ព័ត៌មានជាតិ

ពិព័រណ៍ការងារ ផ្តល់សារប្រយោជន៍ធំៗ ៣ ទាំងក្រុមហ៊ុនត្រូវការបុគ្គលិក និងអ្នករកការងារធ្វើ

បានផុស

១ year មុន

នៅ

ថ្ងៃពុធ ២៥ តុលា ២០២៣

ដោយ

ថ្លែងឡើងនៅក្នុងសន្និសីទសារព័ត៌មានស្ដីពី «ពិព័រណ៍ការងារ និងផលិតភាពជាតិ ១០-១១ វិច្ឆិកា» កាលពីពេលថ្មីៗនេះ លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា ពិព័រណ៍ការងារ និងផលិតភាពជាតិ បានផ្ដល់សារប្រយោជន៍ធំៗចំនួន ៣ ដល់ក្រុមហ៊ុនដែលត្រូវការបុគ្គលិកបម្រើការងារ និងអ្នកដែលត្រូវការការងារធ្វើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន លើកឡើងថា ការរៀបចំឲ្យមានពិព័រណ៍ការងារជាការផ្សារភ្ជាប់គ្នាទៅវិញទៅមករវាងនិយោជក និងនិយោជិក ដើម្បីទទួលបានផលប្រយោជន៍ទៅវិញទៅមក។

ជាក់ស្ដែង ពិព័រណ៍ការងារបានផ្ដល់នៅសារប្រយោជន៍សំខាន់ៗ៣ ទី១ ការរៀបចំឲ្យមានពិព័រណ៍ការងារដើម្បីផ្សារភ្ជាប់រវាងនិយោជក និងនិយោជិក។ មនុស្សមានការងារធ្វើ លុះត្រាតែមានរោងចក្រសហគ្រាស មានក្រុមហ៊ុន ហើយក្រុមហ៊ុនអាចដំណើរការទៅបានលុះត្រាតែមានបុគ្គលិកចូលធ្វើការ ដូច្នេះវាអាចជាសំណង់ភ្ជាប់គ្នារវាងអ្នកត្រូវការកម្លាំងពលកម្ម និងអ្នកដែលត្រូវទៅធ្វើការងារ។

ទី២ ជាវេទិកាជួបជុំមួយដែលយុវជន សិស្ស-និស្សិត អាចឃើញនិងអាចទទួលបាននូវចំណេះដឹងផ្សេងៗ ជាពិសេសការផ្ដល់ការអប់រំ ការផ្តល់ការណែនាំ និងការផ្ដល់ការបណ្ដុះបណ្ដាលនានាជាច្រើននៅក្នុងពិព័រណ៍ការងារនេះ។ មួយវិញទៀត វាក៏ជាការផ្លាស់ប្ដូរ ចែករំលែកក៏ដូចជាចំណេះដឹងផ្សេងៗទៀត ដែលពាក់ព័ន្ធនឹងវិស័យការងារ។

ទី៣ ក្រសួងការងាររួមចំណែកនៅក្នុងការលើកកម្ពស់ការងារ ព្រោះនៅក្នុងពិព័រណ៍ការងារក៏មានសិក្ខាសាលាស្ដីពីផលិតភាពការងារ សំដៅលើកកម្ពស់ការយល់ដឹងរបស់អ្នកដែលបានចូលរួម។

អ្នកនាំពាក្យរូបនេះក៏បានសង្កត់ដែរថា សារប្រយោជន៍ទាំង ៣ខាងលើនេះ បេក្ខជនអាចទទួលបានក្នុងការមកចូលរួមនៅក្នុងពិព័រណ៍ការងារ ព្រោះមានទាំងកន្លែងសិក្ខាសាលា អាចទទួលបានទាំងចំណេះដឹងបន្ថែម ហើយមានទាំងកន្លែងសម្ភាសការងារផ្ទាល់ ដូច្នេះអ្នកដែលចូលរួមកុំភ្លេចត្រៀមប្រវត្តិរូបសង្ខេបដើម្បីបានសម្ភាសភ្លាមៗ៕