កន្ធាយកង្កែបមួយក្បាលត្រូវបានលែងឱ្យចូលទន្លេវិញ

សត្វកន្ធាយក្បាលកង្កែបជាប្រភេទកម្រត្រូវបានប្រជានេសាទដាក់សន្ទូចជាប់ជើងរាយការណ៍ទៅអង្គការសមាគមអភិរក្សសត្វព្រៃ (WCS) យកទៅព្យាបាលឲ្យជារបួសជើងហើយលែងទៅក្នុងទន្លេវិញកាលពីថ្ងៃទី ១៦ តុលាឆ្នាំ ២០២៣ ម្សិលមិញនេះ។

លោក ឃីន ម៉ានី ប្រធានសហគមន៍អូតច្រឡង់បានឲ្យដឹងថា សត្វគន្ធាយកង្កែបមួយក្បាលនេះ ត្រូវបានអ្នកនេសាទនៅភូមិរបស់គាត់ឈ្មោះសូត្រ ឆរិន ដាក់សន្ទូចនុយជន្លេនដើម្បីយកត្រី តែកន្ធាយមួយក្បាលនេះ មិនបានស៊ីសន្ទូចនោះទេ បែរជាប់ជើងវាទៅវិញ។

លោកប្រធានសហគមន៍បន្តទៀតថា ក្រោយពីរអ្នកនេសាទខាងលើនេសាទបានកន្ធាយបានរាយការណ៍មក លោកក៏បានរាយការណ៍ទៅអង្គការ WCS ដែលមានទីតាំងនៅក្នុងខេត្តក្រចេះ មកយកដើម្បីព្យាបាលជើងរបស់វាដែលជាប់សន្ទូចមានរបួស។

លោកថាបន្ទាប់ពីអង្គការ WCS យកទៅព្យាបាលរបួសអស់រយៈពេល ១៤ថ្ងៃសត្វកន្ធាយបានជាសះស្បើយ ហើយនៅថ្ងៃទី១៦តុលាម្សិលមិញនេះ បាននិមន្តព្រះសង្ឃធ្វើពិធីសូត្រមន្តនិងមានការចូលរួមពីប្រជាសហគមន៍នេសាទ ឆ្មាំទន្លេ មន្ត្រីរដ្ឋបាលជលផលស្ទឹងត្រែង អង្គការ WCS ដើម្បីលែងសត្វកន្ធាយចូលទៅក្នុងទន្លេវិញនៅត្រង់ចំណុចជាប់សន្ទូចកន្លែងដែលវាធ្លាប់រស់នៅ ដើម្បីធ្វើការអភិរក្សឲ្យវាបន្តពូជ។

សូមបញ្ជាក់ថា សត្វកន្ធាយកង្កែបមួយក្បាលនេះ ត្រូវបានអ្នកនេសាទដាក់សន្ទូចជាប់ជើងកាលពីថ្ងៃទី ២ ខែតុលាឆ្នាំ ២០២៣នៅចំណុចក្បាលកោះឈើទាលតូច ភូមិអូរច្រឡំ ឃុំអូរម្រះ ស្រុកសៀមបូក ខេត្តស្ទឹងត្រែង៕

អត្ថបទ៖ ងិនលីម