ខេត្តកំពង់ចាម កំពុងរៀបចំទីតាំងត្រៀមការប្រណាំងទូក ង នៅចុងខែនេះ

អភិបាលខេត្តកំពង់ចាម លោក អ៊ុន ចាន់ដា បានផ្តួចផ្តើមរៀបចំពិធីប្រណាំងទូកង បណ្តែតប្រទីប អុចកាំជ្រួច ក្នុងគោលបំណង ដើម្បីថែរក្សាប្រពៃណី លើកស្ទួយវិស័យកីឡាអុំទូក។ នេះបើតាមការបញ្ជាក់របស់មន្ត្រីរដ្ឋបាលខេត្តកំពង់ចាម។

លោក អ៊ុន ចាន់ដា អភិបាលខេត្តកំពង់ចាម នៅព្រឹកថ្ងៃទី២០ ខែតុលា ឆ្នាំ២០២៣នេះ បានដឹកនាំមន្ត្រីពាក់ព័ន្ធ និងអាជ្ញាធរក្រុងកំពង់ចាម ចុះពិនិត្យទីតាំង ត្រៀមរៀបចំពិធីប្រណាំងទូកង ទូកខ្នាតអន្តរជាតិ បណ្តែតប្រទីប អុចកាំជ្រួច និងតាំងពិព័រណ៍សមិទ្ធផលនានា នៅថ្ងៃទី ២៨-២៩ ខែតុលា ឆ្នាំ២០២៣ ដើម្បីអបអរសាទរបុណ្យចេញព្រះវស្សា ជាពិសេស ដើម្បីថែរក្សាប្រពៃណី លើកស្ទួយវិស័យកីឡាអុំទូក និងបង្កបរិយាកាសសប្បាយរីករាយ ជូនប្រជាពលរដ្ឋក្រោមម្លប់សុខសន្តិភាព។

មន្ត្រីរដ្ឋបាលខេត្តកំពង់ចាម បានឱ្យដឹងថា ពិធីប្រណាំងទូកងនេះ មានការប្រណាំងទូកខ្នាតអន្តរជាតិផងដែរ ស្ថិតនៅក្នងក្រុងកំពង់ចាម។ បន្ថែពីនេះ នៅពេលរាត្រី មានការរៀបចំបណ្ដែតប្រទីប និងអុចកាំជ្រួច ព្រមជាមួយការតាំងពិព័រណ៍សមិទ្ធផលរបស់រដ្ឋបាលក្រុង-ស្រុក មន្ទីរ-អង្គភាពជុំវិញខេត្ត ពិព័រណ៍ផលិតផលនានា និងការប្រគុំតន្រ្តី ដែលមានរយៈពេល ៣ថ្ងៃ ចាប់ពីថ្ងៃទី ២៨-៣០ ខែតុលា ឆ្នាំ២០២៣។

រដ្ឋបាលខេត្តកំពង់ចាម ក៏បានធ្វើការអំពាវនាវដល់ប្រធានមន្ទីរ អង្គភាពជុំវិញខេត្ត ម្ចាស់ក្រុមហ៊ុន ពាណិជ្ជករ អាជីវករនានា និងលោក លោកស្រី ជួយឧបត្ថម្ភ គាំទ្រជាថវិកា និងសម្ភារៈផ្សេងៗ ដល់គណៈកម្មការខេត្តរៀបចំពិធី ដើម្បីមានលទ្ធភាព ក្នុងការទ្រទ្រង់ដល់ក្រុមកីឡាករអុំទូក និងចាត់ចែងរៀបចំពិធីប្រណាំងទូក ង នេះ ឱ្យទទួលបានលទ្ធផលល្អប្រសើរ៕

អត្ថបទ និងរូបភាព ៖ ឡេក ចាន់ពេជ្រ