ព័ត៌មានជាតិ

រដ្ឋមន្ត្រីក្រសួងបរិស្ថានដាក់ចេញវិធានការ ៤ ទប់ស្កាត់បទល្មើសធនធានធម្មជាតិ

បានផុស

១ year មុន

នៅ

ថ្ងៃពុធ ១៨ តុលា ២០២៣

ដោយ

ដើម្បីទប់ស្កាត់បទល្មើសធនធានធម្មជាតិឲ្យកាន់តែមានភាពល្អប្រសើរបន្តទៀត លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានដាក់ចេញនូវវិធានការសំខាន់ៗ ៤ ចំណុច ដើម្បីអនុវត្តឈានទៅសម្រេចបានលទ្ធផល ១០០%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ាង សុផល្លែត បានមានប្រសាសន៍នារសៀលថ្ងៃទី១៧ ខែតុលា ឆ្នាំ២០២៣នេះថា ចំពោះការអនុវត្តច្បាប់លើបទល្មើសធនធានធម្មជាតិ គឺត្រូវតែធ្វើឲ្យខានតែបាន គឺមិនមានជាដាច់ខាតនូវវប្បធម៌ធ្វើកិច្ចសន្យាហើយដោះលែង។ មួយវិញទៀត មន្ត្រីដែលស្ថិតនៅក្រោមឱវាទ ចាំបាច់ត្រូវអនុវត្តច្បាប់ឲ្យបានល្អប្រសើរក្នុងការថែរក្សាធនធានធម្មជាតិ និងអភិរក្សជីវៈចម្រុះ ឲ្យមានប្រសិទ្ធភាព និងដើម្បីការអភិវឌ្ឍដោយចិរភាព។

ជាក់ស្ដែង វិធានការទាំង ៤ ចំណុចរួមមាន ទី១. ជំរុញការអនុវត្តច្បាប់ ១០០% មិនមានការលើកលែងជាដាច់ខាត និងបញ្ចប់នូវវប្បធម៌ចុះកិច្ចសន្យាហើយដោះលែងអ្នកប្រព្រឹត្តបទល្មើស ទី២ សហការជាមួយគណៈបញ្ជាការឯកភាពរដ្ឋបាលរាជធានី ខេត្ត នោះគឺអាជ្ញាធរមូលដ្ឋានរាជធានី ខេត្ត ដែលមានតួនាទី ភារកិច្ចគ្រប់គ្រងធនធានធម្មជាតិ ឲ្យបានស្អិតរមួត

ទី៣ សហការជាមួយគណៈបញ្ជាការដ្ឋានកងរាជអាវុធហត្ថលើផ្ទៃប្រទេស និងអង្គភាពប្រឆាំងអំពើពុករលួយ បន្ថែមលើកិច្ចសហការជាមួយអាជ្ញាធរមូលដ្ឋាន ដែលបានអនុវត្តកន្លងមក និងទី៤ ជំរុញការដាំ ស្តារព្រៃឈើ សំដៅឲ្យមានការដាំដើមឈើឲ្យច្រើនជាងការកាប់ ដើម្បីបង្កើនការដាំដុះគម្របព្រៃឈើឲ្យបាន ៦០% នៅឆ្នាំ២០៥០ ។

ជាមួយគ្នានេះ លោករដ្ឋមន្ត្រីក៏បានបន្ថែមថា ស្របទៅនឹងការដាំដើមឈើ ត្រូវដាំឲ្យស្របទៅនឹងស្ថានភាពដី ដែលអាចធ្វើឲ្យប្រជាពលរដ្ឋបានទទួលផលពីដើមឈើ ជាស្បៀងអាហារ ជាផលិតផលសម្រាប់លក់ក្នុងទីផ្សារ ឬជាផលិតផលលក់ជូនភ្ញៀវទេសចរជាដើម។

លោករដ្ឋមន្រ្តីក៏បានជំរុញដល់គ្រប់អង្គការដៃគូក្នុងនិងក្រៅស្រុកទាំងអស់ រួមចំណែកការងារអាទិភាពរបស់ក្រសួងដោយរាប់បញ្ចូលទាំងការដាំឫស្សី ដាំដើមត្នោត ឈានទៅសម្រេចទិសដៅរួម ជួយពង្រីកវិសាលភាពគម្របព្រៃឈើ ការពារ និងអភិរក្សព្រៃឈើ បង្កើនជីវភាពប្រជាជន និងរួមចំណែកដ៏សំខាន់ ក្នុងការដោះស្រាយបញ្ហាសកលលើការប្រែប្រួលអាកាសធាតុ៕