រថយន្តធុនតូចត្រូវបានអនុញ្ញាតឱ្យធ្វើចរាចរណ៍នៅផ្លូវជាតិលេខ ៣ តែហាមរថយន្តធុនធំ

រដ្ឋបាលខេត្តកំពង់ស្ពឺនៅថ្ងៃទី ១៦ ខែ តុលានេះ បានប្រកាសអនុញ្ញាតឱ្យរថយន្តធុនតូច និងលក្ខណៈគ្រួសារអាចធ្វើដំណើរឆ្លងកាត់ផ្លូវជាតិលេខ ៣ នៅចន្លោះគីឡូម៉ែត្រលេខ៤៧ និង៤៨ ចំណុចភូមិសាស្ត្រស្រុកគងពិសី ខេត្តកំពង់ស្ពឺ។

រដ្ឋបាលខេត្តកំពង់ស្ពឺបានបញ្ជាក់ថា៖ «សូមជម្រាបជូនដល់បងប្អូនប្រជាពលរដ្ឋ និងសាធារណ​ជនដែលជាម្ចាស់រថយន្តធុនតូច និងលក្ខណៈគ្រួសារអាចធ្វើដំណើរឆ្លងកាត់ទៅបាន ដោយឡែកសម្រាប់រថយន្តដឹកជញ្ជូនធន់ធំ ឬដឹកទំនិញធន់ធំ ដែលមានបំណងធ្វើដំណើរទៅខេត្តកំពត ឬរាជធានីភ្នំពេញ ត្រង់ចំណុចខាងលើ សូមបញ្ចៀសចរាចរណ៍តាមផ្លូវជាតិលេខ៤១ ឬផ្លូវជាតិលេខ២ វិញជាបណ្តោះអាសន្ន»។

លោក សុទ្ធ គឹមកុលមុនី អ្នកនាំពាក្យ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ​មាន​ប្រសាសន៍​នៅ​រសៀល​ថ្ងៃ​ទី ១៦ តុលា​នេះ​ថា ជំនន់​ទឹកភ្លៀង​នៅ​ខេត្ត​កំពង់ស្ពឺ​បាន​ប៉ះពាល់​ប្រជាពលរដ្ឋ​ប្រមាណ​ជាង ៥០០ គ្រួសារ និង​ជម្លៀស​ទៅ​រក​ទី​ទួល​សុវត្ថិភាព​ចំនួន ១៧ គ្រួសារ ព្រម​ទាំង​ហេដ្ឋារចនាសម្ព័ន្ធ​ផ្សេងៗទៀត។

ទឹក​ចាប់ផ្ដើម​ជន់​លិច​ហូរ​កាត់​ផ្លូវជាតិ​លេខ ៣ ត្រង់​ចំណុច​ស្រុក​គងពិសី នៅ​ថ្ងៃ​ទី ១៥ ខែ​តុលា បណ្តាល​ឲ្យ​អាជ្ញាធរ​ផ្អាក​ការ​ធ្វើ​ចរាចរណ៍​ជា​បណ្ដោះអាសន្ន ដើម្បី​ចៀសវាង​ការ​ខូចខាត​ផ្លូវ និង​គ្រោះថ្នាក់​ផ្សេងៗ ដល់​អ្នក​ធ្វើដំណើរ៕