ថ្ងៃស្អែក រដ្ឋមន្ត្រីការបរទេសប្រេស៊ីល នឹងមកបំពេញទស្សនកិច្ចផ្លូវការនៅកម្ពុជា រហូតដល់ថ្ងៃទី១២ ខែតុលា

នាថ្ងៃស្អែក​ ទី១០​ ខែតុលា ឆ្នាំ២០២៣ លោក ម៉ៅរូ វីអេរ៉ា រដ្ឋមន្ត្រីការបរទេស នៃប្រទេសប្រេស៊ីល នឹងមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា រហូតដល់ថ្ងៃទី១២​ ខែតុលា។ នេះបើតាមសេចក្ដីប្រកាសព័ត៌មានរបស់ក្រសួងការបរទេស នៃប្រទេសកម្ពុជា ដែលចេញនៅល្ងាចថ្ងៃទី០៩ ខែតុលានេះ។

សេចក្ដីប្រកាសព័ត៌មានរបស់ក្រសួងការបទេសកម្ពុជាបានសរសេរថា “ក្នុងអំឡុងពេលទស្សនកិច្ចនេះ រដ្ឋមន្ត្រីការបរទេសប្រេស៊ីល នឹងអញ្ជើញចូលជួបសម្ដែង ការគួរសមជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា”។

សេចក្ដីប្រកាសដដែល ក៏បានសរសេរបន្ថែមថា “លោកឧបនាយករដ្ឋមន្ត្រី សុខ ចិន្តាសោភា និង លោក ម៉ៅរូ វីអេរ៉ា នឹងមានជំនួបទ្វេភាគី សំដៅដាក់ចេញនូវវិធានការសកម្មភាព ដើម្បីជំរុញនិងពង្រីកបន្ថែមទៀតនូវកិច្ចសហប្រតិបត្តិការ ទ្វេភាគីដែលមានកន្លងមករវាងប្រទេសទាំងពីរ រួមមានពាណិជ្ជកម្ម វិនិយោគ ទេសចរណ៍ និងកិច្ច សហការបច្ចេកទេស ព្រមទាំងកិច្ចសហប្រតិបត្តិការនៅក្នុងវេទិកាពហុភាគី ផងដែរ”។

តាមរយៈដំណើរទស្សនកិច្ចផ្លូវការនេះ ក្រសួងការបរទេស នៃកម្ពុជាបានចាត់ទុកដំណើរទស្សនកិច្ចនេះ ជាជំហានថ្មីសំខាន់មួយទៀត ដែលគូសបញ្ជាក់ពីការប្ដេជ្ញាចិត្តរបស់ ប្រទេសទាំងពីរ ក្នុងការពង្រឹង និងពង្រីកចំណងមិត្តភាពនិងកិច្ចសហប្រតិបត្តិការ

សូមជម្រាបបន្ដិចថា ដំណើរបំពេញទស្សនកិច្ចផ្លូវ​ការរដ្ឋមន្ត្រីការបរទេសប្រេស៊ីល  គឺតបតាមការអញ្ជើញរបស់ លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការ បរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា៕

ដោយ៖ ង៉ិល ណារ៉ាត់