៤ថ្ងៃនៅចិន តើសម្តេច ហ៊ុន ម៉ាណែត សម្រេចបានសមិទ្ធផលការទូត និងសេដ្ឋកិច្ចអ្វីខ្លះ?

ចាប់ពីថ្ងៃទី១៦ដល់ថ្ងៃទី២០ ខែតុលា ឆ្នាំ២០២៣ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបំពេញទស្សនិកិច្ចនៅក្នុងប្រទេសចិន ដើម្បីចូលរួមវេទិកាខ្សែក្រវ៉ាត់ និងផ្លូវលើកទី៣ តាមការអញ្ជើញរបស់​លោក ស៊ី ជីន ពីង ប្រធានាធិបតីចិន។ ទស្សនកិច្ចរយៈពេល៤ថ្ងៃ ប្រមុខរដ្ឋាភិបាលកម្ពុជា មានជំនួបចំនួន១៣ ដែលក្នុងនោះ មានជំនួបចំនួន៣សំខាន់ៗ ជាមួយថ្នាក់ដឹកនាំចិន ជំនួបចំនួន៨សំខាន់ៗជាមួយមេដឹកនាំក្រុមហ៊ុនវិនិយោគចិន និងជំនួបក្រៅផ្លូវការចំនួន២ជាមួយនាយករដ្ឋមន្ត្រីវៀតណាម និងនាយករដ្ឋមន្ត្រីមន្ត្រីឡាវ។

តាមរយៈជំនួបទាំង១៣ ក្នុងរយៈពេល៤ថ្ងៃនេះ គឺសម្តេចនាយករដ្ឋមន្រ្តីកម្ពុជា បាននាំមកនូវសមិទ្ធផលការទូត និងសេដ្ឋកិច្ចដូចខាងក្រោម៖

+ ជំនួបនយោបាយ និងសមិទ្ធផលដែលសម្រេចបាន

ជំនួបទី១៖ សម្ដេចធិបតី ហ៊ុន ម៉ាណែត បានជួបពិភាក្សាការងារជាមួយ លោក ស៊ី​ ជីនពីង ប្រធានាធិបតីចិន។ តាមរយៈជំនួបដ៏សំខាន់នេះ ថ្នាក់ដឹកកម្ពុជា សម្រេចបានការឯកភាពគ្នាលើការពង្រឹង និងពង្រីកកិច្ចសហប្រតិបត្តិការល្អដែលមានស្រាប់ក្នុងកម្រិតខ្ពស់ និងគ្រប់ជ្រុងជ្រោយ ជាពិសេស តាមរយៈការជំរុញការអនុវត្តកិច្ចសហប្រតិបត្តិការត្បូងពេជ្រ និងការបង្កើត «ច្រករបៀងមច្ឆា និងអង្ករ»  និង «ច្រករបៀងឧស្សាហកម្ម និងបច្ចេកវិទ្យា» បន្តពង្រឹង មិត្តភាពដែកថែប តាមរយៈការបង្កើនកិច្ចសហប្រតិបត្តិការលើគ្រប់វិស័យ ជាពិសេស វិស័យទេសចរណ៍ ថាមពល ពាណិជ្ជកម្ម វិនិយោគ និងការផ្លាស់ប្តូររវាងប្រជាជន និងប្រជាជន ជាពិសេស បានឯកភាពកំណត់យកឆ្នាំ២០២៤ ជាឆ្នាំនៃការផ្លាស់ប្តូររវាងប្រជាជន និងប្រជាជននៃប្រទេសទាំងពីរ កម្ពុជា-ចិន ដើម្បីជំរុញកំណើនវិស័យទេសចរណ៍ ពាណិជ្ជកម្ម និងវិនិយោគ រវាងប្រទេសទាំងពីរឱ្យកាន់តែសកម្ម និងរស់រវើក។

ជំនួបទី២៖ សម្ដេចធិបតី ហ៊ុន ម៉ាណែត បានជួបពិភាក្សាការងារជាមួយ លោក លី ឈាង នាយករដ្ឋមន្ត្រីចិន។ ផលចំណេញនៃជំនួបនេះ គឺសម្ដេចធិបតី សម្រេចបានការចុះហត្ថលេខាលើឯកសារសហប្រតិបត្តិការចំនួន១០ ដើម្បីជំរុញកិច្ចសហប្រតិបត្តិការរវាងប្រទេសទាំងពីរបន្ថែមទៀត ពាក់ព័ន្ធនឹងការពង្រឹងសមត្ថភាពផលិត ការវិនិយោគ ការអភិវឌ្ឍបៃតង ការអភិវឌ្ឍខ្សែបញ្ជូនអគ្គិសនីជនបទ គម្រោងជួសជុលប្រាសាទព្រះវិហារ គម្រោងផ្លូវជនបទ ការអភិវឌ្ឍផ្លូវរថភ្លើង ការសាងសង់សួនឧស្សាហកម្ម ការអភិវឌ្ឍវារីអគ្គិសនីបូមទឹកស្តុកទុក និងការពង្រឹងកិច្ចសហប្រតិបត្តិការលើបរិវត្តកម្មឌីជីថល។​

ជំនួបទី៣៖ សម្ដេចធិបតី ហ៊ុន ម៉ាណែត បានជួបពិភាក្សាការងារជាមួយ លោក ឆាយ លី សមាជិកគណៈកម្មាធិការអចិន្ត្រៃយ៍នៃការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនីស្ដចិន។ តាមរយៈជំនួបនេះ មេដឹកនាំកម្ពុជា សម្រេចបានការបញ្ជាក់អំពីឆន្ទៈរបស់លោក ឆាយ លី ក្នុងការបន្តសហការគាំទ្រដល់យុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា អាណត្តិទី៧។

+ ជំនួបសេដ្ឋកិច្ច និងសមិទ្ធផលដែលសម្រេចបាន

ក្រៅពីជំនួបជាមួយថ្នាក់ដឹកនាំមហាយក្សចិន ប្រមុខរាជរដ្ឋាភិបាលកម្ពុជា បានទទួលជួបប្រធានក្រុមហ៊ុនចិនលំដាប់អន្តរជាតិសរុបចំនួន៨។ ប្រធានក្រុមហ៊ុនទាំងនោះ បានបញ្ជាក់ពីអំពីគម្រោងទស្សនកិច្ចនៅប្រទេសកម្ពុជា ដើម្បីពង្រីកសក្ដានុពលវិនិយោគដែលមានស្រាប់ និងសិក្សាលើគម្រោងថ្មីៗបន្ថែមទៀត លើវិស័យថាមពល ទឹកស្អាត ធនាគារ ការចិញ្ចឹមសត្វ អចលនទ្រព្យ សុខាភិបាល ផ្កាយរណប ការគ្រប់គ្រងប្រព័ន្ធទិន្នន័យរដ្ឋបាលអេឡិចត្រូនិក ពាណិជ្ជកម្មតាមប្រព័ន្ធអេឡិចត្រូនិក និងក្នុងវិស័យគមនាគមន៍ មានដូចជា គម្រោងផ្លូវរថភ្លើងធុនស្រាលភ្ជាប់ពីអាកាសយានដ្ឋានអន្តរជាតិសៀមរាប-អង្គរ ទៅកាន់ក្រុងសៀមរាប និងភ្ជាប់ពីអាកាសយានដ្ឋានអន្តរជាតិតេជោ ទៅកាន់រាជធានីភ្នំពេញ  និង គម្រោងផ្លូវដែកតភ្ជាប់ភ្នំពេញ-សៀមរាប និងភ្នំពេញ-ប៉ោយប៉ែត។ ជាមួយគ្នានេះ ក្រុមហ៊ុនធំៗចំនួន៣ ក៏បានជម្រាបជូនសម្ដេចធិបតី អំពីការបន្ថែមទឹកប្រាក់សរុបចំនួនជិត៩ពាន់លានដុល្លារអាមេរិក ដើម្បីអភិវឌ្ឍន៍គម្រោងបន្ថែមរបស់ពួកគេ។

ជំនួបទី១៖ សម្ដេចនាយករដ្ឋមន្ត្រីកម្ពុជា អនុញ្ញាតឱ្យលោក ខាង ហ៊ូពាវ អគ្គនាយកក្រុមហ៊ុន Genertec International Holding Co., Ltd. ដែលជាក្រុមហ៊ុនមេរបស់ក្រុមហ៊ុន China National Energy Engineering & Construction Co., Ltd. (CNEE) ចូលជួបសម្ដែងការគួរសម និងពិភាក្សាការងារ។ លោក​ ខាង ហ៊ូពាវ បានជម្រាបសម្ដេចធិបតី អំពីភាពជាដៃគូរវាងក្រុមហ៊ុន CNEE របស់ចិន និងក្រុមហ៊ុន Royal Group របស់កម្ពុជា។

ជំនួបទី២៖ ជំនួបរវាងប្រមុខរាជរដ្ឋាភិ​បាលកម្ពុជា ជាមួយប្រធានក្រុមប្រឹក្សាភិបាលក្រុមហ៊ុន China Datang Corporation Ltd.។  លទ្ធផលនៃជំនួបនេះ ក្រុមហ៊ុន China Datang Corporation Ltd. បានប្តេជ្ញាបង្កើនទុនវិនិយោគចំនួន ៦០០ លានដុល្លាអាមេរិក ដើម្បីជាការរួមចំណែកក្នុងការអនុវត្តយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។

ជំនួបទី៣៖ ជំនួបរវាងសម្ដេចធិបតី និងប្រធានក្រុមប្រឹក្សាភិបាលនៃ “ធនាគារចិនគ្រុប។ ជំនួបនេះ ប្រធានក្រុមប្រឹក្សាភិបាលធនាគារចិនគ្រុប បានជម្រាបសម្ដេចធិបតីអំពីគម្រោងការជំរុញសកម្មភាពវិនិយោគពីប្រទេសចិនមកកម្ពុជា និងគម្រោងមកទស្សនកិច្ចនៅកម្ពុជា ដើម្បីពង្រីកកិច្ចសហប្រតិបត្តិការបន្ថែមទៀត ក្នុងវិស័យហិរញ្ញវត្ថុរវាងប្រទេសទាំងពីរ តាមរយៈការនាំមកនូវផលិតផលហិរញ្ញវត្ថុថ្មីៗ។

ជំនួបទី៤៖ ជំនួបរវាងនាយករដ្ឋមន្ត្រីកម្ពុជា ជាមួយយប្រធានក្រុមប្រឹក្សាភិបាលក្រុមហ៊ុន China Machinery Engineering Corporation(CMEC)។ ក្នុងជំនួបនេះ ក្រុមហ៊ុន CMEC បានជម្រាបអំពីគម្រោងសហការវិនិយោគជាមួយក្រុមហ៊ុនកម្ពុជា ក្នុងទំហំទឹកប្រាក់ប្រមាណ ៣.០០០ លានដុល្លារអាមេរិក លើវិស័យថាមពលហ្គាស។

ជំនួបទី៥៖ សម្តេច ហ៊ុន ម៉ាណែត ទទួលជួបជាមួយអគ្គនាយករងជាន់ខ្ពស់ក្រុមហ៊ុន Charoen Pokphand Group (CP Group) ដែលជំនួបនេះ ក្រុមហ៊ុន(CP Group) ជម្រាបជូនសម្តេច ហ៊ុន ម៉ាណែត អំពីបំណងរបស់ក្រុមហ៊ុនក្នុងការពង្រីកការវិនិយោគបន្ថែមទៀតនៅកម្ពុជា ជាពិសេស ក្នុងវិស័យអចលនទ្រព្យ សុខាភិបាល និងផ្កាយរណប។

ជំនួបទី៦៖ ជំនួបរវាងសម្ដេចធិបតី ជាមួយប្រធានក្រុមប្រឹក្សាភិបាលក្រុមហ៊ុន China Metro Group។ សម្រាប់ជំនួបនេះ ក្រុមហ៊ុន China Metro Group បានជម្រាបជូននាយករដ្ឋមន្ត្រីកម្ពុជា ពីគម្រោងអភិវឌ្ឍផ្លូវរថភ្លើងធុនស្រាល តភ្ជាប់ពីអាកាសយានដ្ឋានអន្តរជាតិខេត្តសៀមរាប-អង្គរ ទៅកាន់ក្រុងសៀមរាប និងគម្រោងផ្លូវរថភ្លើងធុនស្រាលតភ្ជាប់ពីអាកាសយានដ្ឋានអន្តរជាតិតេជោ ទៅកាន់រាជធានីភ្នំពេញ និងការសិក្សាអំពីលទ្ធភាពផ្សេងៗ ក្នុងការជួយសម្រាលបន្ទុកចរាចរណ៍នៅកម្ពុជាផងដែរ។

ជំនួបទី៧៖ ជំនួបជាមួយក្រុមហ៊ុន China Railway Construction Corporation (CRCC) ដោយក្រុមហ៊ុន (CRCC) បានជម្រាបសម្ដេចនាយករដ្ឋមន្ត្រី អំពីគម្រោងវិនិយោគនៅកម្ពុជាសរុបចំនួន ៥៣ ជាមួយនឹងដើមទុនប្រមាណ ៥.៣០០ លានដុល្លារអាមេរិក។

ជំនួបទី៨៖ ជំនួបជាមួយក្រុមហ៊ុន​ហ៊ុន Alibaba។ តាមរយៈជំនួបនេះ គឺកម្ពុជា-Alibaba​ បានចុះហត្ថលេខាលើ “អនុស្សារណៈនៃការយោគយល់ (MOU) រវាងក្រសួងពាណិជ្ជកម្មកម្ពុជា ជាមួយនឹងក្រុមហ៊ុន Alibaba របស់ប្រទេសចិន” ដើម្បីដាក់លក់ដោយត្រង់នូវផលិតផលកម្ពុជាលើទីផ្សារចិន ក៏ដូចជាបណ្តាប្រទេសអាស៊ាន។

ក្រៅតែពីជំនួបចំនួន៨នេះ សម្ដេចធិបតី ក៏បានអញ្ជើញជាអធិបតីក្នុងពិធីចុះហត្ថលេខាលើឯកសារសំខាន់ចំនួន៣ គឺទី១. អនុស្សរណ:ភាពជាដៃគូនៃវេទិកាពាណិជ្ជកម្មពិភពលោកបែបអេឡិចត្រូនិច (eWTP) ជាមួយក្រុមហ៊ុនដ៏ធំរបស់ចិន  Alibaba លេីថ្នាលបច្ចេកវិទ្យាកម្ពុជា ដេីម្បីលេីកកម្ពស់ការនាំចេញ, ទីផ្សារពាណិជ្ជកម្មអេឡិចត្រូនិច, ការកសាងសមត្ថភាព  និងបច្ចេកវិទ្យាឌីជីថល និងវិស័យទេសចរណ៍។ ទី២.ពិធីចុះហត្ថលេខារវាងក្រសួងប្រៃសណីយ៍ និងទូរគមនាគមន៍កម្ពុជា និងក្រុមហ៊ុន ហួវៃ ថេកណូឡជី ខូអិលធីឌី (Huawei Technologies Co., Ltd.) ។ ទី៣. ពិធីចុះហត្ថលេខាកិច្ចព្រមព្រៀងក្របខ័ណ្ឌគម្រោងផ្លូវនាវាចរណ៍«ព្រែកជីកហ្វូណនតេជោ»រវាងរាជរដ្ឋាភិបាលកម្ពុជា និងក្រុមហ៊ុនសាជីវកម្មស្ពាន និងថ្នល់ចិន។

+ ជំនួបទ្វេភាគីក្រៅផ្លូវការជាមួយមេដឹកនាំវៀតណាម និងឡាវ លើទឹកដីចិន

ទី១៖ ជំនួបរវាងសម្ដេចប្រមុខរាជរដ្ឋាភិបាល ជាមួយប្រធានាធិបតីវៀតណាម។ ជំនួបនេះ សម្ដេចធិបតី បានស្នើភាគីវៀតណាមឱ្យពន្លឿនការចរចានៃការតភ្ជាប់ផ្លូវល្បឿនភ្នំពេញ-បាវិត និងបាវិត-ហូជីមិញ ដើម្បីជាការសម្រួលដល់ការផ្លាស់ប្តូរពាណិជ្ជកម្ម និងទេសចរណ៍។

ទី២៖ ជំនួបរវាងនាយករដ្ឋមន្ត្រីកម្ពុជា​ ជាមួយប្រធានរដ្ឋឡាវ។ លទ្ធផលដែលសម្ដេចនាយករដ្ឋមន្ត្រីកម្ពុជា ទទួលបានពីជំនួបនេះ គឺភាគីឡាវបានគាំទ្រគំនិតផ្តួចផ្តើមរបស់សម្តេចធិបតី ហ៊ុន ម៉ាណែត ពាក់ព័ន្ធនឹងកិច្ចសហប្រតិបត្តិការទេសចរណ៍ត្រីភាគី កម្ពុជា-ឡាវ-វៀតណាម “ប្រទេសបី គោលដៅតែមួយ (Three Countries One Destination)”។

ក្រោយបញ្ចប់ទស្សនកិច្ចការងារនៅលើទឹកដីចិនរយៈពេល៤ថ្ងៃ សម្ដេចធិបតី នាយករដ្ឋមន្ត្រីកម្ពុជា បានធ្វើដំណើរចាកចេញពីប្រទេសចិន។ ចាកចេញពីប្រទេសចិនក៏ពិតមែន តែមិនមែនសំដៅមកមាតុភូមិកំណើតភ្លាមៗទេ ពោល គឺប្រមុខរាជរដ្ឋាភិបាលកម្ពុជា បានដឹកនាំគណៈប្រតិភូជាន់ខ្ពស់ទៅចូលរួមកិច្ចប្រជុំកំំពូលអាស៊ាន-ក្រុមប្រឹក្សាឈូងសមុទ្រតាមការអញ្ជើញរបស់ព្រះមហាក្សត្រអារ៉ាប៊ី សាអូឌីត។ អំឡុងចូលរួមកិច្ចប្រជុំនេះ សម្ដេចធិបតី ក៏មានជំនួបជាមួយឥស្សរជនបរទេសផ្សេងៗ ជាមួយប្រទេសជាសមាជិកនៃក្រុមប្រឹក្សាឈូងសមុទ្រផងដែរ៕

ដោយ៖ ង៉ិល ណារ៉ាត់