ឯកអគ្គរដ្ឋទូតអាមេរិក អបអរកម្ពុជា ដែលត្រូវដកចេញពីបញ្ជីប្រផេះលាងលុយកខ្វក់

ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា លោកW.PATRICK MURPHY បានអបអរសាទរចំពោះប្រទេសកម្ពុជា ត្រូវបានដកចេញពីបញ្ជីប្រផេះនៃការលាងលុយកខ្វក់ និងបានស្នើឱ្យកម្ពុជាយកចិត្តទុកដាក់ ក្នុងការថែរក្សាការងារសម្អាតប្រាក់នេះ ឱ្យកាន់តែប្រសើរថែមទៀត។ លោក ផាទ្រិក ម័រហ្វី បានអបអរបែបនេះ នៅចំពោះមុខ លោក ស ថេត អគ្គស្នងការនគរបាលជាតិ នាព្រឹកថ្ងៃទី​ ០៥ ខែតុលានេះ។

ជាមួយគ្នានោះ លោកក៏បានកោតសរសើរចំពោះសមិទ្ធផលក្រុមការងារ Task Force ដែលបានផ្តល់កិច្ចសហការយ៉ាងល្អប្រសើរជាមួយ កងកម្លាំងអនុវត្តច្បាប់អាមេរិកអមស្ថានទូតប្រចាំកម្ពុជា ជាពិសេស លោក លើកឡើងពីទីភ្នាក់ងារអនុវត្តច្បាប់ប្រឆាំងគ្រឿងញៀន ដែលទើបបង្កើតថ្មី ប៉ុន្តែសម្រេចបានសមិទ្ធផលរួមសហការគ្នាក្នុងការទប់ស្កាត់ និងប្រឆាំងបទល្មើសគ្រឿងញៀនបានជាច្រើនករណីធំៗ ដែលការងារនេះមិនត្រឹមតែជួយកម្ពុជាឱ្យគេចផុតពីបទល្មើសដោយសារតែការចរាចរជួញដូរចែកចាយគ្រឿងញៀន និងក៏ជាការជួយដល់សហរដ្ឋអាមេរិក ក្នុងការទប់ស្កាត់ការនាំចូលគ្រឿងញៀន ទៅកាន់ទីផ្សារសហរដ្ឋអាមេរិកផងដែរ។

ជាការឆ្លើយតប ស ថេត អគ្គស្នងការនគរបាលជាតិ រីករាយស្វាគមន៍ជាមួយនឹងកិច្ចសហការ ដែល លោកឯកអគ្គរដ្ឋទូត បានលើកឡើងឱ្យកាន់តែរឹងមាំ និងទទួលបានលទ្ធផលល្អបន្ថែមទៀត ដោយលើកទឹកចិត្តឱ្យកងកម្លាំងអនុវត្តច្បាប់អមស្ថានទូតអាមេរិក បន្តធ្វើការជាមួយនាយកដ្ឋានជំនាញពាក់ព័ន្ធទាំងជំនាញផ្ទាល់ រួមទាំង ក្រុមការងារចម្រុះ Task Force ។

បន្ថែមពីនេះ លោកឯកអគ្គរដ្ឋទូតអាមេរិក ក៏បានលើកទឹកចិត្តឱ្យនគរបាលជាតិកម្ពុជា រៀបចំចាត់តាំងមន្ត្រី ដើម្បីទៅចូលរួមទទួលការបណ្តុះបណ្តាល នៅសាលាបណ្ឌិត្យសភាអាយលា (ILEA) ប្រចាំនៅទីក្រុងបាងកក ដោយនៅទីនោះ ជាមជ្ឈមណ្ឌលប្រកបដោយសក្តានុពល ក្នុងការបណ្តុះបណ្តាលកសាងសមត្ថភាពកងកម្លាំងអនុវត្តច្បាប់ គ្រប់មុខជំនាញ។

ស្របនឹងបញ្ហានេះ លោកស ថេត ក៏បានអរគុណភាគីអាមេរិក ដែលបានផ្តល់ការបណ្តុះបណ្តាល ហើយលោកប្រាប់ឯកអគ្គរដ្ឋទូតអាមេរិកថា នគរបាលជាតិកម្ពុជា បានត្រៀមខ្លួនជានិច្ច ដើម្បីទៅចូលរួមវគ្គបណ្តុះបណ្តាល ទទួលយកបទពិសោធន៍ពី សាលាបណ្ឌិត្យសភាអាយលា (ILEA) យកមកប្រើប្រាស់ឱ្យចំមុខជំនាញ។ ជាមួយគ្នានោះ លោកនាយឧត្តមសេនីយ៍ អគ្គស្នងការនគរបាលជាតិ ក៏បានស្នើសុំឱ្យអាមេរិកបន្តការគាំទ្របន្ថែមទៀត ទាំងផ្នែកធនធានមនុស្ស និងជំនាញព្រមទាំងចែករំលែកព័ត៌មានសំខាន់ៗ ដែលឈានទៅដល់ការប្រយុទ្ធប្រឆាំងបទល្មើសឆ្លងដែនគ្រប់ប្រភេទ។

ជាចុងក្រោយ លោកW.PATRICK MURPHY ក៏បានថ្លែងអំណរគុណចំពោះការធានាសន្តិសុខប្រកបដោយសុវត្ថិភាព ដែលនគរបាលជាតិកម្ពុជា បានផ្តល់ជូនស្ថានទូត រួមមានទាំងកិច្ចការពារស្ថានទូតអាមេរិក ការពារប្រតិភូ បុគ្គលិកការទូត និងនិវេសនដ្ឋាន រួមទាំងពលរដ្ឋអាមេរិកដែលស្នាក់នៅកម្ពុជា ប្រកបដោយកាយវិការទន់ភ្លន់ ម៉ត់ចត់ ម៉ឺងម៉ាត់ អត់ធ្មត់៕

ដោយ៖ ង៉ិល ណារ៉ាត់