តុលាការ ផ្ដន្ទាទោសលោក ថាច់ សេដ្ឋា ដាក់ពន្ធនាគារ៣ឆ្នាំ ក្រោមបទញុះញង់

លោក ថាច់ សេដ្ឋា អនុប្រធានគណបក្សភ្លើងទៀន ត្រូវបានចៅក្រមសាលាដំបូងរាជធានីភ្នំពេញ ប្រកាសសាលក្រម នៅព្រឹកថ្ងៃទី១៨ ខែតុលា ឆ្នាំ២០២៣នេះ ដោយសម្រេចផ្ដន្ទាទោសដាក់ពន្ធនាគារកំណត់៣ឆ្នាំ ក្រោមការចោទប្រកាន់ពីបទ «ញុះញង់»។

សាលក្រមដែលប្រកាសដោយលោកស្រីចៅក្រម ឈុន ដាវី និងលោក សេង ហៀង ព្រះរាជអាជ្ញារងនៃអយ្យការអមសាលាដំបូង ក៏បានសម្រេចពិន័យប្រាក់ជនជាប់ចោទចំនួន៤លានរៀលបង់ចូលថវិការដ្ឋ និងបើកផ្លូវប្ដឹងឧទ្ធរណ៍តាមកំណត់ច្បាប់ បើកាលណាជនត្រូវចោទមិនសុខចិត្តនឹងសេចក្ដីសម្រេចនេះ។

គួរជម្រាបថា លោក ថាច់ សេដ្ឋា ត្រូវបានតុលាការចោទប្រកាន់ពីបទ «ញុះញង់» ក្រោយពេលលោកបានថ្លែងសារនៅក្នុងការជួបជុំមួយនៅប្រទេសជប៉ុន កាលពីចុងឆ្នាំ២០២២ ខណៈការថ្លែងសាររបស់លោក មានចរិតញុះញង់ រើសអើងនៅក្នុងសង្គមខ្មែរ។ អនុប្រធានគណបក្សភ្លើងទៀនរូបនេះ ត្រូវចាប់ខ្លួន កាលពីពាក់កណ្តាលខែមករា ឆ្នាំ២០២៣ នៅរាជធានីភ្នំពេញ។

ពេលកន្លងទៅ លោកធ្លាប់បានស្នើទៅតុលាការរាជធានីភ្នំពេញ សុំតម្កល់ប្រាក់៣ម៉ឺនដុល្លារ ដើម្បីបាននៅក្រៅឃុំបណ្តោះអាសន្ន ប៉ុន្តែ តុលាការបានបដិសេធមិនទទួលយកសំណើសុំតម្កល់ប្រាក់នោះឡើយ។ ដោយមិនបាននៅក្រៅឃុំ មេធាវីរបស់លោក ថាច់ សេដ្ឋា បានបន្តប្តឹងជំទាស់ទៅសាលាឧទ្ធរណ៍ តែនៅតែបរាជ័យដដែល។ បន្ទាប់មក លោកមេធាវី ជួង ជូងី បានបន្តប្ដឹងឡើងតុលាការកំពួល ហើយតុលាការបានសម្រេចមិនឱ្យជនត្រូវចោទនៅក្រៅឃុំ និងបញ្ជូនឱ្យតុលាការថ្នាក់ក្រោមជំនុំជម្រះតាមច្បាប់ រហូតដល់ថ្ងៃកាត់ទោស និងផ្ដន្ទាទោសនេះ៕

អត្ថបទដោយ៖ មករា