រូបថតទាំង៥ ជាប់ការប្រកួតប្រជែងឆ្នាំ២០២៣ លើប្រធានបទ «សម្រស់សហគមន៍យើង»

នៅព្រឹកថ្ងៃទី២០ ខែតុលានេះ លោក ពុយ គា ប្រធានក្លិប​អ្នកកាសែត​កម្ពុជា តាមរយៈគណនីបណ្តាញទំនាក់ទំនងសង្គម ហ្វេសប៊ុករបស់លោក បានបង្ហាញរូបថតចំនួន៥ ដែលជាស្នាដៃថត របស់ម្ចាស់ជយលាភី ក្នុងការប្រកួតប្រជែងរូបថត ប្រចាំឆ្នាំ២០២៣ ប្រធានបទ «សម្រស់សហគមន៍យើង» ដែលទើបទទួលរង្វាន់ កាលពីថ្ងៃ១៩ តុលា ម្សិលមិញនេះ។

សម្រាប់ការប្រកួតប្រជែងលើប្រធានបទនេះ ក្លិបអ្នកកាសែតកម្ពុជា ទទួល​បាន​ស្នាដៃ​រូប​ថត​ពី​បេក្ខជនចំនួន ​២៩រូប​ (៨៧សន្លឹក) ​ពី​ស្ថាប័ន​ផ្សេងៗគ្នា​ ដែលសុទ្ធសឹងជា​ការ​ផ្តិតយក​រូប​ភាព​ដ៏ស្រស់ត្រកាល​ នៃ​តំបន់រមណីយដ្ឋាន​ទេសចរណ៍ អេកូទេសចរណ៍ តំបន់ធន​ធាន​ធម្មជាតិ វប្បធម៌ បរិស្ថាន រួម​ទាំង​ការ​អភិវឌ្ឍនៅកម្ពុជា។
ខាងក្រោមនេះ ជារូបថតជយលាភីទាំង៥៖

រូបថតខាងលើនេះ បានឆ្លងកាត់ការពិនិត្យ និងវិនិច្ឆ័យយ៉ាងល្អិតល្អត់របស់គណៈកម្មការ ហើយម្ចាស់ជយលាភីម្នាក់ៗ ទទួលបានថវិកា ចាប់ពី១លានរៀល ដល់ ៣លានរៀល និងពានរង្វាន់ម្នាក់មួយផងដែរ។ ដោយឡែក អ្នកចូលរួមប្រកួតតែមិនបានជាប់ជយលាភី ក៏ទទួលបានរង្វាន់លើកទឹកចិត្តផងដែរ។

គួរបញ្ជាក់ថា ការប្រកួតប្រជែងរូបថតឆ្នាំ២០២៣ លើប្រធានបទ «សម្រស់សហគមន៍យើង» ធ្វើឡើងដោយ​មាន ​កិច្ចសហការ​ពី​ក្រុមហ៊ុន ស៊ី ភី អ​ល (​ខេ​ម​បូ​ឌា​) ឯ​.​ក (CP ALL (Cambodia) Co., Ltd.) និង​ស្ថាប័នរដ្ឋ​ចំនួន ៣ រួម​មាន​ ក្រសួង​ប្រៃសណីយ៍ និង​ទូរគមនាគមន៍​, ក្រសួង​រៀបចំ​ដែនដី នគរូបនីយកម្ម និង​សំណង់ និង​ក្រសួងទេសចរណ៍៕