សម្តេចតេជោ សរសើរទូរស័ព្ទIPhone តែថា IPhone 15ពិបាកប្រើជាងគេ

សម្ដេចតេជោ ហ៊ុន សែន អតីតនាយករដ្ឋមន្ត្រីកម្ពុជា តាមរយៈសំណេរនៅលើប្រព័ន្ធតេឡេក្រាមនៅរាត្រីថ្ងៃទី១៦ ខែតុលានេះ   បានកោតសរសើរទូរស័ព្ទដៃម៉ាក iPhone ថាស្រួលប្រើ ហើយបានជួយការងារសម្ដេចតេជោ បានច្រើនជាងគេ។ ប៉ុន្តែសម្ដេចតេជោ ក៏បានកត់សម្គាល់ដែរថា ទូរស័ព្ទ IPhone 15  ពិបាកប្រើជាងគេ។

សម្ដេចតេជោបានគូសបញ្ជាក់ថា “ខ្ញុំជាមនុស្សម្នាក់ដែលប្រើទូរស័ព្ទត្រកូល iPhone ក្នុងចំនួនច្រើននិងគ្រប់ជំនាន់។ ទូរស័ព្ទ iPhone នេះបានជួយការងារខ្ញុំយ៉ាងច្រើន ដែលខ្ញុំសូមអរគុណនិងកោតសរសើរ។អ្វីដែលជាការកត់សំគាល់គឺ iPhone 15 ដែលទើបចេញថ្មីជាប្រភេទទូរស័ព្ទដែលលំបាកប្រើបំផុត។ ខ្ញុំកំពុងប្រើ iPhone 15 ចំនួន៤គ្រឿងគឺពិបាកប្រើដូចគ្នា”។

ដោយសារតែ IPhone 15  ពិបាកប្រើជាងគេក្នុងចំណោមទូរស័ព្ទម៉ាក IPhone  សម្ដេច ហ៊ុន សែន បានអះអាងថា សម្ដេចកំពុងត្រៀមវិលទៅ iPhone 14.13.12 វិញ។

សម្ដេច ហ៊ុ​ន សែន ក៏បានផ្ដាំផ្ញើទៅកាន់អ្នកមិនទាន់ប្រើ IPhone 15  ថា សម្ដេចនៅតែស្រឡាញ់ និងប្រើ iPhone ដដែល តែចង់ផ្តាំទៅអ្នកដែលមិនទាន់ប្រើ iPhone15 ផ្អាកប្រើសិន ដើម្បីកុំឲ្យរងគ្រោះដូចសម្ដេច។

ជាមួយគ្នានេះ សម្ដេចតេជោ ហ៊ុន​ សែន បានដាក់ក្ដីសង្ឃឹមថាក្រុមហ៊ុន និងរកវិធីសម្រួល ដើម្បីប្រើបានស្រួល៕