលដំណាំរបស់ប្រជាកសិករជាច្រើនដែលស្ថិតនៅតាមបណ្ដោយអូរដា កំពុងត្រូវបានជំនន់ទឹកភ្លៀងវាយលុកយ៉ាងខ្លាំង។ ដោយឡែកស្ពានមួយកន្លែង ក៏ត្រូវបានទឹកហូរលិចពីលើស្ពាន ដែលជាបញ្ហាដល់ការធ្វើដំណើររបស់ប្រជាពលរដ្ឋ និងសិស្សានុសិស្សផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការបញ្ជាក់ពីអាជ្ញាធរមូលដ្ឋានបានឲ្យដឹងថា កាលពីថ្ងៃទី ៣ ខែតុលា ឆ្នាំ ២០២៣ នេះ ទឹកនៅក្នុងអូរដាដែលផ្សារភ្ជាប់ជាមួយនឹងអូរព្រំដែនថៃ បានជោរជន់យ៉ាងខ្លាំងបណ្ដាលឲ្យលិចផលដំណាំ និងលំនៅឋានប្រជាពលរដ្ឋមួយចំនួននៅតាមបណ្ដោយអូរ ស្ថិតក្នុងភូមិអូរដា ភូមិលំផាត់ ភូមិតាំងយូ និងភូមិអូរគគី ឃុំអូរដា ស្រុកកំរៀង ខេត្តបាត់ដំបង។

របាយការណ៍បានបន្តទៀតថា នៅពេលនោះដែរ សិស្សានុសិស្សដែលកំពុងរៀនក្នុងសាលាបឋមសិក្សាលំផាត់ ត្រូវបានបិទផ្អាកការសិក្សា និងជម្លៀសឲ្យចេញផុតពីតំបន់ទឹកជំនន់។ ដោយឡែកអាជ្ញាធរមូលដ្ឋាន រួមសហការជាមួយកម្លាំងវីរការពារព្រំដែនគោកលេខ ៨១៩ បានដឹកកាណូតស្មាច់យកមកចាំជួយចម្លងប្រជាពលរដ្ឋដែលជាប់គាំងដោយទឹកជំនន់មកកាន់ទីទួលសុវត្ថិភាព។ ហើយរហូតមកទល់នឹងល្ងាចថ្ងៃដដែល ជំនន់ទឹកភ្លៀងនេះនៅមិនទាន់ស្រកនៅឡើយទេ។