ច្រកអន្តរជាតិដូងត្រូវបានបិទទ្វារផ្អាកការឆ្លងកាត់ជាបណ្ដោះអាសន្នដោយសារទឹកជំនន់

ច្រកអន្តរជាតិដូងគឺជាច្រកមួយដែលផ្សារភ្ជាប់រវាងស្រុកកំរៀងក្នុងខេត្តបាត់ដំបងជាមួយនឹងស្រុកពោងណាំរ៉នក្នុងខេត្តច័ន្ទបុរីហើយក៏ជាច្រកដ៏សំខាន់មួយក្នុងការផ្លាស់ប្ដូរទំនិញគ្រប់ប្រភេទរវាងប្រទេសកម្ពុជាជាមួយនឹងប្រទេសថៃផងដែរ។

យោងតាមសេចក្តីរាយការណ៍បានបញ្ជាក់ថា ដោយសារប៉ុន្មានថ្ងៃចុងក្រោយនេះមានភ្លៀងធ្លាក់ជាប់ៗគ្នាទាំងនៅទឹកដីកម្ពុជាក៏ដូចជានៅក្នុងខេត្តច័ន្ទបុរីប្រទេសថៃបានធ្វើឲ្យទឹកជំនន់ជន់ឡើងយ៉ាងលឿនបំផុតនៅក្នុងអូរព្រំដែនព្រមទាំងបានបែកសាចទៅតាមអូរនានាមួយចំនួនបង្កឲ្យលិចលំនៅឋានតាមភូមិមួយចំនួនដែលស្ថិតនៅជាប់ និងមាត់អូរ។

ប្រភពដដែលបានបន្តថា លុះនៅវេលាម៉ោង ៣ ទៀបភ្លឺព្រឹកថ្ងៃទី ៤ ខែតុលា ឆ្នាំ ២០២៣ នេះទឹកអូរព្រំដែនបានជន់ឡើងយ៉ាងខ្លាំងធ្វើឲ្យលិចទៅលើផ្លូវនៃច្រកទ្វារអន្តរជាតិដូងដែលតម្រូវឲ្យភាគីកម្ពុជានិងភាគីថៃរួមគ្នាបិទរបងទ្វារដោយមិនអនុញ្ញាតឱ្យមានការធ្វើចរាចរណ៍ទៅលើយានយន្តគ្រប់ប្រភេទដោយសារតែកម្ពស់ទឹកនៅលើផ្លូវនៃច្រកចូលទៅប្រទេសថៃមានកម្ពស់ខ្ពស់ដែលអាចបង្កឲ្យយានយន្តគ្រប់ប្រភេទជួបនិងគ្រោះថ្នាក់បាន។ ដោយឡែកសម្រាប់ប្រជាពលរដ្ឋថ្មើរជើងអាចចេញចូលបានតាមរយៈស្ពានដែលនៅផុតពីទឹក។

នៅពេលទៀបភ្លឺនេះដែរ ខណៈដែលទឹកជំនន់កំពុងឡើងយ៉ាងគំហុកគេសង្កេតឃើញថាទាំងលំនៅឋានពលរដ្ឋក៏ដូចជាការិយាល័យសម្រាប់ធ្វើការរបស់មន្ត្រីនានាដែលស្ថិតនៅក្នុងទីតាំងច្រកអន្តរជាតិក៏ត្រូវបានទឹកលិចគ្មានសេសសល់ឡើយហើយរហូតមកទល់នឹងព្រឹកនេះដែរទឹកក៏នៅតែបន្តឡើងឥតស្រាកស្រានដែលតម្រូវឲ្យសមត្ថកិច្ចទាំងពីរប្រទេសសម្រេច​បិទច្រកជាបណ្ដោះ អាសន្នរង់ចាំទឹកស្រកវិញទើបបើកឲ្យធ្វើចរាចរណ៍ឆ្លងកាត់វិញបាន៕ 

អត្ថបទ : សោ និយមរ័ត្ន