សម្ដេច ហ៊ុន ម៉ាណែត នឹងអញ្ជើញទៅចិន ចូលរួមវេទិកាខ្សែក្រវ៉ាត់ និងផ្លូវ នៅថ្ងៃទី១៧-១៨ ខែតុលា

តបតាមការអញ្ជើញរបស់ លោក  ស៊ី ជីនពីង ប្រធានាធិបតី នៃប្រទេសចិន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា នឹងអញ្ជើញដឹកនាំ គណៈប្រតិភូជាន់ខ្ពស់ចូលរួមវេទិកាខ្សែក្រវាត់ និងផ្លូវលើកទី៣ (3′ BRF) សម្រាប់កិច្ចសហប្រតិបត្តិការ អន្តរជាតិ ដែលនឹងប្រព្រឹត្តពីថ្ងៃទី១៧ ដល់ថ្ងៃទី១៨ ខែតុលាឆ្នាំ២០២៣ នៅរដ្ឋធានីប៉េកាំង។

នេះបើតាមសេចក្ដីប្រកាសព័ត៌មានរបស់ក្រសួងការបរទេស និងកិច្ចសហប្រតិបត្តិការ អន្តរជាតិ នៅល្ងាចថ្ងៃទី១៤ ខែតុលា ឆ្នាំ២០២៣នេះ។

សេចក្ដីប្រកាសព័ត៌មាន បានសរសេរថា មូលបទនៃ កិច្ចប្រជុំនេះ គឺ «កិច្ចសហប្រតិបត្តិការខ្សែក្រវាត់និងផ្លូវ ប្រកបដោយគុណភាពខ្ពស់៖ រួមគ្នាដើម្បីការ អភិវឌ្ឍ និងវិបុលភាពរួម»។

សេចក្ដីប្រកាសព័ត៌មាន បានបន្តសរសេរថា  “​នៅក្នុងវេទិកាខ្សែក្រវាត់និងផ្លូវនេះ សម្ដេចធិបតីនឹងថ្លែងសុន្ទរកថាគន្លឹះ ស្ដីពី “សេដ្ឋកិច្ចឌីជីថលជាប្រភពនៃកំណើនថ្មី»។ អំឡុងពេលចូលរួមវេទិកានេះ សម្តេចធិបតីនឹងជួបពិភាក្សាជាមួយ ឯកឧត្តមប្រធានាធិបតី ស៊ី ជីនពីង និងថ្នាក់ដឹកនាំចិនដទៃទៀត ដើម្បីពិភាក្សាអំពីកិច្ចសហប្រតិបត្តិ ការក្នុងក្របខ័ណ្ឌទ្វេភាគីនិងពហុភាគី ព្រមទាំងមានជំនួបពិភាក្សាដាច់ដោយឡែកពីគ្នា ជាមួយឥស្សរជន បរទេសដទៃទៀតផងដែរ”។

សេចក្ដីប្រកាសព័ត៌មានរបស់ក្រសួងការបរទេស បានសរសេរអះអាងថា “ការអញ្ជើញចូលរួមរបស់សម្ដេចធិបតី ក្នុងវេទិកាខ្សែក្រវាត់ និងផ្លូវលើកទី៣ នឹងបញ្ជាក់ជាថ្មីនូវ ការគាំទ្ររបស់កម្ពុជាចំពោះគំនិតផ្តួចផ្ដើមខ្សែក្រវាត់ និងផ្លូវដែលគូសបញ្ជាក់ពីការប្ដេជ្ញាចិត្តរបស់កម្ពុជា ក្នុងការសហការយ៉ាងជិតស្និទ្ធជាមួយចិន ដើម្បីជំរុញកិច្ចសហប្រតិបត្តិការខ្សែក្រវាត់និងផ្លូវប្រកបដោយ គុណភាពខ្ពស់ សម្រាប់កំណើនរួម សន្តិភាព និងការអភិវឌ្ឍប្រកបដោយចីរភាពក្នុងតំបន់និងអន្តរជាតិ”។

ជាការកត់សម្គាល់  ក្រោយការចូលកាន់តំណែងជានាយករដ្ឋមន្ត្រីកម្ពុជា កាលពីថ្ងៃទី២២​ ខែសីហា ឆ្នាំ២០២៣កន្លងទៅ នេះជាលើកទី២ ហើយដែលសម្ដេចធិបតី ហ៊ុន ម៉ាណែត អញ្ជើញទៅកាន់ប្រទេសចិន។ ដំណើរអញ្ជើញទៅកាន់ប្រទេសចិនរបស់ សម្ដេចធិបតី ជាលើកទីមួយកាលពីថ្ងៃទី១៤ដល់ថ្ងៃទី១៤ ខែកញ្ញាកន្លងទៅ៕