អ្នកនាំពាក្យក្រសួងការងារ៖ ពិព័រណ៍ការងារ និងផលិតភាពជាតិឆ្នាំ ២០២៣ នឹងផ្ដល់ឱកាសការងារជាង ២ម៉ឺនកន្លែង

មន្រ្តីជាន់ខ្ពស់ក្រសួងការងារ បានឱ្យដឹងថា ពិព័រណ៍ការងារ និងផលិតភាពជាតិ ឆ្នាំ ២០២៣នេះ នឹងនាំឱកាសការងារចំនួនប្រមាណជាង ២ម៉ឺនកន្លែង ដល់ក្រុមយុវជន និងសិស្ស-និស្សិត ដែលមានបំណងស្វែងរកការងារធ្វើ បន្ទាប់ពីបញ្ចប់ការសិក្សា និងការបណ្ដុះបណ្ដាលជំនាញបន្ថែមផ្សេងៗទៀត។

ការលើកឡើងនេះ គឺធ្វើឡើងនៅក្នុងសន្និសីទសារព័ត៌មាន និងវេទិកាពិភាក្សា ស្ដីពី «ឱកាសការងារដែលមានសក្ដានុ ពល និងត្រៀមខ្លួនឆ្ពោះទៅពិព័រណ៍ការងារ​ និងផលិតភាពការងារ ឆ្នាំ ២០២៣» កាលពីព្រឹកថ្ងៃទី ១៩ ខែតុលា ឆ្នាំ ២០២៣នេះ នៅក្រសួងការងារ និងបណ្ដុះបណ្ដាលវិជ្ជាជីវៈ។

លោក កត្តា អ៊ន រដ្ឋលេខាធិការ​ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ពិព័រណ៍ការងារ និងផលិតភាពជាតិឆ្នាំ ២០២៣នេះ នឹងប្រព្រឹត្តទៅថ្ងៃទី ១០ និងទី ១១ ខែវិឆ្ឆិកា នៅអគារពាណិជ្ជកម្ម និងពិព័រណ៍កោះពេជ្រ មកជួបជុំបើកជាស្ដង់ សម្រាប់ជ្រើសរើសបុគ្គលិកចូលធ្វើការងារ។ ជាក់ស្ដែងកាលពីឆ្នាំ ២០២២កន្លងទៅនេះ មានចំនួនអ្នកចួលរួមសរុប ៤០ម៉ឺននាក់ ក្នុងព្រឹត្តិការណ៍ដ៏មានសារៈសំខាន់មួយនេះ។

ក្រៅពីនេះ ពិព័រណ៍ការងារ និងផលិតភាពជាតិឆ្នាំ ២០២៣នេះ រៀបចំដោយ NEA នៃក្រសួងការងារ បានដាក់ចេញជាយន្តការចំនួន ៣ រួមមាន៖ យន្តការទី ១ ការៀបចំវេទិកាពិព័រណ៍ និងផលិតភាពជាតិ យន្តការទី ២ រៀបចំវេទិកាការងារជាប្រចាំ និងយន្ដការទី ៣ គឺការរៀបចំមណ្ឌលចល័ត ចុះតាមមូលដ្ឋានគោលដៅ ដែលជួយសម្រួលដល់ប្រជាពលរដ្ឋ មិនបានមកចូលរួមក្នុងកម្មវិធី​។

លោក កត្តា អ៊ន បន្តទៀតថា គិតមកត្រឹមឆ្នាំ ២០១១​ រហូតមកដល់​ ២០២៣នេះ ការរៀបចំពិព័រណ៍ការងារ និងផលិត ផលជាតិ​ គឺមានចំនួន ១២លើករួចមកហើយ ដែលឆ្នាំនេះគឺជាលើកទី ១៣ នៃការបង្កើតកម្មវិធី ពិព័រណ៍ការងារ និងផលិតភាពជាតិ។ លោក កត្តា អ៊ន សង្ឈឹមថា ឆ្នាំ ២០២៣នេះ កម្មវិធីពិព័រណ៍ការងារ និងផលិតភាពការងារជូនដល់ប្រជាពលរដ្ឋខ្មែរ ពិសេស យុវជន សិស្ស​-និស្សិត បានយ៉ាងច្រើនជាងឆ្នាំមុនៗទៅទៀត៕

អត្ថបទ៖ សួស​ សិត