ស្បៃមុងជាង១ពាន់ម៉ែត្រ ត្រូវបានមន្ត្រីជំនាញកម្ទេចចោល ក្នុងបឹងជ្រោយ ខេត្តកំពង់ចាម

ខណ្ឌរដ្ឋបាលជលផលកំពង់ចាម សហការជាមួយកងកម្លាំងសមត្ថកិច្ច បន្តចុះបង្ក្រាបបទល្មើសនេសាទ ក្នុងបឹងជ្រោយ  ដែលស្ថិតនៅក្នុងភូមិសាស្ត្រ ស្រុកជើងព្រៃ ខេត្តកំពង់ចាម នារដូវត្រីពងកូន។ នៅក្នុងការចុះបង្រ្កាបបទល្មើសនេសាទថ្ងៃទី១០ ខែតុលា ឆ្នាំ២០២៣ ខណ្ឌរដ្ឋបាលជលផលកំពង់ចាម និងមន្ត្រីជំនាញជាច្រើនរូបទៀត បានបន្តចុះទប់ស្កាត់ និងបង្រ្កាបបទល្មើសជលផលបានចំនួន ២ករណី។

លោក អ៊ុក ណារិន នាយខណ្ឌជលផលកំពង់ចាម បានបញ្ជាក់ឲ្យដឹងថាប្រតិបត្តិការបង្ក្រាបនេះ កម្លាំងសមត្ថកិច្ចបានធ្វើការរុះរើ និងកាត់បំផ្លាញចោលវត្ថុតាងនៃបទល្មើសជលផលនៅនឹងកន្លែង ដោយក្នុងនោះមានការបង្ក្រាបនៅក្នុងភូមិសាស្ត្របឹងជ្រោយ ស្ថិតឃុំសូទិព្វ ស្រុកជើងព្រៃ រួមមានឧបករណ៍ លូស្បៃមុងចំនួន២០មាត់ធំៗ របាំងស្បៃមុងចំនួន៤កន្លែង សរុបប្រវែង១០០០ម៉ែត្រ បង្គោលចម្រឹងចំនួន៣០០ដើម និងធ្វើការព្រលែងកូនត្រីចម្រុះ៥៧គីឡូក្រាម។

លោក អ៊ុក ណារិន នាយខណ្ឌជលផលកំពង់ចាម បានបញ្ជាក់ឲ្យដឹងថា កងកម្លាំងសមត្ថកិច្ច អនុវត្តដោយគ្មានការលើកលែងចំពោះបុគ្គលដែលប្រព្រឹត្តខុសច្បាប់ ហើយអ្នកជំនាញក៏អំពាវនាវបន្ថែមដល់អ្នកនេសាទ ដែលរស់នៅតាមតំបន់ទន្លេ បឹង បួរ ព្រែក និងប្រភពត្រីពង សូមកុំប្រើប្រាស់ឧបករណ៍នេសាទខុសច្បាប់ និងធ្វើយ៉ាងណាថែរក្សាតំបន់ជំរកត្រីពងកូន រួមគ្នានេសាទឲ្យបានត្រឹមត្រូវទៅតាមច្បាប់ជលផលដែលបានកំណត់។ អ្នកនេសាទក៏សំណូមពរ អភិបាលខេត្ត មេត្តាជួយបង្ក្រាបកន្លែងល្មើសច្បាប់នេសាទឱ្យអស់ផង ព្រោះប្រជានេសាទជាលក្ខណៈគ្រួសារសឹងរកត្រីបរិភោគមិនបានទេ បើនេសាទតាមប្រពៃណីនោះ៕

អត្ថបទ និង រូបភាព៖ ឡេក ចាន់ពេជ្រ