ក្រុមហ៊ុនចិន មានឆន្ទៈផ្តល់ទុនវិនិយោគ​ដល់ធុរកិច្ចថ្មី​នៅកម្ពុជា

មជ្ឈមណ្ឌលបណ្តុះធុរកិច្ចថ្មី GICI ស្ថិតក្នុងទីក្រុង Guangzhou ប្រទេសចិន បានបង្ហាញអំពីឆន្ទៈរបស់ខ្លួន​ក្នុងការចុះ​មកទស្សនកិច្ចប្រទេសកម្ពុជា ដើម្បីពិនិត្យមើលលទ្ធភាពផ្តល់ទុនវិនិយោគដល់ធុរកិច្ចថ្មីនៅកម្ពុជា។ ក្រុមហ៊ុនក៏បាន​រំលេចបន្ថែម​អំពីភាពជាដៃគូរបស់ខ្លួនកន្លងមកជាមួយបណ្ដាប្រទេសដែលជាសមាជិករបស់កម្មវិធីខ្សែក្រវ៉ាត់ និងផ្លូវ ហើយក្នុងនោះកម្ពុជា ក៏ជាសមាជិកកម្មវិធីនេះផងដែរ ដែលអនុញ្ញាតឱ្យក្រុមហ៊ុនមានភាពប្រាកដនិយមខ្ពស់ លើការធ្វើ​សហប្រតិបត្តិការ និងវិនិយោគជាមួយគ្នា។

ការបង្ហាញឆន្ទៈក្នុងការផ្តល់ទុនសម្រាប់វិនិយោគធុរកិច្ចថ្មីនៅកម្ពុជា ក្នុងជំនួបជាមួយលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា នៅប្រទេសចិន កាលពីថ្ងៃទី ២១ តុលា។

លោក ស៊ុន ចាន់ថុល បានបន្តបេសកកម្មក្នុងទីក្រុង Guangzhou ដោយបានចុះទស្សនកិច្ចនៅមជ្ឈមណ្ឌល​បណ្តុះ​ធុរកិច្ចថ្មី Guangzhou International Corporate Incubator (GICI) របស់ ក្រុមហ៊ុន Guangzhou Industrial Investment and Capital Operation Holding Group ស្របតាមការស្វាគមន៍​យ៉ាងកក់​ក្តៅពីលោក Qun Ge នាយករង និងជាប្រធានប្រតិបត្តិក្រុមហ៊ុន។

ក្នុងដំណើរទស្សននេះ ក្រុមហ៊ុនបានធ្វើបទបង្ហាញអំពីការងារមួយចំនួនជូនគណៈប្រតិភូកម្ពុជា។ ទន្ទឹមនេះ លោកឧប​នាយករដ្ឋមន្ត្រី បានលើកអំពីបំណងរបស់រាជរដ្ឋាភិបាលកម្ពុជា លើកិច្ចការងារធុរកិច្ចថ្មីនេះ តាមរយៈការបើក​ឱកាសឱ្យ​មាន​កិច្ចសហប្រតិបត្តិការវិនិយោគ។ លោករដ្ឋមន្ត្រី បានលើកទឹកចិត្តឱ្យ​ក្រុមហ៊ុនសិក្សាលើការបណ្ដាក់​ទុនវិនិយោគ​ធុរកិច្ចរបស់ខ្លួននៅកម្ពុជា ព្រមទាំងអញ្ជើញក្រុមហ៊ុនចុះមកធ្វើទស្សនកិច្ចនៅកម្ពុជាដោយផ្ទាល់ ដើម្បីស្វែងយល់ឱ្យកាន់​តែច្បាស់នូវរាល់សក្ដានុពលរបស់កម្ពុជា។

គួរបញ្ជាក់ថា មជ្ឍមណ្ឌល GICI ជាមជ្ឈមណ្ឌលដ៏ជោគជ័យមួយ ហើយតាមរយៈការគាំទ្ររបស់មជ្ឍមណ្ឌលនេះ បានជួយជំរុញឱ្យធុរកិច្ចថ្មីចំនួន១២ បានទទួលការជោគជ័យ រហូតដល់មានលទ្ធភាពអាចបោះភាគហ៊ុនលើ​ទីផ្សារភាគហ៊ុនបានផងដែរ៕