​រដ្ឋាភិបាលចែកស្រូវពូជជាង ១០០ តោនដល់កសិកររងគ្រោះដោយសារទឹកជំនន់នៅខេត្តក្រចេះ​

គ្រាប់ពូជស្រូវចំនួន ១១៨,៦ តោន ត្រូវបានរាជរដ្ឋាភិបាល​ចែកជូនប្រជាពលរដ្ឋរងគ្រោះជាង ១ ពាន់គ្រួសារ (១ ១៨៦) នៅខេត្តក្រចេះ ដើម្បីដាំដុះស្ដារឡើងវិញ បន្ទាប់ពីរងការខូចខាតដោយសារ​ទឹកជំនន់។ នេះបើតាមរបាយការណ៍ស្ដីពីផល ប៉ះពាល់វិស័យកសិកម្មដោយសារទឹកជំនន់​របស់ក្រសួង​កសិកម្ម។

​លោក ឃឹម ហ្វីណង់ ​អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ​បានឱ្យដឹងនៅថ្ងៃទី ១១ ខែតុលានេះថា ​ក្រសួង​មាន​ក្រុមការងារកំពុងរៀបចំធ្វើរបាយការណ៍​ស្នើស្បៀងបម្រុង ដើម្បីចែកស្រូវពូជដល់ប្រជាកសិករ​ដែលមានដំណាំរងផលប៉ះពាល់ដោយគ្រោះទឹកជំនន់។

លោកបញ្ជាក់ថា ការផ្ដល់ពូជស្រូវនេះ ក៏ត្រូវសិក្សា​ពីតំ​បន់​ដែរ ​ខណៈតំបន់ខ្លះមានពូជស្រូវ​ក៏គ្មាន​ទឹក​ធ្វើដែរ ​ដូច្នេះ!ការចែកស្រូវមិន​ផ្ដល់​គ្រប់​ទីកន្លែង​នោះទេ លើកលែងតែតំបន់ដែល​មាន​តម្រូវ​ការចាំ​បាច់ ហើយកសិករអាចធ្វើ​បានមួយ​ជុំបន្ត​ទៀត។

​របាយការណ៍របស់ក្រសួងកសិកម្មបង្ហាញថា គិតត្រឹមថ្ងៃទី ១០ ខែតុលា ឆ្នាំ ២០២៣ ជំនន់ទឹកទន្លេ​ដែលបានហក់ឡើងកាលពីចុងខែកញ្ញា បានជន់លិចដំណាំស្រូវជាង ១ ពាន់ហិកតា (១០៩៨) បណ្ដាល​ឱ្យស្រូវចំនួន ៨៧៥ ហិកតារងការខូចខាត។ ប្រជាពលរដ្ឋ ១ ១៨៦ គ្រួសារ ក្នុង១គ្រួសារទទួលបានពូជស្រូវ ១០០ គីឡូ។

​របាយការណ៍ក្រសួងកសិកម្មបញ្ជាក់ថា ​មានគ្រួសារចំនួន ៥៤៨ គ្រួសារ​នៅក្រុងពោធិ៍សាត់ ខេត្ត​ពោធិ៍សាត់​បានស្នើសុំគ្រាប់ពូជស្រូវដើម្បីដាំដុះស្ដារឡើងវិញផងដែរ៕