នគរបាលបារាំង បណ្ដុះបណ្ដាលនគរបាលកម្ពុជា លើជំនាញបច្ចេកទេសត្រួតពិនិត្យកន្លែងកើតហេតុ

នៅថ្ងៃទី២៣ ខែតុលា ឆ្នាំ២០២៣នេះ អគ្គស្នងការដ្ឋាននគរបាលជាតិកម្ពុជា ដោយមានកិច្ចសហការជាមួយនគរបាលបច្ចេកទេសបារាំង បានបើកវគ្គបណ្ដុះបណ្ដាលបំប៉នជំនាញបច្ចេកទេសត្រួតពិនិត្យកន្លែងកើតហេតុដល់មន្ត្រីជំនាញនគរបាលជាតិកម្ពុជា។

ក្នុងពិធីបើកវគ្គបំប៉ននេះ បានរៀបចំឡើងក្រោមវត្តមានរបស់លោកឧត្តមសេនីយ៍ឯក មួង សុធា អគ្គស្នងការរងនគរបាលជាតិទទួលបន្ទុកដឹកនាំនាយកដ្ឋានកណ្ដាលនគរបាលយុត្តិធម៌ និងលោកស្រី ណាតាលី កាលីយ៉េ មេបញ្ជាការនគរបាលបារាំង និងជាអនុព័ន្ធសន្ដិសុខផ្ទៃក្នុង ទទួលបន្ទុកកម្ពុជា នៃនាយកដ្ឋានកិច្ចសហប្រតិបត្តិការសន្តិសុខអន្តរជាតិ ក្រសួងមហាផ្ទៃបារំាង។

បើតាមលោកស្រី ណាតាលី កាលីយ៉េ (Nathalie CARLIER) វគ្គបណ្ដុះបណ្ដាលជំនាញបច្ចេកទេសត្រួតពិនិត្យកន្លែងកើតហេតុនេះ មានរយៈពេល៥ថ្ងៃ ចាប់ពីថ្ងៃទី២៣ ដល់ថ្ងៃទី២៧ ខែតុលា ឆ្នាំ២០២៣ ដោយផ្ដោតលើបច្ចេកទេសគ្រប់គ្រងកន្លែងកើតហេតុ។ លោកស្រី ថ្លែងថា សកម្មភាពនៃកិច្ចសហប្រតិបត្តិការបច្ចេកទេសនេះ គឺជាផ្នែកមួយនៃកិច្ចសន្ទនាប្រកបដោយការជឿទុកចិត្តដ៏យូរអង្វែងរវាង ក្រសួងមហាផ្ទៃកម្ពុជា និងក្រសួងមហាផ្ទៃបារាំង នាពេលកន្លងមក។ លោកស្រី ចាត់ទុកវគ្គបណ្ដុះបណ្ដាលនេះ គឺជាឱកាសមួយ ដើម្បីចែករំលែកចំណេះដឹងរៀងៗខ្លួនរវាងមន្ត្រីជំនាញនៃប្រទេសទាំងពីរ កម្ពុជា-បារាំង។

ថ្លែងក្នុងឱកាសនេះ​ លោកឧត្តមសេនីយ៍ឯក មួង សុធា អគ្គស្នងការរងនគរបាលជាតិ បានបញ្ជាក់ថា វគ្គបណ្ដុះបណ្ដាលនេះ ពិតជាមានសារៈសំខាន់ណាស់ចំពោះសិក្ខាកាមទាំងអស់ ដែលនឹងទទួលបាននូវជំនាញ និងបទពិសោធថ្មីៗពីអ្នកជំនាញនគរបាលបច្ចេកទេសនៃប្រទេសបារាំង ប្រចាំទីក្រុងប៉ារីស។ លោកអគ្គស្នងការរង បានបន្តថា វគ្គបណ្ដុះបណ្ដាលនេះ ក៏ជាវគ្គពិសេសមួយ ដែលនឹងបង្កើនសមត្ថភាពដល់មន្ដ្រីនគរបាលជាតិកម្ពុជា ក្នុងការស៊ើបអង្កេត វិភាគ និងវាយតម្លៃ នៅកន្លែងកើតហេតុ ក៏ដូចជាការធ្វើសេចក្ដីសន្និដ្ឋានបាន ច្បាស់លាស់ផងដែរ។

លោកអគ្គស្នងការរង សង្ឃឹម និងជឿជាក់ថា សិក្ខាកាមទាំងអស់ នឹងទទួលបាននូវជំនាញថ្មីៗ ហើយច្បាស់លាស់គ្រប់ៗគ្នា ក្រោយបញ្ចប់វគ្គបណ្ដុះបណ្ដាលបំប៉នជំនាញបច្ចេកទេសត្រួតពិនិត្យកន្លែងកើតហេតុ នាពេលនេះ៕