ព័ត៌មានជាតិ

រដ្ឋបាលរាជធានី ណែនាំកម្លាំងសមត្ថកិច្ច បង្កើនការអប់រំស្ដីពីសុវត្ថិភាពចរាចរណ៍ ឲ្យកាន់តែផុសផុល នាឱកាសបុណ្យភ្ជុំបិណ្ឌ

បានផុស

១ year មុន

នៅ

ថ្ងៃពុធ ១១ តុលា ២០២៣

ដោយ

លោក មាន ចាន់យ៉ាដា អភិបាលរងរាជធានីភ្នំពេញ បានណែនាំកម្លាំងមានសមត្ថកិច្ច បង្កើនកម្លាំងអប់រំស្ដីពីសុវត្ថិភាពចរាចរណ៍ឲ្យកាន់តែផុសផុលបន្ថែមទៀតដល់ប្រជាពលរដ្ឋ ក្នុងឱកាសបុណ្យភ្ជុំបិណ្ឌនេះ ដើម្បីបង្កើនការប្រុងប្រយ័ត្ន និងផ្តល់សុខសុវត្ថិភាពពេលធ្វើដំណើរទៅកាន់ស្រុកកំណើត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណែនាំរបស់លោក មាន ចាន់យ៉ាដា នេះ បានធ្វើឡើងខណៈលោកអញ្ជើញជាតំណាងលោក ឃួង ស្រេង អភិបាលរាជធានីភ្នំពេញ ក្នុងកិច្ចប្រជុំសាមញ្ញលើកទី ៥៣ របស់ក្រុមប្រឹក្សារាជធានី អាណត្តិទី ៣ នៅព្រឹកថ្ងៃទី ១១ តុលានេះ នាសាលារាជធានីភ្នំពេញ។

លោក មាន ចាន់យ៉ាដា បានមានប្រសាសន៍ថា ការលើកកម្ពស់ការងារសន្តិសុខ សណ្ដាប់ធ្នាប់ មុនពេល អំឡុងពេល និងក្រោយពេលពិធីបុណ្យភ្ជុំបិណ្ឌ គឺសង្កត់ធ្ងន់ឲ្យមានការអប់រំស្ដីពីសុវត្ថិភាពចរាចរណ៍ ដែលនេះគឺជាចំណុចមួយដ៏ល្អប្រសើរ ដើម្បីធានាសុវត្ថិភាពអ្នកបើកបរនៅតាមដងផ្លូវ។

លោកអភិបាលរង បានណែនាំដល់កងកម្លាំងសមត្ថកិច្ច ត្រូវពង្រាយកម្លាំងតាមតំបន់ច្រកចេញចូលសំខាន់ៗ នៅរាជធានីភ្នំពេញ ដើម្បីជួយសម្រួលចរាចរណ៍ដល់ប្រជាពលរដ្ឋដែលធ្វើដំណើរទៅកាន់ស្រុកកំណើត។ បន្ថែមពីនេះទៀត ត្រូវដាក់ពង្រាយកម្លាំងចុះទៅអប់រំស្តីពីសុវត្ថិភាពចរាចរណ៍ ព្រោះប្រជាពលរដ្ឋចាប់ផ្ដើមចេញពីរាជធានីភ្នំពេញ នៅថ្ងៃទី ១២ ខែតុលា តទៅ ដើម្បីទៅតាមបណ្ដាស្រុកកំណើតរបស់ពួកគាត់ ពីព្រោះពួកគាត់បានឈប់សម្រាកក្នុងឱកាសបុណ្យភ្ជុំបិណ្ឌខាងមុខនេះ។

លោកបានបន្តថា ចំពោះការចូលអប់រំទៅដល់ប្រជាពលរដ្ឋនេះ គឺអប់រំកុំឲ្យពួកគាត់ដឹកលើសចំណុះ ដឹកសំពីងសំពោង និងចូលរួមគោរពច្បាប់ចរាចរណ៍ទាំងអស់គ្នា ដើម្បីធានាសុវត្ថិភាពក្នុងការធ្វើដំណើរ ជាពិសេសបានទៅលេងស្រុកកំណើតដោយទឹកមុខសប្បាយរីករាយនាឱកាសបុណ្យភ្ជុំបិណ្ឌនេះ។ ជាងនេះទៅទៀត ពេលនេះ កងកម្លាំង ត្រូវបង្កើនការអប់រំផ្សព្វផ្សាយឲ្យបានច្រើន ជាងការផាកពិន័យ ដើម្បីបង្កើនការយល់ដឹងទៅដល់ប្រជាពលរដ្ឋឲ្យកាន់តែច្បាស់លាស់។

លោកអភិបាលរង បានស្នើសុំឲ្យបង្កើនកម្លាំងសម្រួលចរាចរណ៍ ដើម្បីធ្វើយ៉ាងណាបង្កើនការអប់រំផ្សព្វផ្សាយ ពីព្រោះឥឡូវវិធានការរបស់យើងគឺការរឹតបន្តឹង ច្រើនជាងការអប់រំផ្សព្វផ្សាយ ដូច្នេះចំណុចនេះក៏សូមសំណូមពរដែរថា សូមបង្កើនវិធានការអប់រំផងដែរ កុំយកតែវិធានការផាកពិន័យមកប្រើ ពីព្រោះប្រជាពលរដ្ឋគាត់ចង់ដឹងអំពីច្បាប់ គាត់ធ្វើខុសគឺយើងបង្កើនការអប់រំមិនបានច្រើន យើងផាកពិន័យក្នុងករណីគាត់រឹងរូស ចចេស ជាមួយនឹងបទល្មើសចរាចរណ៍ធំៗ។ ប៉ុន្តែករណីទូទៅយើងគួរតែផ្ដល់នូវការអប់រំឲ្យបានច្រើនជាងការផាកពិន័យ នេះជាសំណូមទី ១ ពាក់ព័ន្ធនៅឱកាសបុណ្យភ្ជុំបិណ្ឌ។

ក្នុងឱកាសនោះ លោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានមានប្រសាសន៍កោតសរសើរចំពោះមន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ និងប្រជាជនរាជធានីភ្នំពេញ ដែលខិតខំយ៉ាងសកម្ម ប្រកបដោយស្មារតីទទួលខុសត្រូវ ចូលរួមអភិវឌ្ឍន៍រាជធានីភ្នំពេញ ក្រោមការដឹកនាំរបស់គណៈអភិបាលរាជធានីភ្នំពេញ រហូតសម្រេចបានលទ្ធផលរីកចម្រើនលើគ្រប់វិស័យ ក្នុងខែកញ្ញា ឆ្នាំ ២០២៣ កន្លងមកនេះ។ តាមរយៈសមិទ្ធផលទាំងនេះ ពិតជាបានរួមចំណែកអនុវត្តនូវយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាល ដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

សូមបញ្ជាក់ថា នៅក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ប្រជាពលរដ្ឋខ្មែរ បានចេញទៅលេង ស្រុកកំណើតរៀងៗ ខ្លួន ដើម្បីជួបជុំក្រុមគ្រួសារ ហើយបានយកចង្ហាន់ ឬ បាយសម្ល គ្រឿងឧបភោគបរិភោគទៅវេរប្រគេនព្រះសង្ឃតាមទីវត្តអារាម និងជូនមាតាបិតា ដើម្បីឧទ្ទិសកុសលផលបុណ្យដល់អ្នកមានគុណ និងការបំពេញកុសលផលបុណ្យសម្រាប់ខ្លួនឯងទៅអនាគតជាតិ៕

អត្ថបទ ៖ ស្រីរ័ត្ន

Related Topics:រដ្ឋបាលរាជធានីភ្នំពេញ ចរាចរណ៍