​​ទឹកនោមគោក៏អាចលក់បានគេយកទៅធ្វើជីកំប៉ុស

យើងធ្លាប់តែឮ និងដឹងថា អាចម៌គោមានតម្រូវការនៅលើទីផ្សារ ​ដែលអាចលក់បានក្នុងតម្លៃមួយ ​ប៉ុន្តែឥឡូវទឹកនោមគោក៏មានតម្រូវការដែរសម្រាប់បងប្អូនប្រជាពលរដ្ឋមួយចំនួនយកទៅធ្វើជី។

លោក ឆេង ពិសិដ្ឋ មានអាយុ ៤៥ ឆ្នាំ ជាកសិករចិញ្ចឹមគោម្នាក់នៅស្រុកត្រពាំងប្រាសាទ ខេត្តឧត្តរមានជ័យ បានប្រាប់ ថា លោកមានគោ​ត្រឹមតែ ៤០ ក្បាល ហើយលោកលក់ទាំងអាចម៌គោ និងទឹកនោមគោ។ ហើយថាប្រជាពលរដ្ឋអ្នកជិតខាងរបស់លោកដែលជាអ្នកចម្ការមានតម្រូវការយកទឹកនោមគោធ្វើជីកំប៉ុសទឹក និងជីគោក សម្រាប់បាញ់ដំណាំ។

ចំពោះទឹកនោមគោលោកលក់ក្នុងកម្រិតតិចតូចនៅឡើយ ដោយសារមិនទាន់បានរៀបចំក្រោល និងអាងស្តុកត្រងទឹកនោមត្រឹមត្រូវ។

លោក ឆេង ពិសិដ្ឋ៖ «ទឹកនោមគោខ្ញុំលក់​ឱ្យអ្នកជិតខាង គាត់យកទៅធ្វើជី​ និងថ្នាំបាញ់សត្វល្អិត គេសួររកទិញច្រើនដែរ តែខ្ញុំអត់មាន​ ខ្ញុំលក់ឱ្យគេតិចតូច ​១ កាន ឬកន្លះកាន ដោយសារយើងត្រងបានតិចតូច»។

គោមួយក្បាលនោមបានប្រមាណ ៣ ទៅ ៤ លីត្រក្នុង១ ថ្ងៃ ខណៈលោកបង្ហើបឱ្យដឹងថា ហាងឆេងទឹកនោមគោមគោខ្ទង់ ៣ ម៉ឺនរៀល ក្នុងមួយកាន ៣០ លីត្រ។

លោក ឆេង ពិសិដ្ឋ បានឱ្យដឹងថា អ្នកចម្ការចាប់ផ្ដើមដឹងពីគុណភាព និងប្រសិទ្ធភាពជីធម្មជាតិធ្វើឱ្យដំណាំល្អ និងចំណាយលុយតិច។

ទោះជាយ៉ាងណា តម្រូវការទឹកនោមគោគេសង្កេតឃើញថា នៅមានកម្រិតតិចតូចនៅឡើយ ខណៈពលរដ្ឋភាគច្រើន មិនទាន់យល់ដឹងទូលំទូលាយពីប្រសិទ្ធភាពក្នុងការប្រើប្រាស់ទឹកនោមគោធ្វើជី៕

អត្ថបទ៖ ឡេង ដេត