នារីទេសចរសិង្ហបុរី ​មកលេងកម្ពុជាដំបូងចាប់អារម្មណ៍ពីលក្ខណៈពិសេសរបស់កម្ពុជា

Anna Chew មានដើមកំណើតម៉ាឡេស៊ីកំពុងរស់នៅប្រទេសសិង្ហបុរីបានចាប់អារម្មណ៍នឹងអត្តសញ្ញាណ​ពិសេសប្លែករបស់ប្រទេសកម្ពុជា​​នៅ​ពេល​មកដើរកម្សាន្តនៅកម្ពុជាលើកដំបូង។

តើ​ស្ត្រី​រូប​នេះ​និយាយ​អ្វី​ខ្លះ​ពី​កម្ពុជា សូម​តាម​ដាន​​បទសម្ភាសពិសេស រវាងសារព័ត៌មានកម្ពុជាថ្មី និង Anna ដូច​ខាង​ក្រោម៖

សំណួរ: ជាដំបូង ខ្ញុំសូមឲ្យអ្នកនាងណែនាំខ្លួនឲ្យអ្នកទស្សនាបានស្គាល់ផង។
ANNA: ខ្ញុំឈ្មោះ Anna។ ខ្ញុំមកពីប្រទេសសិង្ហបុរី។ នេះជាលើកទី១ដែលខ្ញុំមក​ប្រទេសកម្ពុជា។ ពេលនេះ ខ្ញុំជាអ្នកទេសចរ តែខ្ញុំ​​ធ្វើ​ការ​ជា​អ្នក​បង្កើតមាតិការព័ត៌មាន។ ខ្ញុំ​មក​លេង​ទីក្រុងភ្នំពេញ ពី​ព្រោះ​​ខ្ញុំ​ចង់ស្វែងយល់ពីវប្បធម៌ប្រពៃណី លក្ខណៈ​ពិសេស​របស់កម្ពុជា អីចឹងហើយជម្រើសល្អ ខ្ញុំធ្វើដំណើរតែម្នាក់ឯង។

សំណួរ: តើអ្នកនាង​ចាប់​អារម្មណ៍​លើ​កម្ពុជា​យ៉ាង​ណា​ដែរ នៅ​ពេល​មក​ដល់​ដំបូង?
ANNA: ខ្ញុំស្រឡាញ់កម្ពុជា។ ពេលយន្តហោះកំពុង​ចុះ ខ្ញុំបានសម្លឹងមើលទៅក្រោម អូ! ពិតជាស្រស់ស្អាត មានពណ៌បៃតងគួរ​ឲ្យ​ចូល​ចិត្ត។ ពេលខ្ញុំដើរចេញពីយន្តហោះ ខ្ញុំបានជួបមនុស្សនៅអាកាសយានដ្ឋាន ពួកគាត់ជួយខ្ញុំ ណែនាំ មាន​រថយន្ត​ឈ្នួលទទួល។ ពេល​ធ្វើ​ដំណើរ ពួកគាត់​បាន​ជួយខ្ញុំ។ ពួកគាត់ចូលចិត្តទំនាក់ទំនងជាមួយខ្ញុំ ទោះជាអ្នកខ្លះមិនអាចនិយាយអង់គ្លេស។ អ្វីដែលពួកគាត់ធ្វើគឺមានអ្នកបកប្រែ​ជួយ​ទំនាក់ទំនងជាមួយខ្ញុំ។ ខ្ញុំពិតជាពេញចិត្តខ្លាំង។ ខ្ញុំរកឃើញថា ប្រជាជននៅទីនេះកក់ក្តៅ។ ពេលខ្ញុំទៅដល់សណ្ឋាគារ អ្វីដែលកើតឡើងគឺត្រូវ​ការ​ប្រើ​ប្រាក់រៀល។ អីចឹង ខ្ញុំបានរកគេឲ្យជួយដូរលុយ។ ពួកគាត់ជួយដូរលុយឲ្យខ្ញុំដោយមិនសួរនាំ។ ទាំងនេះជារឿងដ៏ល្អដែលខ្ញុំបានឃើញនៅកម្ពុជា។

សំណួរ: ប្រៀបធៀបជាមួយប្រទេសដទៃដែលអ្នកនាងធ្លាប់ទៅ តើអ្វីជាលក្ខណៈពិសេសអំពីកម្ពុជា?
ANNA: ខ្ញុំបានដើរច្រើនប្រទេសនៅអាស៊ីប៉ាស៊ីហ្វិក។ កម្ពុជាលេចធ្លោជាងគេគឺប្រជាជនពោរពេញដោយភាពកក់ក្តៅ។ ខ្ញុំចូលចិត្តរបៀបរស់នៅរបស់កម្ពុជា។ នេះ​ជាជម្រើសផ្ទាល់ខ្លួនរបស់អ្នកស្រុកដែលយល់ពីគ្នាក្នុងការរស់នៅ​គឺ​ពិតជាឲ្យចាប់អារម្មណ៍។

សំណួរ: មុនពេលមកកម្ពុជា តើអ្នកនាងធ្លាប់បានដឹងអ្វីខ្លះពីកម្ពុជា​ទេ?
ANNA: មានគេប្រាប់ខ្ញុំថា នៅតាមជនបទក្នុងប្រទេសកម្ពុជាស្រស់ស្អាតណាស់។ នោះមិន​ពាក់​ព័ន្ធ​នឹងពិភពខាងក្រៅ។ គេប្រាប់ពីរឿងរ៉ាវដែលបានកើតឡើង​ក្នុងប្រវត្តិសាស្ត្រ។ មានគេនិយាយថា ខ្ញុំប្រហែលជាចង់ទៅលេងវៀតណាមជាងកម្ពុជា ខ្ញុំនិយាយថា ហេតុអីមិនអាច។ ខ្ញុំចង់ស្គាល់តើអ្វីទៅជាកម្ពុជា? ខ្ញុំក៏បានសម្រេចចិត្ត និងចង់ឃើញផ្ទាល់ភ្នែក អីចឹងហើយបានជាខ្ញុំមក។

ខ្ញុំគិតថា កម្ពុជាជាប្រទេសដ៏ស្រស់ស្អាត។ សូមរក្សាឲ្យល្អបន្តទៀត ជាលក្ខណៈពិសេសផ្ទាល់ខ្លួន។ អីចឹងសូមកុំប្រែប្រួល។ អ្វីមួយដែលខ្ញុំចាប់អារម្មណ៍នោះគឺមានប្រជាជនវ័យក្មេងច្រើន។ នោះជារឿងដ៏ល្អបំផុតនៅក្នុងប្រទេសមួយ។ ពេលយើងមានមនុស្សវ័យក្មេង យើងបន្តអភិវឌ្ឍប្រទេសជាតិ អីចឹងការអភិវឌ្ឍប្រទេសមិនចាំបាច់មនុស្សចាស់ទេ។

មុនពេលខ្ញុំមកលេងកម្ពុជា មិត្តភក្តិរបស់ខ្ញុំនៅប្រទេសម៉ាឡេស៊ី មិត្តភក្តិនៅឥណ្ឌូណេស៊ី នៅវៀតណាម នៅហ្វីលីពីន ពួកគេបានប្រាប់ខ្ញុំថា កុំទៅលេងកម្ពុជា ពីព្រោះមានការជួញដូរមនុស្ស។ ព័ត៌មានបែបនេះបានសាយភាយខ្លាំង។ ខ្ញុំចង់និយាយថា រឿងនេះ ប្រហែលជាពីរបីខែមុន។ ខ្ញុំមិនដឹងថា ពិតឬយ៉ាងណាទេ តែមុនពេលខ្ញុំមក​ សូម្បី​ក្រុមគ្រួសារ​ក៏ប្រាប់ មិន​ឲ្យខ្ញុំ​មក​កម្ពុជាដែរ។

សំណួរ: បន្ទាប់ពីត្រឡប់ទៅវិញ តើអ្នកនាងប្រាប់ក្រុមគ្រួសារយ៉ាងណាអំពីកម្ពុជា?
ANNA: តាមពិតទៅកម្ពុជាជាកន្លែងដ៏អស្ចារ្យគួរតែមក។ ការជួញដូរមនុស្សមិនមែនជាការពិតទេ ហោចណាស់ក៏ខ្ញុំមកផ្ទាល់គឺគ្មានអ្វីគួរឲ្យបារម្ភ។ ខ្ញុំបានឃើញមនុស្សម្នា ពួកគាត់សប្បាយរីករាយ។ ខ្ញុំបានឃើញ​ប្រជា​ជន​ធ្វើការ ពួកគាត់ប្រឹងប្រែង​រក​ស៊ី​ដើម្បីជីវិតរស់នៅប្រចាំថ្ងៃ។

សំណួរ: ពេលស្ថិតនៅកម្ពុជា តើអ្នកនាងបានចាប់អារម្មណ៍ ឬឃើញអ្វីគួរឲ្យភ្ញាក់ផ្អើលទេ? តើអ្នកនាងមានទំនាក់ទំនងជាមួយប្រជាពលរដ្ឋ ឬ ឃើញកន្លែងណាមួយដែលពិសេសប្លែកខុសពីប្រទេស​ផ្សេង​ដែលអ្នកនាងធ្លាប់ទៅមុនៗទេ?
ANNA: លក្ខណៈពិសេសបំផុតក្នុងប្រទេសនេះ​គឺខ្ញុំគិតថា ប្រវត្តិសាស្ត្រ។ វាលពិឃាតជាកន្លែងប្លែកជាងគេ សូម្បីទីក្រុងភ្នំពេញក៏ប្លែក។ កម្ពុជាមានកន្លែងដ៏ស្រស់ស្អាតបំផុតគឺប្រាសាទ​អង្គរវត្តនៅខេត្តសៀមរាប។ ទាំងនេះជាអ្វីដែលកម្ពុជា​មាន​លក្ខណៈ​ពិសេសប្លែកជាងគេនៅតំបន់អាស៊ីអាគ្នេយ៍។

សំណួរ: មុនពេលមកកម្ពុជា អ្នកនាងបានដឹងអំពីរបបប្រល័យពូជសាសន៍ ពិតទេ? តើអ្នកនាងចង់ណែនាំមិត្តភក្តិឲ្យមកទីនេះដើម្បីស្វែងយល់ពីប្រវត្តិសាស្ត្រកម្ពុជា?
ANNA: ចាស៎! ដោយសារប្រវត្តិបានធ្វើឲ្យកម្ពុជាមានលក្ខណៈពិសេសប្លែក។ ប្រវត្តិសាស្ត្រប្រហែលជាមិនមែនជារឿងដ៏រុងរឿងបំផុតទេ ប៉ុន្តែប្រជាពលរដ្ឋដែលរួចផុតពីសោកនាដកម្មពី​សម័យ​នោះ​គឺពិតជាអស្ចារ្យណាស់។

សំណួរ: តើ​អ្នកនាងនឹងប្រាប់អ្នកផ្សេង ជាពិសេសប្រជាជនសិង្ហបុរី ឬម៉ាឡេស៊ី ឲ្យមកលេងនៅកម្ពុជាទេ?
ANNA: ពិតណាស់ ខ្ញុំនឹងប្រាប់ពួកគាត់ អាហារនៅទីនេះឆ្ងាញ់។ ខ្ញុំត្រូវតែនិយាយថា មកលេងកម្ពុជាដោយបើកចិត្តទូលាយ ស្វែងយល់ពីកម្ពុជា។ ខ្ញុំក៏ចង់និយាយថា កម្ពុជាកំពុងអភិវឌ្ឍយ៉ាងឆាប់រហ័សក្នុងរយៈពេល២០ឆ្នាំចុងក្រោយ។ បើអ្នកមិនមកកម្ពុជាទេ អ្នកនឹងមិនបានឃើញភាពស្រស់ស្អាតរបស់កម្ពុជា​ឡើយ។

សំណួរ: តើ​ថ្ងៃ​ក្រោយ អ្នកនាងមានគម្រោងមកលេង​​កម្ពុជាទៀតទេ?

ANNA: ខ្ញុំបានប្រាប់មិត្តភក្តិរបស់ខ្ញុំរួចហើយ ខ្ញុំនឹងមកកម្ពុជាទៀត។ ខ្ញុំនឹងដូរលុយរៀលឲ្យបានច្រើនមុនពេលខ្ញុំមកទីនេះម្តងទៀត។ អូ! ខ្ញុំចង់និយាយថា សេវាម៉ាស្សានៅទីនេះល្អ។ ពិតជាងស្ចារ្យ។ មនុស្ស​​កាន់​តែ​ច្រើន​កំពុង​រស់នៅក្នុងពិភពលោកតែមួយ។ យើងនឿយហត់ពីការងារ ធុញថប់នឹងការងារប្រចាំថ្ងៃ អីចឹងមកលេងកម្ពុជា សម្រាកលំហែកាយ ទៅម៉ាស្សា ស្ប៉ា នឹងធ្វើឲ្យយើងធូរស្បើយ ស្រស់ស្រាយ។ គ្រប់ស្ប៉ានៅកម្ពុជា​ប្រកប​ដោយ​វិជ្ជាជីវៈ។ ពួកគេដឹងពីចំណុចដែលត្រូវចាប់សង្កត់។ ពួកគេដឹងពីផ្នែកដែលជាធម្មតាធ្វើឲ្យ​មាន​ការ​សម្រួល​ដល់​សាច់ដុំ។ ខ្ញុំចង់និយាយថា នៅទីនេះជាកន្លែងម៉ាស្សាដ៏ល្អ​។

សំណួរ: តើអ្នកនាងបានទទួលទាន​ម្ហូបខ្មែរខ្លះហើយឬនៅ?
ANNA: អូចាស៎! ខ្ញុំបានញាំអាម៉ុក និងឡុកឡាក់។ ខ្ញុំបានញាំគុយទាវនៅផ្សារទួលទំពួង។ ខ្ញុំចូលចិត្ត។ ខ្ញុំនឹងព្យាយាមញាំឲ្យបានច្រើនមុខទៀត។ ម្ហូបខ្មែរឆ្ងាញ់ ខ្ញុំចូលចិត្ត។

សំណួរ: និយាយអីចឹង តើអ្នកនាងបានទៅទស្សនាប្រាសាទអង្គរវត្តហើយឬនៅ?
ANNA: ខ្ញុំមិនទាន់បានទៅទេ តែខ្ញុំបានឃើញព័ត៌មានច្រើនអំពីប្រាសាទអង្គរវត្ត។ ដូច​ខ្ញុំ​ប្រាប់​ខាង​ដើម​អីចឹង មកលើកក្រោយខ្ញុំនឹងទៅសៀមរាប។

សំណួរ: ចុងក្រោយតើអ្នកនាងមានអ្វីចង់និយាយ ក្រៅពីអ្វីដែលខ្ញុំបានសួរ?
ANNA: ខ្ញុំចង់និយាយថា កម្ពុជាមានលក្ខណៈពិសេសផ្ទាល់ខ្លួន។ ជាអ្វីដែលប្រជាជនកម្ពុជាគួរមានមោទនភាព ដូចជាប្រពៃណី វប្បធម៌ ភាសាគឺពិតជាគួរឲ្យសរសើរ។ សូមកុំឲ្យពិភពខាងក្រៅមានឥទ្ធិពលលើ។ ខ្ញុំគិតថា អ្វីដែលកម្ពុជាមានគឺពិសេសប្លែក និងលេចធ្លោ។ គ្មានអ្វីដែលជំនួសបានឡើយ ហើយក៏មិនមាននរណា​ជំនួសបានដែរ។ សូមបន្តរក្សាប្រពៃណី​ឲ្យ​គង់។ ខ្ញុំបាន​ទៅ​ដល់ទីកន្លែងផ្សេងៗគ្នាជា​ច្រើន​ នៅប្រទេស​កំពុង​អភិវឌ្ឍ​ ខ្ញុំចាប់អារម្មណ៍ថា ពួកគេកំពុងចាប់ផ្តើមបាត់បង់អត្តសញ្ញាណផ្ទាល់ខ្លួន នៅពេលពួកគេបានក្លាយជាតំបន់​ទំនើប ស្តង់ដា និងចម្រុះ។ សូមរក្សាការពារអ្វីដែលអ្នកមាន៕

អត្ថបទ៖ វីរបុត្រ