ព្រឹកស្អែក សម្ដេចនាយករដ្ឋមន្ត្រី អញ្ជើញសម្ពោធដាក់ឱ្យប្រើ​ប្រាស់មន្ទីរពេទ្យជាតិតេជោសន្តិភាព

ព្រឹកស្អែក​ ទី២៤ ខែតុលា ឆ្នាំ២០២៣ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងអញ្ជើញសម្ពោធដាក់ឱ្យប្រើប្រាស់មន្ទីរពេទ្យតេជោសន្តិភាព និងប្រកាសដាក់ឱ្យអនុវត្ត ជាផ្លូវការនូវកម្មវិធីទី១ នៃគោលនយោបាយជាអាទិភាពទាំង៦ គឺ “ការពង្រីក វិសាលភាពមូលនិធិសមធម៌ដល់គ្រួសារងាយរងហានិភ័យ” ។

បើកការសាងសង់នៅថ្ងៃទី១៤​ ខែកុម្ភៈ ឆ្នាំ២០២២ មន្ទីរពេទ្យតេជោសន្តិភាព សាងសង់ឡើងនៅផ្ទៃដីប្រមាណ ៧.៥៨ហិកតា ស្ថិតនៅភូមិកប់ស្រូវធំ សង្កាត់គោករកា ខណ្ឌព្រែកព្នៅ រាជធានីភ្នំពេញ។ មន្ទីរពេទ្យជាតិនេះ មានអគារសរុបចំនួន១១ ផ្ទុកគ្រែសរុបចំនួន ៩,៤៩៦គ្រែ។ ក្នុងនោះគ្រែសម្រាប់អ្នកជំងឺសម្រាកព្យាបាលមានចំនួន ៩,២៤៤គ្រែ គ្រែសម្រាប់គ្រូពេទ្យប្រចាំការចំនួន ៤៦គ្រែ និងគ្រែសម្រាប់បុគ្គលិកស្នាក់នៅចំនួន ២០៦គ្រែ។

មន្ទីរពេទ្យជាតិតេជោសន្ដិភាព មានចំនួន១១អគារ ដែលមានអគារព្យាបាល និងសង្គ្រោះបន្ទាន់ (E) មានទំហំ ៧,៤៨០ ម៉ែត្រការ៉េ, អគារព្យាបាលកម្រិតធ្ងន់ (H1 និង H2) មានគ្រែសរុបចំនួន៥២៧គ្រែ, អគារ​ព្យាបាល​កម្រិត​ស្រាល​ (H3,H4,H5, H6 និង H7), អគារបច្ចេកទេស(T1), អគារបច្ចេកទេស (T2), អគារ​ផ្គត់​ផ្គង់​ និង​ព័ត៌មាន​ (A)​ មាន​ទំហំ២,៨៣៥ ម៉ែត្រការ៉េ, អគារស្នាក់នៅសម្រាប់បុគ្គលិក (S) មានគ្រែសរុបចំនួន ២៣៤ គ្រែ។ ចំណត​រថយន្ត​មាន​ផ្ទៃក្រឡា ៧,០២៦ ម៉ែត្រការ៉េ ដែលអាចចត រថយន្តបានចំនួន ២១០ គ្រឿង មានសួនច្បារព័ណ៌បៃតងទំហំ ៤,៤៩០ ម៉ែត្រការ៉េ។

មន្ទីរពេទ្យជាតិតេជោសន្តិភាព គឺជាមន្ទីរពេទ្យដ៏ធំបំផុតប្រចាំកម្ពុជា។ មន្ទីរពេទ្យជាតិមួយនេះ បានបំពាក់នូវសម្ភារៈបរិក្ខាទំនើបៗ។ ជាពិសេសមន្ទីរពេទ្យជាតិនេះ មានចំណតឧត្ថម្ភាគចក្រសម្រាប់ទទួល និងបញ្ជូនអ្នកជម្ងឺផងដែរ៕