បើកកិច្ចប្រជុំ​ពិភាក្សាគម្រោង “ព្រែកជីក​ហ្វូណន​​តេជោ​” ​តម្លៃ​ជាង ១ ៥០០ លាន​ដុល្លារ ជាមួយ​ក្រុមហ៊ុនចិន

កាលពី​រសៀលម្សិលមិញនេះ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី ១ ក្រុមប្រឹក្សាអភិវឌ្ឍន៍កម្ពុជាបានដឹកនាំ​កិច្ច​ប្រជុំពិនិត្យពិភាក្សាលើសេចក្ដីព្រាងកិច្ចព្រមព្រៀងក្របខណ្ឌ (Framework Agreement) នៃគម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ “ព្រែកជីកហ្វូណនតេជោ” ជាមួយក្រុមហ៊ុនសាជីវកម្មស្ពាន និងថ្នល់​ចិន​(CRBC) ដែល​ដឹកនាំដោយលោក Zhou Yong។

ក្នុង​ពិធី​ក៏​មានការ​ចូលរួមពីរដ្ឋមន្ត្រីក្រសួងសាធារណការ និងដឹកជញ្ជូន ក៏ដូចជា​ថ្នាក់​ដឹកនាំស្ថាប័ននៃគណៈកម្មការអន្តរក្រសួង និងមន្ត្រីបច្ចេកទេសពីក្រុមហ៊ុនសាជីវកម្មស្ពាននិងថ្នល់ចិន(CRBC) មួយចំនួនផងដែរ។

សេចក្ដីព្រាងកិច្ចព្រមព្រៀងក្របខណ្ឌ (FA) កំពុងស្ថិតក្នុងការពិនិត្យកែសម្រួល បន្ទាប់ពីបញ្ចប់ការពិនិត្យនិងចុះហត្ថលេខា​រួចរាល់។ ការ​ពិនិត្យ​កែ​សម្រួល​ដើម្បី​អាច​កំណត់បានកាន់តែច្បាស់ពីសក្ដានុពលនៃគម្រោងព្រែក​ជីក​ហ្វូណន​តេជោ តាមរយៈការសិក្សាឱ្យកាន់តែស៊ីជម្រៅលើគ្រប់ផ្នែកពាក់ព័ន្ធទាំងអស់​ទាំងផលចំណេញផ្នែកសេដ្ឋកិច្ច និងសង្គម។

គម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ត្រូវបានប្រសិទ្ធនាមថាគម្រោង “ព្រែកជីកហ្វូណនតេជោ”។ តាម​ការ​សិក្សាបង្ហាញថា ផ្លូវទឹកព្រែកជីកហ្វូណន-តេជោ មានប្រវែង ១៨០ ​គីឡូម៉ែត្រ ចាប់ពីព្រែកតាកែវនៃ​ទន្លេមេគង្គ ឆ្លងកាត់តាមព្រែកតាឯកនៃទន្លេ​បាសាក់ រួចចូលតាមព្រែកតាហ៉ីង នៃទន្លេ​បាសាក់ ស្រុកកោះធំ និងបន្តរហូត​ដល់សមុទ្រខេត្តកែប ដោយឆ្លងកាត់​ខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុបប្រមាណ ១.៦លាននាក់ រស់នៅអមសងខាងផ្លូវទឹក។

ការសាងសង់គម្រោងផ្លូវទឹកនេះ​តាម​ការ​ប៉ាន់ស្មាន​អាច​ចំណាយ​ទុន​វិនិ​យោគ​ប្រមាណ ១,៧០០លានដុល្លារអាមេរិក និង​រយៈ​ពេលសាងសង់ប្រមាណ ៤ ឆ្នាំ៕