មន្រ្តីជាន់ខ្ពស់សេដ្ឋកិច្ច ៖ វិស័យហិរញ្ញវត្ថុ​មិនមែនធនាគារ​មានវឌ្ឍនភាពល្អ លើកលែងតែវិស័យអចលនវត្ថុ

វិស័យហិរញ្ញវត្ថុ មិនមែនធនាគារបាននិងកំពុងចូលរួមចំណែកយ៉ាងសំខាន់ក្នុងការជំរុញសន្ទុះកំណើនសេដ្ឋកិច្ចជាតិ។

លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងនៅក្នុងសិក្ខាសាលាផ្សព្វផ្សាយស្តីពី គោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា នៅព្រឹកថ្ងៃទី ០៤ តុលា ថា វិស័យហិរញ្ញវត្ថុមិនមែនធនាគារ មានការរីកចម្រើនគួរឱ្យកាត់សម្គាល់ក្រោយពីវិបត្តិកូវីដ-១៩ ពោលគឺគិតត្រឹមឆ្នាំ ២០២២ វិស័យធនាគាររ៉ាប់រង​បានរួមចំណែកប្រមាណ ១.១៧ភាគរយនៃផលិតផលក្នុងស្រុកសរុប GDP ជាមួយដង់ស៊ីតេធានារ៉ាប់រង ២០.៥៣ដុល្លារ​អាមេរិក ក្នុងមនុស្សម្នាក់។ លោកបន្តថា បច្ចុប្បន្ននេះ វិស័យធនាគាររ៉ាប់រង មានបុព្វលាភដុល ប្រមាណ ៣៣២​លានដុល្លារ និងទ្រព្យសកម្មសរុបជាង ៩៧៩លានដុល្លារ។

ដោយឡែកវិស័យមូលបត្រ តាមរយៈមូលធូបនីយកម្មសម្រាប់ទីផ្សារមូលបត្រមានចំនួន ១.៨៧ប៊ីលានដុល្លារ។ ក្នុងនោះ ការប្រមូលសាច់ប្រាក់ក្នុងទីផ្សារមូលបត្រមានចំនួនជាង ៣៨៧លានដុល្លារ និងទំហំជួញដូរនៃទីផ្សារឧបករណ៍និស្សន្ទ ជាង ៣៥០លានដុល្លារ នៅត្រឹមឆ្នាំ ២០២២។

ចំណែកវិស័យបរធនបាលកិច្ច មានទំហំចំនួនជាង ៤២៦លានដុល្លារ និងបរធនបាលកិច្ចចុះបញ្ជីមានចំនួន ៣០០។

លោក រស់ សីលវ៉ា បានបញ្ជាក់ថា រហូតមកដល់បច្ចុប្បន្នវិស័យហិរញ្ញវត្ថុ មិនមែនធនាគារ នៅបន្តមានវឌ្ឍនភាព​ល្អប្រសើរ លើកលែងតែវិស័យអចលនវត្ថុ ដោយសារតែសេដ្ឋកិច្ចសកល តំបន់ និងសេដ្ឋកិច្ចជាតិ បាននិងកំពុងរង​ផលប៉ះពាល់ពីវិបត្តិសង្រ្គាមអ៊ុយក្រែន រុស្ស៊ី និងកំណើនអតិផរណា។

លោកបានបន្តថា ដើម្បីអភិវឌ្ឍបច្ចេកវិទ្យាវិស័យហិរញ្ញវត្ថុ មិនមែនធនាគារ ច្បាប់និងលិខិបទដ្ឋានគតិយុត្តជាច្រើន ត្រូវបានរៀបចំក្នុងវិស័យធនាគាររ៉ាប់រង វិស័យមូលបត្រ វិស័យសន្តិសុខសង្គម វិស័យបរធនបាលកិច្ច គណនេយ្យ និងសាវនកម្ម ក៏ដូចជាអាជីវកម្មអចលនវត្ថុ និងបញ្ចាំ។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ  បានគូសបញ្ជាក់ថា បច្ចុប្បន្នរាជរដ្ឋាភិបាល កំពុងរៀបចំសេចក្តីព្រៀងច្បាប់​សំខាន់ៗ មួយចំនួនដូចជា សេចក្តីព្រៀងច្បាប់ស្តីពីអាជីវកម្ម និងសេវាអចលនវត្ថុ សេចក្តីព្រៀងច្បាប់ស្តីពីការគ្រប់​គ្រង​អាជីវកម្មបញ្ចាំ ជាដើម៕