កម្ពុជានឹងមានភ្លៀងធ្លាក់រហូតដល់ចុងសប្ដាហ៍នេះ

ក្រសួងធនធានទឹក និងឧតុនិយម នៅថ្ងៃទី ៤ ខែតុលា ឆ្នាំ២០២៣នេះ បានប្រកាសថា ក្របខណ្ឌអាកាសធាតុនៅប្រទេស​កម្ពុជា ចាប់ពីថ្ងៃទី ៤ ដល់ ថ្ងៃទី៦ ខែតុលា នេះ នឹងអាចមានភ្លៀងធ្លាក់គ្របដណ្ដប់នៃបណ្ដាខេត្តក្រុងទាំងអស់។

ប្រព័ន្ធសម្ពាធទាប (ITCZ) អូសបន្លាយលើជួរភ្នំដងរែក និងខ្ពង់រាបភាគឦសាន ជាមួយនឹងខ្យល់មូសុងនិរតីខ្សោយ។ ចំណែក ព្យុះទី១៤ ឈ្មោះ កយនុយ” Koinu” នៅមហាសមុទ្រប៉ាស៊ីហ្វិក នឹងដើរកាត់លើភាគខាងត្បូងកោះតៃវ៉ាន់ មុននឹងរលាយអស់ ឥទ្ធិពលនៅពេលទៅដល់ភាគខាងកើតកោះហុងកុង នៅថ្ងៃទី៨ ខែតុលា ព្យុះនេះនឹងមិនមានឥទ្ធិពលមកដល់លើកម្ពុជា នោះឡើយ។

ស្ថានភាពបែបនេះនឹងធ្វើឱ្យរាជធានីខេត្តមួយចំនួនអាចមានភ្លៀងនៅក្នុងកម្រិតពីខ្សោយ ទៅបង្គួរ ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដី ពី ៤០-៦០%៕

អត្ថបទ៖ សួស សិត