សម្ដេចធិបតី ហ៊ុន ម៉ាណែត ៖ រាជរដ្ឋាភិបាល សន្សំថវិកាបានជាង ២០០លានដុល្លារ បន្ទាប់ពីព្យួរការចំណាយលើកិច្ចការមិនសំខាន់មួយចំនួន

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឲ្យដឹងថា បន្ទាប់ពីព្យួរការចំណាយទៅលើកិច្ចការមិនសំខាន់មួយចំនួនរួចមក គឺរាជរដ្ឋាភិបាលសន្សំបានថវិកាជាង ២០០លានដុល្លារ។ ការឲ្យដឹងនេះ គ្រាដែលសម្ដេចធិបតី ហ៊ុន ម៉ាណែត អញ្ជើញជាអធិបតីក្នុងពិធីអបអរសាទរទិវាគ្រូបង្រៀន ៥តុលា ២០២៣ នាព្រឹកថ្ងៃទី ៥ ខែតុលា ឆ្នាំ ២០២៣នេះ។    

សម្ដេចធិបតី ហ៊ុន ម៉ាណែត មានប្រសាសន៍ថា បន្ទាប់ពីសម្ដេច បានណែនាំឲ្យកែសម្រួលព្យួរការចំណាយទៅលើកិច្ចការមិនចាំបាច់មួយចំនួន គឺរាជរដ្ឋាភិបាលសន្សំបានថវិកាជាង ២០០លានដុល្លារ ​នៅក្នុងឆ្នាំ ២០២៣នេះ។ សម្រាប់ថវិកាដែលសន្សំបាននេះ គឺដើម្បីទៅដល់ប្រជាពលរដ្ឋដែលជួបបញ្ហាគ្រោះទឹកជំនន់ និងជួយទៅលើផ្នែកគាំពារសង្គម។

សម្ដេចធិបតី​ ហ៊ុន ម៉ាណែត បានថ្លែងថា «ថ្ងៃមុនគ្រាន់តែខ្ញុំឲ្យកែសម្រួលព្យួរការចំណាយ ទៅលើកិច្ចការមិនសំខាន់មួយចំនួន ខ្ញុំសន្សំបាន ២០០លានដុល្លារជាង សម្រាប់ ២០២៣នេះ ហើយ ២០០លានដុល្លារនេះ យកទៅណា អាថវិកាដែលយើងបង្កើនការគាំពារសង្គមនេះ ទឹកជំនន់ប្រជាពលរដ្ឋនេះ បើសិនជាខ្ញុំមិនហ៊ានកាត់ថវិកាហ្នឹងទេ ហើយថវិកានេះវាអត់ចាំបាច់ប៉ះពាល់មន្ត្រីអីទេ គ្រាន់តែគម្រោងសិក្សាអីមួយចំនួន ដែលវាមិនទាន់ចាំបាច់ព្យួរវាសិនទៅ យកលុយហ្នឹងមកដើម្បីទៅជួយប្រជាពលរដ្ឋ ដាក់ឲ្យចំគោលដៅនៃការកំណែទម្រង់​ហ្នឹងល្អជាង»៕