ចប់ទស្សនកិច្ចនៅចិន សម្ដេចធិបតី នឹងបន្តដំណើរទៅអារ៉ាប៊ីសាអ៊ូឌីត

ក្រោយបញ្ចប់កម្មវិធីក្នុងប្រទេសចិននៅថ្ងៃទី១៨ ខែតុលា  សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងដឹកនាំគណៈប្រតិភូកម្ពុជា ធ្វើដំណើរទៅកាន់ប្រទេសអារ៉ាប៊ីសាអ៊ូឌីតជាបន្តទៀត ដើម្បីចូលរួមកិច្ចប្រជុំកំពូលអាស៊ានក្រុមប្រឹក្សាសហប្រតិបត្តិការឈូងសមុទ្រ នៅទីក្រុងរីយ៉ាដ។ នេះបើតាមការបញ្ជាក់របស់ លោក មាស សុភ័ណ្ឌ អ្នកនាំពាក្យនាយករដ្ឋមន្ត្រីកម្ពុជា ក្នុងសន្និសីទសារព័ត៌មានលម្អិតអំពីដំណើរទស្សនកិច្ចរបស់សម្ដេចធិបតី។

លោក មាស សុភ័ណ្ឌ នៅព្រឹកថ្ងៃទី១៦ ខែតុលានេះ បានគូសបញ្ជាក់ថា “បន្ទាប់ពីចប់កម្មវិធីនៅសាធារណរដ្ឋប្រជាមានិតចិន តបតាមការអញ្ជើញរបស់ ព្រះមហាក្សត្រនៃព្រះរាជាណាចក្រអារ៉ាប៊ីសាអ៊ូឌីត សម្ដេចធិបតី នឹងដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា អញ្ជើញបន្តដំណើរចូលរួមកិច្ចប្រជុំកំពូលអាស៊ាន ក្រុមប្រឹក្សាកិច្ចសហប្រតិ​បត្តិការឈូងសមុទ្រ នៅក្រុងរីយ៉ាដ ដែលនឹងប្រព្រឹត្តទៅថ្ងៃទី២០ខែតុលាឆ្នាំ២០២៣”។

​បើតាមអ្នកនាំពាក្យនាយករដ្ឋមន្ត្រីកម្ពុជា តាមការគ្រោងទុក សម្ដេចមហារបវរធិបតី នឹងធ្វើមាតុភូមិនិវត្តន៍មកដល់កម្ពុជាវិញ នៅរាត្រីថ្ងៃទី២១ ខែតុលា វេលាម៉ោង ៩៖ ០០ នាទីយប់។​ ​

ជាក់ស្ដែង នៅព្រឹកថ្ងៃទី១៦ ខែតុលានេះ សម្ដេចធិបតី និងលោកជំទាវ បណ្ឌិត ពេជ ចន្នមុន្នី ហ៊ុន ម៉ាណែត បានដឹកនាំគណៈប្រតិភូជាន់ខ្ពស់នៃកម្ពុជា ធ្វើដំណើរទៅកាន់ប្រទេសចិន ដើម្បីចូលរួមវេទិកាខ្សែក្រវ៉ាត់ និងផ្លូវលើកទី៣ ចាប់ពីថ្ងៃទី១៧ ដល់ថ្ងៃទី១៨ ខែតុលា តបតាមការអញ្ជើញរបស់​លោក ស៊ី ជីនពីង ប្រធានាធិបតីចិន។

 ក្នុងដំណើរទៅកាន់ប្រទេសចិននេះ សម្ដេចធិបតី នឹងមានជំនួបសំខាន់ៗជាមួយ ប្រធានាធិបតីចិន នាយករដ្ឋមន្ត្រីចិន សមាជិកគណៈអចិន្ត្រៃយ៍នៃការិយាល័យនយោបាយគណកម្មការមជ្ឈិមបក្សកុម្មុយនីស្តចិន។    សម្ដេចធិបតី ក៏នឹងមានជំនួបជាមួយ ប្រធានរដ្ឋវៀតណាម ប្រធានរដ្ឋឡាវ។ សម្ដេចធិបតី នឹងអនុញ្ញាតឱ្យក្រុមហ៊ុនវិនិយោគ ចូលជួបសម្ដែងការគួរសមផងដែរ៕

ដោយ៖  ង៉ិល ណារ៉ាត់