ព័ត៌មានជាតិ

អភិបាលខេត្តកែប ជំរុញមន្ត្រីថ្នាក់ក្រោម ជួយរក្សាសុខសុវត្ថិភាពភ្ញៀវទេសចរ កំឡុងបុណ្យភ្ជុំបិណ្ឌ ឲ្យបានល្អ

បានផុស

១ year មុន

នៅ

ថ្ងៃព្រហស្បតិ៍ ១២ តុលា ២០២៣

ដោយ

លោក សោម ពិសិដ្ឋ អភិបាលខេត្តកែប ជំរុញមន្ត្រីរាជការ កងកម្លាំង ប្រធានមន្ទីរអង្គភាព អភិបាលក្រុង ស្រុក ឲ្យសហការគ្នា ត្រៀមរៀបចំកម្លាំងប្រចាំការតាមគោលដៅក្នុងតំបន់ទេសចរណ៍នីមួយៗ ដើម្បីរក្សាសុខសុវត្ថិភាពជូនភ្ញៀវទេសចរជាតិ-អន្តរជាតិ ដែលមកលេងកម្សាន្តនៅខេត្តកែប កំឡុងបុណ្យភ្ជុំបិណ្ឌរយៈពេលបីថ្ងៃ ឲ្យបានល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញនេះ នាឱកាស លោក សោម ពិសិដ្ឋ អភិបាលខេត្តកែប ជួបសំណេះសំណាលជាមួយមន្ត្រីរាជការក្នុងសាលាខេត្តពេទ្យ ក្រោមអធិបតីភាពលោក សំ សារីន ប្រធានក្រុមប្រឹក្សាខេត្តកែប នៅថ្ងៃទី ១២ ខែតុលា ឆ្នាំ ២០២៣។

លោក សោម ពិសិដ្ឋ ជំរុញមន្ត្រីរាជការ កងកម្លាំង ប្រធានមន្ទីរអង្គភាព អភិបាលក្រុង ស្រុក សហការគ្នាឲ្យបានល្អក្នុងការរៀបចំសណ្ដាប់ធ្នាប់តាមទីសាធារណៈ និងត្រៀមរៀបចំកម្លាំងប្រចាំការតាមគោលដៅតំបន់ទេសចរណ៍នីមួយៗ ដើម្បីរក្សាសុខសុវត្ថិភាពជូនភ្ញៀវទេសចរជាតិ-អន្តរជាតិ ដែលមកលេងកម្សាន្តនៅខេត្តកែប កំឡុងបុណ្យភ្ជុំបិណ្ឌរយៈពេលបីថ្ងៃ ចាប់ពីថ្ងៃទី ១៣-១៥ ឲ្យបានល្អប្រសើរ។

ឆ្លៀតឱកាសនោះដែរ លោក សោម ពិសិដ្ឋ បានកោតសរសើរដល់ថ្នាក់ដឹកនាំ និងមន្ត្រីរាជការ នៃសាលាខេត្ត ដែលមានសាមគ្គីភាពផ្ទៃក្នុងបានល្អ ខិតខំប្រឹងប្រែងបំពេញការងារប្រកបដោយឆន្ទៈមនសិការខ្ពស់ និងបន្តអភិវឌ្ឍន៍ចំណេះដឹង ពង្រឹងសមត្ថភាព រហូតទទួលបាននូវភាពជោគជ័យ ក្នុងភារកិច្ចការងារជូនរដ្ឋបាលខេត្តកន្លងមក។

ជាមួយនោះ លោក សោម ពិសិដ្ឋ ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ណែនាំដល់មន្ត្រីទាំងអស់ក្នុងខេត្តកែប និងសូមជូនពរពេលធ្វើដំណើរទៅលេងស្រុកកំណើតក្នុងរដូវបុណ្យភ្ជុំបិណ្ឌខាងមុខនេះ សូមឲ្យមានសុវត្ថិភាព និងសូមគោរពច្បាប់ចរាចរណ៍ឲ្យបានខ្ជាប់ខ្ជួនក្នុងពេលបើកបរ ដោយពាក់មួកសុវត្ថិភាព និងពិសាគ្រឿងស្រវឹងសូមកុំបើកបរ។

អភិបាលខេត្តកែប បានរំលឹកផងដែរថា ជារៀងរាល់ឆ្នាំ ថ្នាក់ដឹកនាំខេត្ត តែងតែជួបសំណេះសំណាលលើកទឹកចិត្តជូនមន្ត្រីរាជការចំណុះឲ្យរដ្ឋបាលសាលាខេត្ត ក្នុងឱកាសពិធីបុណ្យភ្ជុំបិណ្ឌ ក៏ដូចជាបុណ្យចូលឆ្នាំទៅតាមទម្លាប់មិនដែលមានការខកខាននោះឡើយ។

គួរជម្រាបថា ពិធីសំណេះសំណាលខាងលើ ក៏មានការអញ្ជើញចូលរួមពីសំណាក់ ឯកឧត្ដម លោកជំទាវ និងសមាជិកក្រុមប្រឹក្សាខេត្ត ឯកឧត្ដម លោកជំទាវអភិបាលរងខេត្ត លោក លោកស្រីអភិបាលស្រុក និងថ្នាក់ដឹកនាំមន្ទីរ និងមន្ត្រីរាជការចំណុះឲ្យសាលាខេត្តកែប ជាច្រើនរូបផងដែរ៕

អត្ថបទ ៖ សឹង រ៉ាត់