អតិថិជនទិញបុរីទ្រីគីមតវ៉ាឱ្យអាជ្ញាធរអន្តរាគមន៍រឿងម្ចាស់បុរីផ្អាកការសាងសង់ពាក់កណ្ដាលទី

អតិថិជនទិញផ្ទះនៅបុរីទ្រី គីម ប្រមាណ ៥០ គ្រួសារបានស្នើសុំឱ្យអាជ្ញាធរជួយអន្តរាគមន៍ករណី​ម្ចាស់​បុរីផ្អាក​ការ​សាងសង់ផ្ទះ គ្រាដែលអថិជន​មួយចំនួន​បានបង់ប្រាក់នោះ​សឹងតែ​គ្រប់​ចំនួន​រួច​ហើយ។​

​លោក ហ៊ីង សំណាង អតិថិជនរបស់បុរី ទ្រី គីម ​ប្រាប់កម្ពុជាថ្មីនៅថ្ងៃទី ០៦ ខែតុលា ឆ្នាំ ២០២៣​នេះថា លោកបានទិញផ្ទះអាជីវកម្មរបស់បុរីទ្រីគីនៅចំការដូងក្នុងគម្រោងទី ១០ រយៈពេល ២ ឆ្នាំមកហើយ ក្នុងតម្លៃជាង ១០ ម៉ឺនដុល្លារ​ដែលសំ​ណង់​សាងសង់​សឹងតែរួច​រាល់ហើយ ខណៈការបង់ប្រាក់ក៏ជិតដាច់ដែរ។

​លោកប្រាប់ថា ​ម្ចាស់បុរីបានផ្អាកការសាងសង់ ​បន្ទាប់ពីម្ចាស់ដីបានបិទ​ប្រកាសឱ្យបញ្ឈប់ការ​សាងសង់បុរីតាំងពីដើមឆ្នាំ ២០២៣ ​ហើយបន្តអូសបន្លាយរហូតដល់បច្ចុប្បន្ន។

លោក ហ៊ីង សំណាងបានរៀបរាប់ថា៖ «ម្ចាស់បុរីកាលគាត់ទិញគាត់ធ្វើកិច្ចសន្យាយ៉ាងម៉េចជាមួយម្ចាស់ដីយើងអត់ដឹងទេ ព្រោះម្ចាស់បុរី និងម្ចាស់ដីបានព្រមព្រៀងគ្នាហើយសាងសង់គម្រោងលក់ឱ្យពួកខ្ញុំ»។

អតិថិជនរងគ្រោះរូបនេះបញ្ជាក់ថា បញ្ហានៅត្រង់ថា ម្ចាស់ដីឱ្យម្ចាស់បុរីផ្អាកសាងសង់ ដោយលើកមូលហេតុថា ម្ចាស់ដី​អត់បង់លុយឱ្យម្ចាស់ដី។

លោកបញ្ជាក់ថា ម្ចាស់បុរីក៏មានឆន្ទៈដោះស្រាយដែរ ប៉ុន្តែម្ចាស់ដីមិនព្រមផ្ដល់ចម្លើយ។ បច្ចុប្បន្នតំណាងក្រុមហ៊ុនបុរី ទ្រីគីមបានបិទទូរស័ព្ទមិនអាចទាក់ទងបានឡើយ។

កាលពីព្រឹកថ្ងៃទី ៣ ខែតុលា អតិថិជនបុរីទ្រី គីមប្រមាណ ៥០ គ្រួសារ​បានមកប្រមូលផ្តុំគ្នាឈមុខសាលាខណ្ឌដង្កោ និងលើកបដាស្នើឲ្យថ្នាក់ដឹកនាំ និងអាជ្ញាធរពាក់ព័ន្ធជួយអន្តរាគមន៍។

ពួកគាត់បានទិញ និងបង់រំលោះ ដោយមានកិច្ចសន្យាពីម្ចាស់បុរីត្រឹមត្រូវ ដោយម្ចាស់បុរីសន្យាថាការសាងសង់បុរី គឺតែរយៈពេលតែ២ឆ្នាំប៉ុណ្ណោះ និងរួចរាល់ដើម្បីឲ្យពួកគាត់បានចូលមកនៅ ស្រាប់តែនៅដើមខែមករា ឆ្នាំ២០២៣ ម្ចាស់ដីបានផ្អាកមិនឲ្យម្ចាស់បុរីសាងសង់បន្ត ទើបធ្វើឱ្យពួកគាត់ព្រួយបារម្ភ៕

អត្ថបទ៖ ឡេង ដេត